MATIUS 12 - Alkitab Singog In Mongondow Masa In Tanaa

Murí mita i Yesus nokoyut kon gandum singgai in Sabat

¹ Kon singgai in Sabat tobatú, ki Yesus takin murí-Nea noitaḻib kon gobá in gandum. Popisí in ginogoy in murí-Nea mita dá mosia nokoyut kon bungai in gandum bo kinaan.

² Nokoontongmai kon tua, intau mita in Parisi noguman kon i Yesus: “Indoiaika! Murí-Mu mita nogaid kon onu inta pinoton aidan kon singgai in Sabat.”

³ Táe ki Yesus in notubag, “Degá diápa kinobacaan monimu onu inta inaidan i Daud bo in intau inta dinumudui kon inia wakutu in mosia ginogoy?

⁴ Sia in sinumuot kon bonu in Baḷoi Tuhan; bo nokaan kon roti inta ain pinosumba kon i Allah, inta aka dumudui kon atorangnea yo tongábí imang in motaau mokaan kon tua, intau ibanea in diábí motaau.

⁵ Andeka diápa binaca monimu kon bonu in buk i Musa onu in taḷá inaidan in imang mita pomuḷoi in singgai in Sabat kon bonu in Baḷoi Tuhan, táe mosia in diábí pinotaḷá?

⁶ Akuoi moguman kon i monimu: kon tanaa oyúon in noiḻiu kon Baḷoi Tuhan.

⁷ Bá kotaauan monimu nanaabí in singog i Tuhan: Koibog-Ku in totabianbí deemanbí onu in pinosumba. Aka kuma bo komangaḻean monimu in tosingogon tatua, yo moiko in diábí mohukum kon intau inta diá kotaḷá.

⁸ Sin singgai in Sabat kon bonubí in kawasa i Adí Intau.”

Ki Yesus nongundam kon intau singgai in Sabat

⁹ Naonda in minayá nongkon tua, ki Yesus sinumuot kon baḷoi pososambayangan monia.

¹⁰ Kon tua oyúon intau tobatú inta ḻimanea tosimpaḷ minatoi, dá intau inta moibog motayak kon taḷá i Yesus in noḻibó kon i-Nia, “Degá motaau in mongundam kon intau aka singgai in Sabat?”

¹¹ Ki Yesus bui noḻibó kon i monia, “Aka kon sigad monimu bo oyúon kodomba tobatú, bo domba tatua in noḷabú kon bubú inta moonag kon tungkuḷ in singgai in Sabat; yo degá diánea bayáan gamáan bo poḷuai?

¹² Intaubí in moḷobe-ḷoben mangaḻenea aka poyobandingonmai in domba! Tuamai motaaubí in mogaid kon mopia kon singgai in Sabat.”

¹³ Bo ki Yesus in noguman kon intau tatua, “Tonggódon in ḻimamu!” Dá sinonggódon in intau tatua in ḻimanea, bo poḷatdon nopia. Ḻimanea tatua in nobaḻí ná ḻimanea tosimpaḷ.

¹⁴ Bo intau mita in Parisi iḷumuai komintan bo noyopakatdon kon moḻimod kon i Yesus.

Totabá inta piniḻí i Allah

¹⁵ Táe kinotaauan i Yesus in raian monia tatua, dá sinaḷáan-Neadon in tampat tatua. Nobayong in intau dinumudui kon i Yesus, bo inundaman-Nea in mosia komintan.

¹⁶ Táe Sia nogimaḷow sinbá diá potaa-taau mako monia intua kon intau ibanea.

¹⁷ Pinongin natua mobaḻídon in Pirman inta ain pinopoyaput i Nabi Yesaya, nanaa,

¹⁸ “Indoiaika, tua in simpaḷ-Ku inta piniḻí-Ku, Bo inta kinotabi-Ku, inta kinosanang in gina-Ku, Roho-Ku in ogoi-Ku kon i-Nia, bo sia in mopotaau in atorang kon bayongan intau.

¹⁹ Sia in diábí mobobayowan bo diábí doman kumarak, bo diábí dongogon in intau in singog-Nea kon daḷan mita.

²⁰ Aog inta nokoḷung diábí pongkóon-Nea, bo sumbu inta nokuyoyowdon dokotnea in diábí piongan-Nea. Modapot in atorang mita tatua aidan-Nea;

²¹ bayongan intau in mopoandoḷ mako in kamang kon i-Nia.”

Ki Yesus bo ki Beelzebul

²² Onda intua diniadon kon i Yesus in intau inta kinotoḷangan in dimukud moraat. Intau tatua bilog bo bobó sia inundaman i Yesus, dá nokosingog bo nokoontongdon.

²³ Dá nongoherang in intau mita kon tua, bo nosingog, “Sia naa degá inta ki Adí i Daud?”

²⁴ Táe naonda intau in Parisi nokodongog kon tua, mosia in noguman, “Sia naa nomaké in kawasa i Beelzebul, inta tongguḷu in dimukud mita moraat.”

²⁵ Táe kinotaauan i Yesus in raian monia tua. Manangka intua Sia nosingog kon i monia, “Pomuḷoi in dodatuan inta diá notobatú yo motantú bidon kon moputúbí bo pomuḷoi in kotá andeka motoḷuadí inta diá motobatú, diábí mononoi.

²⁶ Ná doman tua aka Ibilis moguntun kon Ibilis; yo sia in diádon notobatú, bo sia in nomaḷawang domandon kon inia tontaní, aka natua, yo naondabí in mononoi in dodatuannea tatua.

²⁷ Aka Akuoi bo moguntun kon dimukud moraat momaké in kawasa i Beelzebul. Yo aka natua kawasa i ine in pinaké in dumoduduimu mita moguntun kon dimukud mita moraat. Bá kotaauanmudon, mosiadon tua in moponiata kon noitaḷádon in moiko!

²⁸ Táe aka Akuoi moguntun kon dimukud moraat takin nomaké in kawasa Roho i Allah. Yo tua in mangaḻenea ki Allah aindon namangoi nomarenta kon i monimu.

²⁹ Naondabí in intau mokotuot kon baḷoi in tobatú intau moropot bo mogagow kon kapunyaannea, aka diá munanea togoton in intau moropot tatua? Tantú bambí mopaḷut mako togotonnea in intau moropot tatua bodongka kotuotannea in baḷoi tatua bo mogagow kon kapunyaannea.

³⁰ Ki ine in diá noyotakin-Ku, sia in momaḷawang kon i-Nakó. Bo ki ine inta doí mogaid moyotakin-Ku yo sia tua in momoguyaat kon tomayá-Ku!

³¹ Manangka intua poguman-Ku kon inimu, aka intau mogaid kon dosa bo moningkuḻe kon i Allah, yo motaaupabí ampungan! Táe aka moningkuḻe kon Roho i Allah, yo diábí ampungan in sia!

³² Bo aka intau mosingog kon pomaḷawang kon Adí Intau, sia in ampunganpabí, táe aka sia bo momaḷawang kon Roho i Allah, yo sia in diábí motaau ampungan in tanaa mako andeka kon aherat!”

Pangkoi bo bungainea

³³ “Aka pangkoinea bo kai in monimu mopia, yo bungainea in mopiabí doman. Tongá aka pangkoinea, kai monimu bo diá mopia, dá diá doman mopia in bungainea. Sin bungaineabí tua in ponandaan kon pangkoinea.

³⁴ Ei moiko buí inta moromú, naondabí in moiko motaau mosingog kon soaḷ mita inta mopia aka moiko tontaní in mogaid doman kon inta diá mopia? Sin onu siningog in bibig tuabí doman inta iḷumuai nongkon bonu in gina!

³⁵ Intau inta mopia mosingog doman kon inta mopia sin ginanea nopuḻing doman inta mopia. Bo intau inta moraat in ginanea in nopuḻing doman inta moraat.

³⁶ Táe poguman-Ku kon i monimu; Pomuḷoi in singog inta diá in mangaḻenea inta aindon siningog in intau yo musti tubagannea kon singgai pohakiman.

³⁷ Sin singogmubí tua in monantú mongo iko kotaḷá andeka diá, bo iko in hukumon podudui in singogmu tontaní.”

Tanda i Yesus

³⁸ Kon wakutu intua tongonumai degá in intau mototundú kon agama bo intau mita in Parisi noguman kon i Yesus, “Guru, kami in moibog moindoi kon tobatú tanda nongkon ini-Mu.”

³⁹ Táe ki Yesus notubag kon i monia, “Intau masa in naa in moraatbí bo inta doí dumudui kon onu inta ain pinoguman, mosia in moibog monuntut kon tanda. Táe mosia in diábí ogoian koḻikudbí in tanda i Nabi Yunus.

⁴⁰ Sin naonda in ki Yunus toḷu nosinggai bo toḷu nogobii kon bonu in sian in toyá, yo natua doman in ki Adí Intau in mogutun kon gantog in butá toḷu nosinggai bo toḷu nogobii.

⁴¹ Kon singgai pohakiman, intau mita in Niniwe morobangon bo moyotakin in intau mita masa in naa mohukum kon i monia. Sin intau mita in Niniwe naonda in nokodongog kon inta pinoyaput i Yunus, mosia in nogogai in nogaid kon dosa mita. Bo tanaa inta sinimindog mako noiḻiubí kon i Yunus!

⁴² Kon wakutu in Pohakiman, bokí nongkon dotá in Toḷatan mobangon moyotakin in intau masa in naa bo tumakin doman mohukum. Sin bokí tatua in namangoi nongkon popod in dunia sin mokidongog kon totundú i Salomo. Táe kon naa inta sinimindog mako in noiḻiubí kon i Salomo!”

Dimukud moraat mobui mangoi

⁴³ Aka dimukud moraat iḷumuai nongkon intau, yo sia i maya-mayá mako in tampat inta noingkag sin motayak kon pogogaiannea. Táe diá nokouḻí in sia.

⁴⁴ Dá sia mosingog nanaa: “Akuoi in buidon mayá in baḷoi inta ain sinaḷaankumai. Bo minayá in sia, kinobayáanneamai in baḷoi tatua diádon in tombonunea, kinaitandon kinodarit bo sinoinutdon kino tompira.

⁴⁵ Sia in bui minayá bo nogoiní kon pitu in dimukud inta noiḻiu kon koraatnea bo sinumuot in mosia mogutun kon intau tatua. Dá pangabisannea kaadaan in intau tatua noiḻiudon raat nongkon inta muna. Natua doman in mobaḻí kon intau mita moraat masa inta naa.”

Ki iná bo ki utat mita i Yesus

⁴⁶ Wakutu in ki Yesus koyogotpa moyosingog takin intau moantó tatua, ki iná bo ki utat-Nea mita ain sinimindog kon ḷuai bo moḷongasi mokipodungkuḷ kon i-Nia.

⁴⁷ Dá oyúon tobatú intau in noguman kon i-Nia, “Pak Guru, ki iná bo ki utat mita i Pak Guru tua kon ḷuai bo moḷongasi mokipodungkuḷ kon ini-Mu.”

⁴⁸ Táe tubag i Yesus kon intau inta nopoyaput in habar tatua, “Ki ine in ki iná-Ku? Bo ki ine in ki utat-Ku?”

⁴⁹ Takin kotundu-tundú kon murí-Nea mita, Sia in noguman, “Naa in ki iná-Ku bo ki utat-Ku mita!

⁵⁰ Sin ki inekabí inta mogaid kon inta kinoibog i Amá-Ku kon soroga, yo sia tua in ki utat-Ku mita ḷoḷaki, bo ki utat-Ku bobay, bo sia in ki iná-Ku doman.”