MATIUS 16 - Alkitab Singog In Mongondow Masa In Tanaa

Intau in Parisi bo Saduki moigum kon tanda kon i Yesus

¹ Kon tua namangoidon intau mita in Parisi bo Saduki sin monungkuḷ kon i Yesus takin mopoigum sinbá Sia mopoontong in tanda kon i monia nongkon soroga.

² Táe ki Yesus in notubag, “Aka singgai moḷoḷabungdon bo indoianmai monimu in ḷangit mopuya, dá moiko in moguman, ‘Mopia totok in singgai naa.’

³ Bo aka doḷo-doḷom bo ontongon in ḷangit nopuya táe noungkoḷom moiko in moguman, ‘Monguyan in singgai naa.’ Kaadaan in ḷangit motaau monimu poyoposion táe tanda mita in zaman diá kotaauan monimu!”

⁴ “Intau mita inta moraat bo diá motuḻid in gina tanaa, mopoigum in tanda. Táe mosia in diábí popoontongan intua, koḻikudbí in tanda i Nabi Yunus.” Nopaḷut mako nosingog kon tua, sinaḷaanmaidon i Yesus mosia tua.

Ragi Intau mita in Parisi bo Saduki

⁵ Kon wakutu murí mita i Yesus minayá in ḷoḷan danow, mosia nokoḻiong nodia kon roti.

⁶ Ki Yesus noguman kon i monia, nanaa: “Umuran pobasadia bo mokopoingat kon ragi in intau in Parisi bo Saduki.”

⁷ Dá mosia in norai bo noguman, “Sia nosingog kon natua sin kita in diá nodia kon roti.”

⁸ Bo naonda in kinotaauan i Yesus onu in yogot monia yosingogon tua. Sia in noguman, “Nongonu sin moiko in noyosingogbí kon soaḷ diá in roti? Ei intau mita inta diá mopirisaya!

⁹ Diápa doman degá kinomangaḻean monimu? Bo diádon degá kinotoropan monimu inta roti ḻima notaau pinokaan kon ḻima noribu in intau bo tongonupa doman nokompé in nosipun magí in kiagatnea?

¹⁰ Andeka roti inta tongá pitu bo pinokaan kon opat noribu in intau? Bo tongonupa doman nokompé in sinipun magí in ki agatnea?

¹¹ Nongonu sin diábí kinotaauan monimu kon deemanbí roti imakusud-Ku naa? Táe Akuoi in moguman kon i monimu kon mokopoingatdon kon oaid in intau in Parisi bo Saduki.”

¹² Bain tua bo kinomangaḻean monia kon deemanbí makusud-Nea sinbá mokopoingat kon ragi in roti, táe mokopoingatbí kon onu inta sinundú in intau in Parisi bo Saduki.

Singog pinongaku i Petrus

¹³ Naonda in ki Yesus noiyaput kon Kaisarea Pilipi, Sia in noḻibó kon murí-Nea mita, “Podudui in guman intau ki ine in ki Adí Intau tua?”

¹⁴ Tubag monia, “Oyúon in noguman ki Yohanes Mobobaptis. Oyúon doman in noguman ki Elia, bo oyúon in noguman ki Yeremia andeka tobatú nongkon nabi mita.”

¹⁵ Bo ki Yesus in noḻibó kon i monia, “Táe aka podudui in raian monimu yo ki ine in Akuoi naa?”

¹⁶ Dá ki Simon Petrus in notubag, “Iko in ki Mesias, ki Adí i Allah Inta Nobiag.”

¹⁷ Dá ki Yesus in noguman kon inia, “Pia in kamang iko Simon inta buí i Yunus, sin deemanbí intau in noguman kon singog tatua kon inimu, táe ki Amámubí inta kon soroga.

¹⁸ Bo Akuoi in moguman doman kon inimu, iko in ki Petrus, kon tudu in batu karang tanaa posindogon-Ku in jamaat-Ku; bo diábí in mokotaḷow umpakabí popatoi!

¹⁹ Iko in pobogoian-Ku kon kokunsi in dodatuan soroga. Onu inta diá ogoimu aidan kon dunia, tua doman in diá ogoi aidan kon soroga. Bo onu inta sinotuumu kon dunia yo tua in totuuon doman kon soroga.”

²⁰ Bo ki Yesus nongampag kon murí-Nea mita sinbá mosia in diá mopotaa-taau mako kon i inekadon kon Sia tua in ki Mesias.

Ki Yesus nopotaau in roriga bo popatoi-Nea

²¹ Pinangkoidon kon tungkuḷ intua, ki Yesus nopotaau kon murí-Nea mita, kon Sia in musti mayá in Yerusalem bo motarima kon mobayong in roriga inta popoaid in guhanga mita in ḻipú, imang mita itoi bo mototundú mita kon agama. Bain tua bodongka ḻimodon monia, táe kon singgai intoḷunea mobiag bui in Sia.

²² Táe kinambéan i Petrus in ki Yesus poḷat noguman, “Tuhan! Poigumonku sinbá tua komintan diá in mobaḻí!”

²³ Ki Yesus nobobui bo nosingog kon inia, “Bayádon iko, Ibilis! Sin iko in umuran moḷamboi kon i-Nakó, iko in deemanbí momikir kon onu inta pinikir i Allah, táe tongábí momikir kon inta popikiron in intau!”

²⁴ Bo ki Yesus in noguman kon murí-Nea mita, “Pomuḷoi intau inta moibog dumudui kon i-Nakó, sia in musti monaḷámai kon oaidannea tontaní bo momotaan kon roriganea, bo dumudui kon i-Nakó.

²⁵ Sin ki ine in moibog moposaḷamat in kobiagannea, yo sia in matoi. Táe ki ine in matoi popisí in dumudui kon i-Nakó, yo sia in mosaḷamatbí.

²⁶ Onubí in baragunanea aka intau mokouḻí kon bayongan inta koibognea kon dunia naa, táe sia in matoi?

²⁷ Diádon moonggot bo ki Adí Intau takin malaekat-Nea mita in mamangoi takin kawasa i Amá-Nea. Kon dodai intuata Sia motuḻidon kon pomuḷoi in intau podudui in oaidnea.

²⁸ Poguman-Ku kon i monimu! Kon sigad in intau mita kon naa oyúon in diápa matoi aka mosia in diápa mokoontong kon Adí Intau mamangoi momarenta saḷaku Datu.”