MATIUS 10 - Alkitab Singog In Mongondow Masa In Tanaa

Ki Yesus nogoiní kon rasuḷ mopuḷú bodoyowá

¹ Ki Yesus in nogoiní kon murí-Nea inta mopuḷú bodoyowá tua bo nobogoi in kawasa kon i monia sin poguntun kon dimukud mita moraat bo pongundam kon bayongan takit bo roriga.

² Naa in tangoi monia mopuḷú bodoyowá tua: Ki Simon (inta dinonoi ki Petrus) bo ki Andreas ki utatnea, ki Yakobus ki adí i Zebedeus bo ki Yohanes ki utatnea.

³ Ki Pilipus bo ki Bartolomeus, ki Tomas bo ki Matius inta mononagi kon pajak, ki Yakobus ki adí i Alpeus, ki Tadeus;

⁴ ki Simon intau in Zelot bo ki Yudas Iskariot inta nomaḻidawan kon i Yesus.

Oaidan in rasul mita

⁵ Taya mopuḷú bodoyowá tua pinotabá-Nea takin koyow nanaa: “Donaai moiko mayá in ḻipú in intau ibanea inta deeman Yahudi. Andeka mayá in ḻipú intau in Samaria.

⁶ Táe bayádon kon intau mita in Israel, inta nongoiḷaḻe.

⁷ Bayádon bo poguman, kon ki Allah in ḷagidon mamangoi momarenta saḷaku Datu.

⁸ Undamaidon in intau notakit; biagdon bui in intau minatoi; undamai doman in intau inta pinanyaki kusta, bo untun in dimukud mita moraat. Naa komintan in inogoi pinonotabi kon i monimu. Manangka intua yo ponotabi domandon.

⁹ Donaaidon in moiko modia kon buḷawan, saḷaka andeka tambaga.

¹⁰ Donaai in moiko mobaḷun kon binayáan, donaaidon modia kon ḷambung doyowa no par, aip in sioḷ andeka tungkud, sin intau inta mogaid patusbí motarima kon boḻi in pinogaidannea.

¹¹ Bo aka moiko mayá in tobatú kotá andeka ḻipú, yo potayak muna kon intau inta moibog motarima kon i monimu. Pogutundon kon tua modapot in moiko mobui.

¹² Bo aka moiko tumuot kon baḷoi intau, yo singog in nanaa, ‘Igumon mako barakatan i Tuhan in moiko.’

¹³ Aka tarimaan monia, yo salammu tatua mobaḻí barakat kon i monia. Táe aka diá tarimaan monia, yo barakatnea in mobui kon inimu.

¹⁴ Bo aka oyúon intau doí motarima kon i monimu bo doí doman mokidongog kon singogmu, yo ḷuai bo taḷaaidon in baḷoi bo kotá tatua bo topirai in ḷobud kon sioḷmu.

¹⁵ Pogumanku kon i monimu! Kon singgai pohakiman, intau mita in Sodom bo Gomora in mogaa-gaan in hukumannea nongkon intau mita tatua!”

Pomogutúan kon singgai moiduduimai

¹⁶ “Tagú totok kon gina in singog-Ku: Akuoi in mopotabá kon i monimu, naonda bo domba dinia kon yua-yuak in serigala. Manangka intua mokopoingat totok naonda bo uḷag bo mokopotuḻid kon gina naonda bo ḷagapan paḷoma.

¹⁷ Táe mokopoingat, sin oyúon in moposarakan kon i monimu kon itoi mita in agama. Bo sikisaan monia in moiko kon baḷoi pososambayangan.

¹⁸ Moiko in diaan kon tayow in pongawasa mita bo datu mita popisí moiko in dumodudui-Ku. Bo tuata in kasampatanmu mobogoi in kosakusian soaḷ Akuoi kon i monia bo kon intau mita inta diá nonotaau kon i Allah.

¹⁹ Táe aka moiko diaan sin adilon, yo donaaidon mohawatir bo momikir kon onu in singogon monimu kon tayowon monia. Sin komintan tua, in ogoi bidon kon i monimu aka wakutuneadon.

²⁰ Sin deeman bidon moiko in mosingog, táe Rohobí i Amámu in mosingog kon bonu in ginamu.

²¹ Bo nanaa in mobaḻí: Intau mita moposarakan kon i utatnea sin pokiḻimod. Aid natua in pomiaan doman in guyanga kon i adínea. Bo adí in monayowdon kon i iná bo i amánea, bo posarakannea sin ḻimodon.

²² Moiko in saturuon in bayongan intau sin moiko in murí-Ku. Táe ki ine in mokotahang modapot in kopaḷutannea, sia tua in mosaḷamat.

²³ Aka moiko pogutúon monia kon tobatú kotá, yo poḷaguidon kon kotá ibanea. Sin poguman-Ku kon i monimu: Kon wakutu in diápa modait monimu kobayáan in ḻipu-ḻipúannea kon Israel, yo ki Adí Intau in namangoidon bui.

²⁴ Diábí in murí moiḻiu kon gurunea, andeka simpaḷ moiḻiu kon i tuangnea.

²⁵ Mobaḻídon aka tobatú murí motongkai in gurunea, andeka simpaḷ bo motongkai i tuangnea. Aka ki togi baḷoi bo tangoion ki Beelzebul, yo bambíkabí tombonu in baḷoinea tua.”

Kotoguondokbí kon i Allah

²⁶ “Manangka intua donaaidon moiko moondok kon i monia. Sin diábí in tobatúmai inta noiḻingkop, in diá bukatan, bo diábí doman in tobatúmai inta noibuni in diá popotaau.

²⁷ Onu inta pinoguman-Ku kon i monimu kon dodai in doḷom musti buion monimu poguman dodai in singgai mobayagdon, bo onu inta pinogombong kon bongoḷanmu, yo popotaaudon kon bayongan in intau!

²⁸ Bo donaaibí moondok kon i monia inta moḻimod kon awak, táe diá inogoian in kawasa morabut kon nyawa. Kotoguondokbí kon i Allah inta kokawasa moḻimod kon awak bo morabut kon nyawa kon bonu in naraka.

²⁹ Ḷagapan dui-duit doyowa boḻinea moyakag totok. Táe umpaka natua yo diábí tobatúmai in ḷagapan mita tatua in moḷabú kon butá aka deeman ibog i Amámu kon soroga.

³⁰ Bá kotaauan monimu, kon bayongan buok kon uḷumu kinotaauan-Neabí in kobayongnea.

³¹ Manangka intua donaaibí in moiko moondok. Sin moikobí in momaha-mahaḷ in ḷagapan dui-duit mita tatua!”

Ki Yesus akúon kon tayowon intau mobarong

³² “Ki ine in diá mooyá in mongaku kon tayowon in intau moantó kon sia in dumodudui-Ku, yo sia in ḷabiton-Ku doman kon tayowon i Amá-Ku inta kon soroga.

³³ Táe ki ine in momayow kon tayowon intau mobarong kon sia in dumodudui-Ku, yo sia in bayowan-Ku doman kon tayowon i Amá-Ku inta kon soroga.”

Ki Yesus mamangoi mopoyotondí

³⁴ “Dikabí kon raionmai monimu Akuoi naa in mamangoi modia kon dodamean kon dunia naa. Akuoi in namangoi deemanbí modia kon dodamean, táe modiabí kon ropatoi.

³⁵ Akuoi in mamangoi mopoyotondí kon adí ḷoḷaki nongkon i amánea, adí bobay nongkon i inánea, mototaka bobay nongkon i guyánea.

³⁶ Tobaḷoian tua mobaḻí mogogimpongan.

³⁷ Ki ine in motabi kon i amánea andeka kon i inánea moiḻiu kon tabinea kon i-Nakó sia tua in diá patus mobaḻí dumodudui-Ku. Natua doman ki ine in motabi kon i adínea ḷoḷaki andeka bobay bo moiḻiu kon tabinea kon i-Nakó, sia doman tua in diá patus mobaḻí dumodudui-Ku.

³⁸ Bo ki ine in doí momotaan kon kayu pinoyotaḻempang bo dumudui kon i-Nakó, sia doman tua in diábí patus mobaḻí dumodudui-Ku.

³⁹ Bo ki ine in moramuji mobiag yo sia in matoi, táe ki ine in matoi sin dinumudui kon i-Nakó, yo sia in mosaḷamat.”

Barakat in oaid mopia

⁴⁰ “Ki ine in notarima kon i monimu, sia tua in notarima doman kon i-Nakó. Bo ki ine in notarima kon i-Nakó, sia in notarima doman kon i-Nia inta nopotabá kon i-Nakó.

⁴¹ Ki ine in notarima kon tobatú nabi saḷaku nabi. Bo sia in motarima doman kon barakat in nabi, bo ki ine in motarima kon intau inta mobanar saḷaku intau mobanar, yo sia in motarima doman kon barakat in intau mobanar.

⁴² Bo ki ine in mobogoi in tubig noanai inumon, umpakabí tongá topalo kon intau inta bogá naa, sin sia in dumodudui-Ku, poguman-Ku kon i monimu, popirisayabí kon sia tua in mokouḻíbí kon boḻi in pinogaidannea!”