MATIUS 22 - Alkitab Singog In Mongondow Masa In Tanaa

Poumpamaan pinonikaan

¹ Ki Yesus in nongonguman bui kon poumpamaan kon i monia, kai-Nia,

² “Aka ki Allah in momarenta, yo naonda bo poumpamaan tanaa: Tobatú datu inta nogaid kon rame sin ponikaan i adínea.

³ Sia in nopotabá kon bobantungnea mita mogoiní kon intau mita inta aindon sinoko oiní kon rame ponikaan tatua, táe intau mita tatua in doí mamangoi.

⁴ Sia in nopotabá bui kon bobantungnea mita ibanea, takin koyow, ‘Pogumandon kon intau mita inta ain sinoko oiní tatua: Kon bayongan kaanon aindon sinadiaku. Sapi mita koḷakian, bo biag inta sinokopiaraku aindon iratá. Bo komintan tua aindon sinadia kon meja. Angoidon in rame ponikaan i adíku singgai in naa!’

⁵ Táe diá in pandung in intau mita inta sinoko oiní tatua. Oyúon inta minayá in gobá, oyúon doman minayá nogaid kon oaidannea;

⁶ bo oyúon doman in nodomok kon bobantungnea mita bo pinogutú poḷat iḻimod.

⁷ Bo datu tatua totok in sinumorú. Pinotabánea in tontaranea minayá nomutú kon moḷoḻimod, bo nonurub kon kotá monia tua.

⁸ Nopaḷut mako, sia in noguman kon bobantungnea mita, ‘Rame ponikaan i adíku naa aindon sinadia komintan, tongá intau mita inta inoiní koina in diádon motaau mamangoi kon rame tanaa.

⁹ Manangka intua bayádon kon pinoyotangaan daḷan bo oinídon in intau mita inta moyodungkuḷ monimu kon tua, bo dia mamangoi kon rame ponikaan tanaa.’

¹⁰ Dá bobantung mita tatua in minayá bo nosipun kon bayongan in intau inta noyodungkuḷ monia kon daḷan. Intau mita moraat bo intau mita mopia, sahingga nopuḻingdon intau in ruangan pinonikaan tatua.

¹¹ Naonda in datu tatua sinumuot sin mokipodungkuḷ kon mokokiangoi mita tatua. Sia nokoontong kon intau tobatú inta diá nogiḷambung in ḷambung pororame.

¹² Dá sia in noḻibó kon intau tatua, ‘Ei utat, nongonu sin iko in sinumuot mangoi táe diábí nomaké in ḷambung inta pororame?’ Intau tatua in tongá kibio-biómai.

¹³ Dá datu tatua in noguman kon bobantungnea mita, ‘Tokig in sioḷ bo ḻimanea bo pogarab in intau tanion kon tampat inta nosindip totok, kon tua kodongogan in amui bo rokokot in ingipon.’ ”

¹⁴ Bo pangabisannea ki Yesus in noguman, “Nobarong in inoiní, táe noyakag in piniḻí.”

Pogoguboḻi kon pajak kon i Kaisar

¹⁵ Intau mita in Parisi minayádon nongkon tua, bo noyosingog kon naonda sinbá kouḻían monia kon taḷá in ki Yesus podoyon kon onu inta ḻibóon monia.

¹⁶ Mosia nopotabá kon dumodudui mita monia noyotakin in intau mita i Herodes sin moḻibó kon i Yesus nanaa, “Pak Guru, kinotaauan nami ki Pak Guru intau inta motuḻid in gina bo takin gina motuḻid doman ki Pak Guru moguman kon daḷan i Allah, bo diá doman ki Pak Guru moondok kon i ine kabí sin diábí poyoposion i Guru in intau.

¹⁷ Dá pogumanka kon inami: Mongo motaau degá in moguboḻi kon pajak kon i Kaisar andeka diá motaau? Aka podudui in raian-Mu yo naonda?”

¹⁸ Ki Yesus nonotaau kon raian monia inta diá mopia tatua, dá Sia in noḻibó, “Nongonu sin moiko in monungkuḷbí kon i-Nakó? Ei moiko intau mita inta diá motuḻid in gina?

¹⁹ Yo poontongka kon i-Nakó in doit inta poguboḻi monimu kon pajak tua!” Mosia nopoontong in doit dinar kon i-Nia.

²⁰ Bo iḻibó-Nea kon i monia, “Gambar bo pais i ine in tanaa?”

²¹ Mosia notubag, “Gambar bo pais i Kaisar.” Dá ki Yesus in noguman kon i monia, “Ogoidon kon i Kaisar onu inta musti ogoi monimu kon i Kaisar, bo ogoi kon i Allah inta musti ogoi monimu kon i Allah.”

²² Nokodongog kon tubag-Nea natua noherang totok in mosia bo sinaḷáandon monia in ki Yesus.

Soaḷ kobiagan nongkon kinopatoian

²³ Kon singgai tatua doman, tongonumai intau in Saduki namangoi kon i Yesus. Mosia naa inta noguman kon intau matoi in diá bidon mobiag bui. Mosia in noḻibó kon i Yesus nanaa.

²⁴ “Pak Guru, ki Musa in noguman, kon aka tobatú intau bo minatoi bo sia in diápa kogadí, dá ki utatnea in musti mobuḷoi kon i baḷunea tatua sinbá oyúon in buí i utatnea tatua.

²⁵ Nokoimontandon in nobaḻí nanaa: Oyúon pitu mogutat, komintan ḷoḷaki. Inta guya-guyang nobuḷoi, táe diá noonggot bo minatoi. Bo popisí in diápa in buínea dá kibaḷunea tatua pinoki pobuḷoinea kon i utatnea.

²⁶ Ki utatnea tatua minatoi doman takin diápa kogadí. Tua in nobaḻí doman kon i utatnea mita nodapot kon i utatnea impitunea.

²⁷ Bo pangabisannea, bobay tatua minatoi domandon.

²⁸ Yo ki ine in kon sigad nayapitu tatua in mobaḻí ki buḷoi in bobay tatua kon wakutu in singgai kobiagan? Sin mosia komintan bidon notonibuḷoi takinnea.”

²⁹ Ki Yesus in noguman kon i monia nanaa: “Moiko nion noitaḷá in pororai monimu, sin diá kinomangaḻean monimu in bonu in Buk Motusi, bo kawasa i Allah.

³⁰ Kon wakutu in kobiagan bui intau, diábí in mobuḷoi bo diábí in pobuḷoion sin mosia in mobiag naonda bo malaekat kon soroga.

³¹ Diápa degá kinobacaan monimu onu inta pinoguman i Allah soaḷ intau minatoi inta biniag bui? Ki Allah in noguman nanaa,

³² ‘Akuoi in ki Allah i Abraham, ki Allah i Ishak bo ki Allah i Yakub.’ Sia deemanbí ki Allah in intau minatoi, táe ki Allah in intau nobiag!”

³³ Intau moantó inta nokodongog kon tua in noibog totok kon onu inta sinundú-Nea.

Hukum inta totok in moponting

³⁴ Naonda intau mita in Parisi nokodongog, kon intau mita in Saduki inaidan i Yesus diá nokobuká kon bibig monia, mosia noyosipun.

³⁵ Bo tobatú kon sigad monia, inta totok in nonotaau kon hukum i Musa, noḻibó sin monungkuḷ kon i-Nia,

³⁶ “Pak Guru, hukum táonda degá inta totok in moponting kon bonu in hukum i Musa?”

³⁷ Tubag i Yesus kon inia, “Kotabidon in ki Tuhan, ki Allahmu bo tongádon Sia in musti sumbaan monimu totu-totuu.

³⁸ Tuata in hukum inta totok in moponting!

³⁹ Bo hukum induanea, inta notongkai intua: Kotabidon in tumpaḷa intau naonda bo kotabimu kon awakmu tontaní.

⁴⁰ Hukum doyowa tanaa inta nobaḻí dodoyonan in bayongan hukum i Musa bo buk in nabi mita.”

Ki Yesus bo ki Daud

⁴¹ Wakutu intau mita in Parisi noyosipunpa mako ki Yesus in noḻibó kon i monia,

⁴² “Aka podudui in raian monimu yo buí i ine in ki Mesias? Ki Adí i ine in Sia?” Tubag monia kon i-Nia, “Buí i Daud.”

⁴³ Dá Sia in noguman, “Aka natua, yo nongonu sin ki Daud inta kinawasaan in Roho i Allah monangoi kon i-Nia, ‘Ki Tuangnea,’ kon wakutu in sia nosingog,

⁴⁴ ‘Ki Tuhan aindon nobogoi in Pirman-Nea kon i Tuangku: ḻitúdon kon dotá in koḷanan-Ku, modapot in bayongan saturumu daiton-Ku potungkud kon tayowon-Mu.’

⁴⁵ Dá aka ki Daud bo monangoi kon i-Nia, ‘Ki Tuang’, yo diábí kumaan kon akaḷ aka Sia bo buí i Daud?”

⁴⁶ Diá tobatúmai in nokotubag kon singog-Nea tatua. Bo mulai singgai tua, diádon in tobatúmai in mokobaḻí mopoḻibó-ḻibómai kon i-Nia.