MATIUS 17 - Alkitab Singog In Mongondow Masa In Tanaa

Ki Yesus Pinomulia

¹ Onom nosinggai noiduduimai kon tua, ki Yesus nodia kon i Petrus, kon i Yakobus bo kon i Yohanes ki utatnea, mosia noyotakin notakod kon buḷud. Tongábí mosia in kon tua.

² Indoianmai batangan i Yesus nobaḷuibí kon tayowon monia; Pogot-Nea nonindar ná mata in singgai, bo ḷambung-Nea in nobaḻí nobudó mopouḻi-uḻinag naonda bo bayag.

³ Bo inontong monia in ki Musa bo ki Elia in nongonguman takin-Nea.

⁴ Dá ki Petrus in noguman kon i Yesus, nanaa: “Tuhan, mopira totok in kita in kon tampat tanaa. Aka kuma bo moibog in ki Tuhan, yo akuoi in moposindog in ḷoḷaigan toḷu, tobatú in aidanku kon i Tuhan, tobatú in kon i Musa, bo tobatú doman in kon i Elia.”

⁵ Koyogotpa in ki Petrus nosingog kon tua, daḻi-daḻí noikoḷubung magí kon i monia in goḷom inta mobunod bo kinodongogan nongkon goḷom tatua in singog inta noguman, “Naadon in Adí-Ku inta kinotabi-Ku, Sia tanaa inta kinoibog-Ku, indongogaidon in Sia.”

⁶ Nokodongog kon tua nongoitungkud in murí-Nea mita, bo totokdon inangoian in ondok in mosia.

⁷ Bo ki Yesus in namangoi nongamber kon i monia bo noguman, “Sindogdon, bo donaaidon moondok!”

⁸ Bo naonda in mosia dinumungá, diádon inontong monia in ki Musa bo ki Elia, koḻikud bidon in ki Yesus.

⁹ Kon dodai in mosia nosiḻigdon nongkon buḷud tatua, ki Yesus nobogoi in koyow kon i monia, “Donaai oumanon monimu kon i ine kabí in onu inta aindon inontong monimu tatua kon wakutu in ki Adí Intau diápa biagon bui kon sigad in intau minatoi.”

¹⁰ Murí-Nea mita in noḻibó kon i-Nia, “Aka natua yo nongonubí degá sin intau mita inta mototundú kon agama in noguman kon ki Elia in musti mamangoi muna?”

¹¹ Ki Yesus in notubag, “Totuu, ki Elia in mamangoi bo mopoyotutui kon inta noitaḷá.

¹² Táe poguman-Kudon kon i monimu, ki Elia ain namangoi, táe intau diá nokotaau kon inia, bo tongá pinomia monia ibo-ibog in sia. Bo natua doman in roriga inta popoaid monia kon Adí Intau.”

¹³ Kon dodai intua kinomangaḻeandon monia kon inouman i Yesus tua in ki Yohanesbí Mobobaptis.

Ki Yesus nongundam kon adí inta kinotoḷangan in dimukud moraat

¹⁴ Naonda in ki Yesus bo murí-Nea mita minayádon bui kon intau nobarong tatua, namangoidon in tobatú intau nokipodungkuḷ kon i Yesus bo nosumba poḷat noguman,

¹⁵ “Tuhan, kotabipa kaasí in ki adíku, sin sia in notakit, takit in manuk, bo totok in moyoyiga. Sia saḷaḷu moitubá bo tantú doman moḷabú kon tubig.

¹⁶ Aindon pinoki undamku kon murí-Mu mita, táe mosia in diá nokopia.”

¹⁷ Dá ki Yesus in noguman kon murí-Nea mita, “Ei moiko intau inta diá mongopirisaya bo intau inta nongoiḷaḻe, dapotpamain onda in Akuoi in musti moyotakin monimu? Diadon mangoi kon naa adí tanion!”

¹⁸ Bo ki Yesus in noguman kon dimukud moraat inta sinumoḷang kon adí tatua, ‘Ḷuai!’ Bo dimukud moraat tatua in iḷumuai, dá dodaipa doman tatua adí tatua in nopia.

¹⁹ Murí-Nea mita namangoi kon i-Nia bo naonda in mosia noitontaní, mosia in noḻibó kon i Yesus, “Nongonu sin kami in diábí mokountun kon dimukud moraat tatua?”

²⁰ Ki Yesus in notubag, “Popisí in diá mopirisaya in moiko. Tuamai Akuoi in moguman kon i monimu, ‘Aka oyúon pirisayamu tongá kabí ná koḷoben batoḷ in sesawi’, yo moiko in motaau moguman kon buḷud tanaa, ‘Pomampingdon kon tua!’ Dá buḷud tanaa in dumuduibí doman kon singogmu, bo diábí in tobatúmai in diá motaau monimu aidan. [

²¹ Táe dimukud moraat ná tanaa in diábí motaau untunon, koḻikudbí in sambayangan bo popuasaan].”

Induaneadon ki Yesus nopotaau in kopatoian-Nea

²² Kon wakutu in ki Yesus bo murí-Nea mita noyotakin kon Galilea, Sia in noguman kon i monia, “Adí Intau poposarakan monia kon kawasa in intau.

²³ Bo ḻimodon monia in Sia, táe kon singgai intoḷunea biagon bui in Sia.” Nokodongogmai kon tua norobonoḷ totok in gina in murí-Nea mita.

Pinoguboḻian kon pajak in Baḷoi Tuhan

²⁴ Naonda in ki Yesus bo murí-Nea mita noidapot kon Kapernaum, namangoidon in mononagi kon pajak in Baḷoi Tuhan kon i Petrus bo noguman, “Ki Gurumu noguboḻi degá kon pajak in Baḷoi Tuhan andeka diá?”

²⁵ Ki Petrus in notubag, “Uboḻianbí.” Bo naonda in ki Petrus sinumuot kon baḷoi, ki Yesus in muna noḻibó kon inia, “Aka podudui in raianmu yo naonda, Simon? Ki ine in musti moguboḻi kon bea andeka pajak kon datu mita in dunia naa? Intau kon ḻipú tatua andeka intau mokokiangoi?”

²⁶ Ki Petrus notubag, “Intau mokokiangoi!” Dá ki Yesus in noguman kon inia, “Aka natua yo intau mita kon tua in diá bidon paraḷu moguboḻi kon pajak.

²⁷ Táe bá kita in diá mobaḻí ḷonggai kon i monia, dá bayádon bo pongail kon danow. Onda in toyá inta moaḷapmu muna, domokdon bo buká in bibignea dá mouḻímu in doit opat nodirham kon bonunea. Gamá in doit tatua bo uboḻiaidon in pajak natonda kon Baḷoi Tuhan.”