MATIUS 11 - Alkitab Singog In Mongondow Masa In Tanaa

Ki Yesus bo ki Yohanes Mobobaptis

¹ Naonda in ki Yesus nopaḷut nopoyaput in koyow tatua kon murí-Nea mita tatua, nobuatdon in Sia nongkon tua bo minayá nobogoi in topotundú poḷat nopotaau in Habar Mopia kon bonu in kotá mita monia.

² Ki Yohanes inta kon bonu in ponjara aindon nokodongog kon onu in inaidan i Kristus,

³ dá nopotabádon in sia kon murínea mita noḻibó kon i-Nia nanaa: “Degá Ikodon naa in intau inta mamangoi podudui in dandi i Allah, andeka mogoḷatpa degá bui in kami kon intau ibanea?”

⁴ Dá ki Yesus in noguman kon i monia, “Bayádon bo poguman kon i Yohanes onu inta ain dinongog bo inontong monimu.

⁵ Moiko ain nokoontong: intau bilog mokoindoi, intau ḻempeng mokobayá, intau pinanyaki kuḻit inta mokorongó nopia, intau bongoḷ mokodongog, intau minatoi in nobangon bo Habar Mopia pinoyaput kon intau mita bogá.

⁶ Pia in kamang in intau inta totu-totuu mopirisaya kon i-Nakó.”

⁷ Naonda in murí mita i Yohanes nobui, ininsilangandon i Yesus kon intau moantó tatua mongo ki ine in ki Yohanes, kai-Nia: “Onubí in mangaḻenea moiko mayá in padang gurun? Degá moindoi kon bonok inirup in tompot pouik-pountag?

⁸ Andeka moiko mayá mongonu? Degá moindoi kon intau inta nogiḷambung mogaga? Intau inta nogiḷambung mogaga tampatnea kon dodatuanbí.

⁹ Dá degá onu mangaḻe in bayáan monimu? Moindoi degá kon nabi? Totuu! Poguman-Ku kon i monimu, sia tua in noiḻiubí kon nabi.

¹⁰ Sin sia tua inta ain pinais kon bonu in Buk Motusi nanaa: Indoiai, Akuoi ain nopotabá mangoi kon totabá-Ku umuna kon ini-Mu, sinbá sia in momontang kon daḷan bayáan-Mu.”

¹¹ Poguman-Ku kon inimu: “Kon sigad monia inta pinolahir in bobay diápabí kon dodai in onda in ná kokokawasa i Yohanes Mobobaptis tongá inta inanggap in intau moompá kon bonu in dunia mobagu i Allah, kawasa-Nea in noiḻiu kon i Yohanes.

¹² Pinangkoipamai ki Yohanes Mobobaptis nopotaau in habarnea noiyaput in tanaa, umat i Allah totok in bayowan in intau mita inta moḷongasi mongawasa kon tua takin aid diá mopia.

¹³ Nodapot in kinoangoian i Yohanes, bayongan in hukum i Musa bo totundú in nabi mita nopotaaudon muna kon onu mita inta musti mobaḻí.

¹⁴ Bo aka moiko moibog mopirisaya, yo ki Yohanes tuata in ki Elia inta koangoiannea in pinotaaudon muna.

¹⁵ Aka oyúon in bongoḷan, yo pokidongog.

¹⁶ Onu degá in motaau-Ku popoumpamaan kon intau masai naa? Mosia tua in naonda bo mongoadí mita inta ḻimitú mako kon pasar inta momaḷú kon yobayat mita monia ibanea.

¹⁷ ‘Podondongan nami in moiko in dondong mokopia kon gina, táe doíbí in moiko motayok, podondongan nami in dondong mokopongoibu, táe doíbí in moiko mongombaḷ.’

¹⁸ Ki Yohanes namangoi, sia in nopuasa bo diá nonginum kon anggur, táe kai monimu sia in kinotoḷangan in dimbuḷó.

¹⁹ Onda intua Adí Intau namangoi, Sia nongaan bo nonginum kon anggur, táe kai monimu, ‘Indoiaika, Sia in intau! Moturá bo yobayat in moigum kon pajak bo intau inta baradosa.’ Táe kawasa i Allah pinoponiata kon i-Nia.”

Kotá mita in intau inta diá mopirisaya

²⁰ Ki Yesus nomangkoidon noningkuḻe kon kotá mita inta mokakit pomiaan-Nea kon inta mokoherang. Popisí in intau mita kon kotá mita tatua doí mogogai in mogaid kon dosa mita monia.

²¹ Ki Yesus noguman, Koboditodon iko Korazim! Koboditodon iko Betsaida! Sin aka intau in Tirus bo Sidon in nokoontong kon soaḷ mita inta mokoherang inta ain nobaḻí kon yua-yuak monimu, yo noonggotdon in mosia in nogogai nogaid kon dosa mita monia takin nomaké in ḷambung kinopatoian.

²² Tongá pokotoropdon, “Kon singgai pohakiman, hukuman kon intau mita in Tirus bo Sidon in mogaa-gaan nongkon hukuman kon i monimu.

²³ Bo iko Kapernaum, degá kainimu kamai iko in diaanbí mamonik in ḷangit? Diápa, sedang bo moiko in pogonagbí kon naraka! Sin aka soaḷ mita inta mokoherang inta ain nobaḻí kon yua-yuak monimu bo nobaḻí kon Sodom, yo kotá tatua in umuranpabí oyúon nodapot in masa in naa.”

²⁴ Manangka intua poguman-Ku kon i monimu: “Kon singgai in pohakiman, hukuman kon intau mita in Sodom in mogaa-gaan nongkon hukuman kon i monimu.”

Angoi kon i-Nakó

²⁵ Kon wakutu intua nosambayang in ki Yesus kai-Nia: “Akuoi in mopoyaput in sukur kon ini-Mu, Amá, Tuhan in ḷangit bo butá, sin bayongan intua binuni-Mu kon intau mita inta mobijaksana bo kon intau mopandoi, táe pinoponiata-Mu kon intau inta moyangkó.

²⁶ O, Amá, tuata in kinosanang-Mu.”

²⁷ Bo ki Yesus in noguman, “Bayongan yagi-yagi inogoi i Amá kon i-Nakó, bo diá doman tobatúmai in nonotaau kon Adí koḻikudbí in ki Amá, bo diá doman tobatúmai intau in nonotaau kon i Amá kuḻikudbí in Adí bo intau inta kinoibog in Adí popoontongan.

²⁸ Angoidon kon i-Nakó, moiko komintan inta mongoḷopí, bo intau inta kopota-potaan in mosibuḷ, sinbá ḷuatan-Kudon intua kon i monimu.

²⁹ Aidaidon onu inta pinoki aid-Ku kon inimu, bo duduidon kon oaid-Ku, mokopoompá kon dodia bo mokopoaḷus kon pososingog, dá iko in mokodungkuḷ kon kopiaan.

³⁰ Sin parenta inta pinoguman-Ku in mopia, bo inta pinoki aid-Ku in diábí mororiga.”