MATIUS 14 - Alkitab Singog In Mongondow Masa In Tanaa

Ki Yohanes Mobobaptis iḻimod

¹ Kon wakutu intua nodapotdon in habar mita kon i Herodes, datu in Galilea soaḷ bayongan inta inaidan i Yesus.

² Dá sia in noguman kon pogawainea mita, “Notantúbí in naa kon ki Yohanes mobobaptis in nobiagdon! Tuamai in oyúondon in kawasa kon i-Nia mogaid kon inta mokoherang.”

³ Sin ki Yohanes ain pinoki domok bo pinoki tokig i Herodes bo binonunea kon ponjara. Soaḷ tatua noyotogot in persoalan i Herodias, ki buḷoi i Pilipus ki utatnea.

⁴ Nokoimontandon in ki Yohanes nonoboḷow kon i Herodes, kai nia: “Diábí mopia aka iko motonibuḷoi i Herodias!”

⁵ Sabanarnea ki Herodes in moibog moḻimod kon i Yohanes, táe sia in moondok kon intau moantó inta nonganggap kon ki Yohanes tua in tobatúbí nabi.

⁶ Tongá kon dodai in kinotompodan umur i Herodes, adí bobay i Herodias nomanari kon yua-yuak in mokokiangoi bo noposanang kon gina i Herodes,

⁷ dá ki Herodes in nongibot kon mobogoi in onukabí in igumonnea.

⁸ Popisí in pinakisa i inánea, dá adí bobay tatua in noguman, “Tududon uḷu i Yohanes mobobaptis kon baki bo ogoidon kon inakó kon naa!”

⁹ Nokodongogmai kon inta inigum in adí tatua, norobonoḷ totok in gina i Herodes. Táe lantaran sia nongibotdon muna kon tayowon mokokiangoinea mita, dá pinotabáneadon sinbá duduian in onu in pinoigum in adí tatua.

¹⁰ Binayáneadon pinoki pongko in uḷu i Yohanes inta kon ponjara.

¹¹ Uḷu tatua sinudu monia kon baki bo dinia inogoi kon adí tatua bodongka inogoi in adí tatua kon i inánea.

¹² Onda intua murí mita i Yohanes Mobobaptis namangoi nogamá kon awaknea bo binayá iḷobong. Nopaḷut mako noḷobong mosia minayá nopotaau in soaḷ tatua kon i Yesus.

Ki Yesus nopokaan in intau ḻima ribu

¹³ Naonda in ki Yesus nokodongog kon habar tatua, Sia nonaḷámaidon kon tampat tatua bo iyumayú, sinumakoi in Sia kon uangga bo minayá in tampat inta noingongow. Táe naonda in kinodongogan in intau moantó nomatuk in mosia, táe nongin toba nongkon ḻipú mita monia.

¹⁴ Naonda in mosia sinumubu ki Yesus nokoontong kon intau nobarong totok, dá noḻiai in gina-Nea popisí in tabi-Nea kon i monia. Bo inundaman-Nea in mosia inta notakit.

¹⁵ Naonda in singgai noungkoḷomdon, murí-Nea mita namangoi kon i-Nia, bo noguman, “Tampat tanaa noitontaní bo singgai noungkoḷomdon, dá pokipobuiaidon in intau mita tanion sinbá mosia mayá motaḷui kon kaanon kon ḻipú mita.”

¹⁶ Táe ki Yesus in noguman kon i monia, “Diáka bidon mosia mayá, moikodon in mopokaan kon i monia.”

¹⁷ Tubag monia, “Kami tongá nodia kon roti ḻima bo toyá doyowa.”

¹⁸ Ki Yesus in noguman, “Diadon mangoi kon naa.”

¹⁹ Bo pinoki ḻitúan-Nea in intau moantó tatua kon tudu in bonok. Bo naonda in ginamá-Nea in roti ḻima bo toyá doyowa tatua, iḷumangag in Sia kon ḷangit bo nomarakat. Bodongka nomonsi-monsig kon roti tatua bo inogoi kon murí-Nea mita pinoki silai kon i monia. Murí-Nea mita in nosilai magí mako kon intau moantó tua.

²⁰ Mosia komintan in nongaan dapot in nobotug. Onda intua sinipun mita in intau in ki agat in roti tatua; nosipun magí mopuḷúpa bodoyowá nokompé in nopuḻing.

²¹ Intau nongaan noyotakin dodai intua degá ḻimamai noribu in ḷoḷaki, diápa pinoyoiap in bobay bo mongoadí mita.

Ki Yesus minaya-mayá kon tudu in tubig

²² Onda intua ki Yesus ḷagi nopotabá kon murí-Nea mita sinumakoi kon uangga bo umuna kon i-Nia mayá in ḷoḷan, wakutu intua pinoki pobuian-Nea domandon in intau moantó tatua.

²³ Bo naonda intau mita tatua nobui, ki Yesus notakod kon buḷud bo nosambayang tontaní. Bo naonda in singgai nodoḷomdon dongkadon Sia tontaní in kon tua.

²⁴ Uangga inta sinakoian in murí-Nea mita ain noyayú kon pintad bo totokdon in dumpakon in bokoḷ, sin tompot moyodumpak.

²⁵ Degá jam intoḷuneadon modiug mobayag namangoidon in ki Yesus kon i monia takin minaya-mayá kon tudu in tubig.

²⁶ Naonda in murí-Nea mita nokoontong kon i-Nia minaya-mayá kon tudu in tubig, mosia noitaḻikokog bo poḷat nomaḷú, “Dimbuḷó intua!” mosia kopia kumarak sin moondok.

²⁷ Táe ki Yesus ḷagi noguman kon i monia, “Pokopoonow! Sin Akuoibí in naa. Dika moondok!”

²⁸ Bo ki Petrus in noguman, “Aka Iko bo totuu kon ki Yesus, yo oiníka in akuoi mamangoi kon ini-Mu mongin tudu in tubig.”

²⁹ Ki Yesus notubag, “Angoidon!” Dá ki Petrus noponag kon uangga, bo minayá kon i Yesus nongin tudu in tubig.

³⁰ Táe naonda in nokorasamai kon tompot nogirup, noondok in sia dá tumaḷom-tumaḷomdon in sia bo kinumarakdon in sia, “Tuhan, tuḷungaipa in akuoi!”

³¹ Dá siningkap i Yesus in ḻima-Nea, bo poḷat noguman kon i Petrus nanaa, “Ei intau inta diá totok mopirisaya. Nongonu sin moḻia-ḻiawbí in ginamu?”

³² Onda intua sinumakoidon in taya dua kon uangga bo tompot nogogaidon.

³³ Intau mita inta kon bonu in uangga nosumba kon i-Nia. Kai monia, “Totu-totuu kon Iko naa in ki Adíbí i Allah.”

Ki Yesus nongundam kon intau mita inta notakit kon Genesaret

³⁴ Naonda in noiyaputmaidon kon ḷoḷan mosia sinumubu kon ḻipú in Genesaret.

³⁵ Bo naonda intau mita kon tua nokotaaumai kon inta namangoi tua in ki Yesus dá pinotaa-taau mako monia kon ḻipú mita inta noyodiugmai kon tua. Bo komintan intau inta nongotakit dinia kon i-Nia.

³⁶ Mosia nopoigum sinbá ogoi-Nea in mosia moḻiai kon ubung in jubah-Nea. Komintan intau inta noroḻiai kon i-Nia, nongopia.