MATIUS 19 - Alkitab Singog In Mongondow Masa In Tanaa

Totundú Soaḷ Gogaatan

¹ Naonda in ki Yesus nopaḷut notundú kon tua komintan, nobuatdon in Sia nongkon Galilea bo minayá in ḻipú in Yudea inta kon ḷoḷanmai Ongkag in Yordan.

² Intau nobarong totok in dinumudui kon i-Nia, bo kon tua Sia nongundam kon i monia inta nongotakit.

³ Bo namangoidon intau mita in Parisi kon i-Nia sin monungkuḷ. Mosia in noḻibó nanaa, “Aka podudui in hukum agama, motaau degá in doyowa motonibuḷoi mogogaatan aka oyúon in binaḻí dodoyonan in soaḷ tatua?”

⁴ Ki Yesus in noḻibó bui kon i monia, “Degá diápa binaca monimu, kon Sia in nogaid kon intau ḷoḷaki bo bobay nongkon pinomangkoianmai?

⁵ Bo Pirman-Nea in noguman, ‘Manangka intua ḷoḷaki in monaḷámai kon i amá bo kon i inánea bo motobatú takin i buḷoinea, sahingga taya dua motobatúdon kon awak.’

⁶ Bo mosia tua in deeman bidon doyowa, táe tobatú bidon. Tuamai onu inta ain sinobatú i Allah diá bidon motaau poyogaaton in intau.”

⁷ Dá mosia in noḻibó bui kon i-Nia, “Aka natua, yo nongonu sin ki Musa in nomarentabí kon mobogoi in surat talak aka intau mogaat kon i buḷoinea?”

⁸ Ki Yesus in notubag kon i monia nanaa: “Tua in popisíbí in moiko doí mokidongog, dá ki Musa nobogoi in kasampatan kon i monimu mogaat kon i buḷoi monimu, táe sabanarnea in deemanbí natua nongkon pinomangkoianmai.

⁹ Táe bá poguman-Ku kon i monimu: Ki ine in mogaat kon i buḷoinea koḻikudnea bo sia nokituaḻing, bo bui mobuḷoi kon bobay ibanea, yo sia in nonuaḻing doman.”

¹⁰ Murí-Nea mita in noguman kon i-Nia, “Aka natua in doyowa motonibuḷoi yo maníka bo diá mobuḷoi.”

¹¹ Táe ki Yesus in noguman kon i monia, “Diábí komintan intau nonotaau kon singog tatua, táe tongábí mosia inta nokouḻí kon totabi natua.

¹² Oyúon in intau diá mobuḷoi sin sia in pinolahirbí natua, bo oyúon doman in nobaḻí natua sin popisí in intau ibanea, bo oyúon inta ibogneabí tontaní in doí mobuḷoi sinbá motaau mogaid kon oaidan i Allah. Ki ine in mokosanggup motarima kon inta pinoguman-Ku naa yo pomayádon mako tarimaannea in naa.”

Ki Yesus nomarakat kon mongoadí mita

¹³ Bo intau mita in namangoi nodia kon mongoadí mita kon i Yesus, sinbá barakatan-Nea in mosia. Táe murí-Nea mita sinumorú kon intau mita tatua.

¹⁴ Táe ki Yesus in noguman, “Pomayádon mako in mongoadí mita tanion mamangoi kon i-Nakó! Donaai toko ḷamboian in mosia, sin intau mita inta ná mosia tua in mobaḻí umat i Allah.”

¹⁵ Bo binarakatan-Neadon in mosia bodongka nobuat nongkon tua.

Tayowmobiag inta nooyúon

¹⁶ Oyúon tobatú tayowmobiag namangoi bo noḻibó kon i Yesus, “Pak Guru, degá oaid mopia inta naondapa in aidanku sinbá akuoi mokouḻí kon kobiagan mopia bo mononoi?”

¹⁷ Ki Yesus in noḻibó, “Nongonu sin iko in moḻibóbí kon i-Nakó kon onu inta mopia? Tongábí tobatú in mopia. Aka iko moibog mobiag, yo duduiaidon in bayongan parenta i Allah.”

¹⁸ Intau tatua in noḻibó bui kon i-Nia, “Parenta inta táonda?” Dá kai Yesus, “Donaai moḻimod, donaai monuaḻing, donaai monakow, donaai mongonguman kon uboḷ,

¹⁹ horomatbí in ki iná bo ki amámu; bo kotabibí in tumpaḷa intau naonda bo kotabimu kon awakmu tontaní.”

²⁰ Tubag in tayowmobiag tatua kon i-Nia, “Komintan tua aindon dinuduiainku, yo onupa doman in diá notompod?”

²¹ Tubag i Yesus kon inia, “Aka iko bo moibog motompod totok, yo bayádon potaḷui komintan onu inta kon inimu bo silaidon tua komintan kon intau mita inta bogá dá iko in mokouḻídon kon kapunyaan kon soroga, onda intua angoidon kon naa bo dudui kon i-Nakó!”

²² Naonda in tayowmobiag tatua nokodongog kon singog i Yesus tatua, minayá in sia takin ajar in ginanea, sin totok mobarong in kapunyaannea.

²³ Ki Yesus in noguman kon murí-Nea mita, “Poguman-Ku kon i monimu, mororiga totok in intau nooyúon tumuot mobaḻí umat i Allah.

²⁴ Sinbá poguman-Ku bui kon i monimu, untabí in mogampa-gampang tumuot mongin bubú in dodagum dika in intau nooyúon tumuot mobaḻí umat i Allah.”

²⁵ Naonda in murí-Nea mita nokodongog kon tua, nongoherang mosia bo noḻibó: “Aka natua, yo ki ine in motaau posaḷamaton?”

²⁶ Ki Yesus inimindoi kon i monia bo nosingog, “Aka podudui in raian intau yo tua in mororigabí aidan! Táe aka kon i Allah, yo mogampangbí totok intua.”

²⁷ Bo ki Petrus in noguman kon i Yesus, “Kami naa aindon nonaḷámai kon bayongan inta oyúon kon inami bo dinumudui kon ini-Mu. Yo onu degá in mouḻí nami?”

²⁸ Guman i Yesus kon i monia, “Popirisayadon: Kon Dunia Mobagu i Allah, Adí Intau in ḻimitúdon kon tampat pomomarentaan-Nea inta momulia. Kon wakutu intua moiko murí-Ku mita in ḻimitú doman kon ḻimonik in mopuḷú bodoyowá in tampat pomomarentaan bo mohakim kon mopuḷú doman bodoyowá nosuku kon Israel!

²⁹ Bo pomuḷoi intau inta nonaḷámai kon baḷoinea, kon i utatnea ḷoḷaki bo bobay, kon i amá bo kon i inánea, kon i adínea mita andeka nonaḷámai kon gobánea sin dumudui kon i-Nakó, yo sia tua in motarima bui kon moiḻiu kon tua. Bo sia in mokodungkuḷ domandon kon kobiagan mopia bo mononoi.

³⁰ Táe moantó in intau inta noiuna in mobaḻí moitontumi, bo inta noitontumi mobaḻí moiuna.”