MATIUS 18 - Alkitab Singog In Mongondow Masa In Tanaa

Ki ine in moḷobe-ḷoben?

¹ Kon wakutu intua namangoidon in murí mita i Yesus kon i-Nia bo noḻibó, “Ki inebí degá in moḷobe-ḷoben kon sigad in umat i Allah naa?”

² Dá ki Yesus nogoiní kon adí tobatú, bo pinosindog kon yua-yuak monia.

³ Bo nosingog, “Poguman-Ku kon i monimu! Aka moiko bo diá mogogai mogaid kon moitaḷá bo mobaḻí ná mongoadí tanaa, yo moiko in diábí mobaḻí umat i Allah.

⁴ Ki ine in mokopoompá kon oaid bo mobaḻí ná mongoadí tanaa, yo sia tua in moḷobe-ḷoben kon sigad in umat i Allah.

⁵ Bo ki ine inta notarima kon adí ná tanaa sin lantaran Akuoi, yo sia in notarima kon i-Nakó.”

Inta mobaḻí dodoyonan intau mogaid kon inta diá mopia

⁶ “Táe ki ine in mokopopisí kon tobatú nongkon sigad in mongoadí mita tanaa in diádon mopirisaya kon i-Nakó, yo mopia-piabí aka gantung bo popotogot kon sigogownea bodongka taḷomon kon dagat.

⁷ Totuu kon mobodito in dunia naa popisí in totundú inta mokopopisí kon intau mita baradosaan. Memang oyúonbí in wakutu pogaidan kon mokobaradosa kon intau, táe moboditodon in intau inta mogaid kon tua!

⁸ Aka ḻimamu andeka sioḷmu bo mokobaradosa kon inimu, yo pongkó bo ḷumbúdon intua. Sin maníka bo iko in mobiag takin i Allah takin diádon ḻima ande sioḷ tosimpaḷ, dika in oyúonpa in ḻima bo sioḷ doyowa táe pogonag kon bonu in tuḷu in naraka.

⁹ Bo aka matamu mokopopisí kon inimu baradosaan, yo kuil bo ḷumbú. Sin maníka diá in mata tosimpaḷ táe iko in mobiag moyotakin i Allah dika in motompodpa in mata táe pogonag kon bonu in tuḷu in naraka.”

Poumpamaan domba inta nobuḻi

¹⁰ “Pokotorop! Dika mopandang enteng kon mongoadí mita tanaa. Bá poguman-Ku kon i monimu, oyúon in malaekat monia kon soroga inta umuran moindoi kon pogot i Amá-Ku inta kon soroga. [

¹¹ Sin Adí Intau in namangoi sin moposaḷamat kon intau mita inta nongobuḻi!]

¹² Podudui in raianmu yo naonda in naa? Aka intau bo oyúon in dombanea mogatut in kobayongnea, bo tobatú kon sigad in domba mita tatua in nobuḻi, yo onu degá in aidannea? Tantú taḷaanneapabí muna in domba inta siow nopuḷú bo siow tua bodongka mayá motayak, kon inta nobuḻi tobatú tua.

¹³ Bo poguman-Ku kon i monimu, aka mouḻíneadon bui in domba inta nobuḻi tatua, yo tua in totok kotabinea nongkon inta siow nopuḷú bo siow inta diá nobuḻi.

¹⁴ Natua doman ki Amámu inta kon soroga diábí moibog in Sia aka kobuḻian in tobatúmai nongkon mongoadí mita tanaa.”

Tonggina kon utat inta umuran mogaid kon dosa

¹⁵ “Aka ki utatmu bo nogaid kon dosa kon inimu, yo tongginaai in sia kon wakutu in tongá kamu-kamunda. Aka sia bo mokidongog kon tongginamu. Yo iko in nopotutui in daḷan inta mopia kon inia.

¹⁶ Tongá aka diá indongogannea in iko, yo podiadon kon tobatú andeka doyowa in intau. Sinbá mosia mobogoi doman in katarangan, ‘Sin takin katarangan in doyowa andeka toḷu in intau, yo tua in motaau pirisayaan.’

¹⁷ Aka sia bo doípa doman mokidongog kon tonggina monia tatua, yo poyaputdon intua komintan kon jamaat. Bo anggapdon in sia naonda bo intau inta diá nonotaau kon i Allah andeka naonda bo intau inta mononagi kon pajak.”

Soaḷ inta motaau aidan bo inta diá

¹⁸ “Poguman-Ku kon inimu: Onu inta ilarang monimu aidan kon dunia naa yo tua doman inta ilarang kon soroga. Bo onu inta sinotuu monimu kon dunia naa yo tua in totuuon doman kon soroga.

¹⁹ Akuoi in bui doman moguman kon i monimu: Aka doyowa in intau kon sigad monimu bo motobatú kon gina bo moigum kon onukabí, yo onu inta pinoigum monia tua, ogoibí i Amá-Ku inta kon soroga.

²⁰ Sin kon onda in oyúon doyowa andeka toḷu intau moyosipun mosumba kon i-Nakó, yo Akuoi in kon tua kon yua-yuak monia.”

Poumpamaan simpaḷ inta doí mongampung kon intau

²¹ Onda intua namangoi in ki Petrus bo noḻibó kon i Yesus, “Tuhan, dapot in kotongonumai degá akuoi in mongampung kon i utatku aka mosia mogaid kon taḷá kon inakó? Dapot in kopitu degá?”

²² Ki Yesus in noguman kon inia, “Deeman Poguman-Ku kon inimu, deemanbí tongá dapot in kopitu, táe modapot in pitu nopuḷú popokali kon pitu doman!

²³ Sin aka ki Allah in momarenta saḷaku Datu yo motaau popoumpama nanaa: Tobatú datu inta mogiapdon kon boḻi in simpaḷnea mita.

²⁴ Naonda in sia momangkoidon mogiap, pinotayowdon in tobatú intau inta koboḻi kon pulúan juta,

²⁵ táe popisí in intau tatua diádon mokouboḻi kon boḻinea tatua, dá datu tatua in nomarenta sinbá potaḷuidon in ki buḷoi bo ki adínea takin bayongan kapunyaannea sin poguboḻi kon boḻinea.

²⁶ Dá sinumungkudon in simpaḷnea tatua kon tayowon i datu bo nosumba takin noguman kon inia, ‘Posabarpa muna, sin bayongan boḻiku in daitonkubí uboḻianan.’

²⁷ Bo noḻiai in ginanea popisí in tabinea kon simpaḷnea tatua, dá diádon pinoki uboḻinea in boḻinea tatua bo pinopatanneadon.

²⁸ Tongá naonda in simpaḷnea tatua iḷumuai bo noyodungkuḷ in sia in simpaḷ ibanea inta koboḻi doman kon inia táe tongá pulúan ribu. Dinomok bo binongkugnea in yobayatnea tatua, bo poḷat noguman, ‘Uboḻiai in boḻimu!’

²⁹ Yobayatnea tatua sinumungkud bo nopoigum kon inia, ‘Posabarpa muna, uboḻiankubí in boḻiku tatua!’

³⁰ Táe diábí inindongoganneamai in singog in yobayatnea tatua bo binayánea pinobonu kon ponjara nodapot in inuboḻiannea nodait in boḻinea tatua.

³¹ Nokoontongmai kon natua in yobayatnea mita ibanea norobonoḷ totok in gina monia bo binayá pinoguman monia kon i tuang monia tatua in onu inta ain nobaḻí tua.

³² Dá pinoki oiní i datu in intau tatua bodongka siningognea, ‘Ei iko simpaḷ inta moraat! Komintan boḻimu aindon nodait pinopatanku sin pinoigummu kon inakó.

³³ Manangka intua iko in mustibí doman mongampung bo motabi kon yobayatmu tatua ná Akuoi ain notabi kon inimu?’

³⁴ Bo sinumorú totok in ki tuangnea tatua sahingga in pinobonunea kon ponjara in sia nodapot in nodaitnea inuboḻian in bayongan boḻinea.”

³⁵ Pokotorop, “Ki Amá-Ku inta kon soroga in momia doman kon natua kon inimu, aka moiko komintan doí mongampung kon i utatmu totu-totuu.”