MARKUS 7 - Alkitab Singog In Mongondow Masa In Tanaa

Adat in Mogoguyang

¹ Tokolompok intau in Parisi bo mototundú mita kon agama nongkon Yerusalem, namangoi kon i Yesus.

² Mosia in nokoontong kon tongonumai in murí i Yesus in nongaan táe diá muna nonomok, ná inta kon atorang in agama.

³ Intau mita in Parisi bo Yahudi totok in motoindudui kon adat in mogoguyang monia. Mosia in diápabí mongaan aka diápa monomok podudui in atorang inta ain sinantú.

⁴ Onu in taḷuion kon pasar diápabí kaanon, aka diápa batáan muna. Nobayongpa doman in atorang nongkon mogoguyang monia inta umuranpa totok kinadaian monia; umpamanea atorang moyuyuk kon galas, palo, bo pakakat mita inta nongkon tambaga.

⁵ Manangka intua intau mita in Parisi bo mototundú mita kon agama in Yahudi noḻibó kon i Yesus, “Nongonu sin murí-Mu mita nongaan táe diá muna nonomok? Nongonu sin diábí in mosia dumudui kon adat in mogoguyang naton?”

⁶ Ki Yesus in notubag, “Ei moiko intau mita mongomunapik! Noitutui totok in onu inta ain pinotaau muna i Nabi Yesaya soaḷ moiko, inta pinais nanaa, ‘Nanaa in singog i Allah, Intau mita tatua mosumba kon i-Nakó, tongábí kon singog, táe gina monia in noyayúbí kon i-Nakó.

⁷ Diá in mangaḻe in posumbaan monia kon i-Nakó, aka atorang intau yo tundúon monia naonda bo atorang-Ku intua!’

⁸ Parenta mita i Allah in toḻikudan mita monimu, bo atorang mita intau tua in kadaian totok monimu.”

⁹ Bo nanaa doman guman i Yesus kon i monia, “Moiko in mopandoi totok monoḻikud kon parenta i Allah sinbá motaau moḷukad kon adat monimu tontaní.

¹⁰ Ki Musa in nobogoidon in parenta nanaa, ‘Horomatdon in ki amá bo ki inámu,’ bo ‘Ki ine in moposingo-singogmai kon i amá ande kon i inánea, musti hukumon matoi.’

¹¹ Táe moiko in motundú nanaa: Aka intau moguman kon guyanganea, ‘Onu i musti ogoiku kon i amá bo kon i iná, ain bidon pinosumbaku kon i Allah,’

¹² dá pobebasondon monimu in intau tatua nongkon kowajibannea motuḷung kon i amá bo kon i inánea.

¹³ Dá totundú monimu tatua kon intau mita tuadon in monginggamá kon tosingogon i Allah. Nobayongpa doman in soaḷ naníon in inaidan monimu.”

Inta mokokotor kon intau

¹⁴ Bo ki Yesus nogoiní kon intau mobayong tatua bo noguman bui kon i monia, “Indongogai sinbá komangaḻean monimu!

¹⁵ Deemanbí inta kinaan intau in mokonajis, táe inta iḷumuaibí nongkon bibig in mokonajis kon inia. [

¹⁶ Dá aka kobongoḷan yo pokidongog.]”

¹⁷ Naonda in nonaḷámai in ki Yesus kon intau moantó tatua bo sinumuot kon baḷoi, murí-Nea mita in noḻibó kon i-Nia mongo onu in mangaḻe poumpamaan tatua.

¹⁸ Dá ki Yesus in noguman, “Dá umpaka yo diápa doman komangaḻean monimu? Umpaka yo diá komangaḻean monimu kon inta kinaan in diábí mokonajis kon intau?

¹⁹ Sin inta kinaan tua in diábí nongin gina, táe nongin sianbí bodongka bui moiḷuai.” Singog mita i Yesus tatua noponiatabí kon bayongan kokaanon in motaaubí kaanon.

²⁰ Ki Yesus in noguman bui, “Inta iḷumuaibí kon intau in mokokotor kon inia.

²¹ Sin inta nongkon bonubí in gina, inta nomuká nongkon raian mita inta moraat in mokopopisí kon intau mogaid kon inta mokooyá ná, monakow, moḻimod,

²² monuaḻing, monguboḷ, moponapud in diá totuu, bo mogaid kon bayongan inta moraat, modunia, diá koendar, mointoi, mokaḷakuang, bo moyoyiga didikon.

²³ Bayongan inta moraat tua in momuká nongkon bonu in gina, bo tuabí in mokonajis kon intau.”

Pirisaya in tobatú bobay

²⁴ Onda intua ki Yesus nonaḷámaidon kon tampat tatua, bo minayá in ḻipú inta kon diug in Tirus. Sinumuot in Sia kon tobatú baḷoi, bo ibogon-Nea in diá kotaauan intau kon Sia in kon tampat tatua. Táe diá notaau nogadop in Sia.

²⁵ Tobatú guyanga bobay, inta ki adínea bobay kinotoḷangan in dimukud moraat, ain nokodongog kon soaḷ ki Yesus tua. Sia in namangoi sinumungkud kon tayowon i Yesus,

²⁶ bo poḷat nopoigum sinbá ki Yesus in moguntun kon dimukud moraat nongkon adí tatua. Guyanga tatua deemanbí intau in Yahudi, sia tua nongkon butábí in Penisia kon Siria.

²⁷ Dá ki Yesus in noguman kon inia, “Adíbí mita in musti muna pokaanon, sin diábí mopia aka mogamá kon kaanon in adí mita bo ogoi kon ungku.”

²⁸ Dá kain bobay tatua doman, “Tuang, ungku mita inta kon siup in meja mokaanbí doman kon muyo-muyok in kaanon inta iḷabú in mongoadí tatua!”

²⁹ Ki Yesus in noguman kon inia, “Popisí in natua in tubagmu, dá pobuidon, dimukud moraat iḷumuai bidon nongkon i adímu!”

³⁰ Dá nobui domandon in guyanga bobay tatua. Kobayáanneamai kon baḷoi, nosiugdon mako in ki adínea kon tosiugannea bo dimukud moraat in totu-totuudon iḷumuai nongkon adí tatua.

Ki Yesus nongundam kon intau bongoḷ bo bobó

³¹ Onda intua ki Yesus nonaḷámaidon kon butá in Tirus, bo nongingguput kon bobayáan-Nea nongin Sidon nopobayá in Danow Galilea. Sia in nomiḻí kon daḷan nongin daerah inta sinangoian “Kotá Mopuḷú.”

³² Kon tua, oyúon intau in namangoi kon i Yesus takin nodia kon tobatú intau bongoḷ bo bobó. Pinoigum monia kon i Yesus sinbá popoukat-Nea in ḻima-Nea kon uḷu intau tatua.

³³ Intau bongoḷ bo bobó tatua dinia i Yesus pinotontaní kon intau nobayong bo pinobonunea in gongguyamú in ḻima-Nea kon bongoḷan in intau tatua, onda intua nonduyá in Sia bo iyapu-Nea in dilá intau tatua.

³⁴ Nopaḷut mako kon tua iḷumangag kon ḷangit in ki Yesus bo nogina noropot poḷat noguman kon intau tatua, “Epata,” mangaḻenea, “Kobukatdon!”

³⁵ Bongoḷan intau tatua nobukat bo noḷukó domandon bui in dilánea bo notaaudon sia nosingog.

³⁶ Bo ki Yesus nolarang kon i monia komintan in mongonguman kon soaḷ tatua kon i ineka. Táe námai tua in pololarang i Yesus, táe námai tua doman in poposiar magí-mako monia.

³⁷ Bo bayongan intau inta nokodongog kon tua moherang totok. Mosia noguman, “Tua komintan inaidan-Nea notompia! Nodapot in binaḻí-Nea intau bongoḷ nokodongog bo intau bobó nokosingog!”