MARKUS 5 - Alkitab Singog In Mongondow Masa In Tanaa

Ki Yesus nongundam kon intau inta kinotoḷangan dimukud moraat

¹ Noiduduimai kon tua ki Yesus bo murí-Nea mita noiyaputdon kon ḷoḷan in Danow Galilea, kon butá in Gerasa.

² Natua in ponag i Yesus kon uangga, Sia inangoian in tobatú ḷoḷaki inta nongkon angob mita poḷoḷobongan.

³ Intau tatua kinawasa in dimukud moraat bodongka tantú mogutun kon poḷoḷobongan mita. Sia in diádon kotogotan, umpakabí rante uatoi.

⁴ Sin mokakitdon tokigonmai in rante, táe tantúnea bo botowon in rante inta potogot tatua, bo uatoi inta pinoumantungan kon inia putoḷonnea. Moropot totok in sia dá diá tobatúmai intau in mokodomok kon inia.

⁵ Doḷom singgai in sia modondaḷoi kon poḷoḷobongan bo kon buḷu-buḷudannea, sindaḷan kumarak bo awaknea in tongkekebannea in batu.

⁶ Naonda in inontongnea in ki Yesus nongkon moyayú, noribatuk in sia namangoi bo sinumungkud kon tayowon i Yesus.

⁷ Bo nomaḷú noropot, “Yesus, Adí i Allah inta Totok in Moḷantud! Onuon-Mu in akuoi ná? Podoyon kon tangoi i Allah, akuoi mopoigum kon ini-Mu, donaai rorigaan in akuoi!” (

⁸ Intau tatua in noguman natua sin ki Yesus noguman kon inia, “Ei dimukud moraat, ḷuaidon iko nongkon intau tanaa!”)

⁹ Ki Yesus in noḻibó kon inia, “Ki ine in tangoimu?” Tubagnea, “Tangoiku ‘ki Legion’ sin mobarong totok in kami!”

¹⁰ Sia in umuran mopoigum sinbá diá potabá i Yesus in sia ḷumuai nongkon butá tatua.

¹¹ Dodai intua, kon oyukmai in buḷud kon tua nobayong boké inta koyogot motayakmai kon kaanonnea.

¹² Dimukud mita moraat tatua in nopoigum kon i Yesus, “Pokituotaidon in kami kon boké mita tatua.”

¹³ Bo inóoan i Yesus. Dá dimukud moraat mita tatua iḷumuai kon intau tatua bo minayá sinumuot kon boké mita tatua. Bo paanan in boké – inta degá doyowamai noribu in kobayongnea tua, komintan iḷumanduk kon pompang in danow tatua bo noḷomot.

¹⁴ Moḷoḷukad mita kon boké tatua, noḷagui bo minayá nopotaau in habar tatua kon kotá bo kon ḻipú mita inta kon diugneamai. Dá intau mita iḷumuai sin moindoi kon onu inta nobaḻí.

¹⁵ Mosia in namangoi kon i Yesus, bo inontongdon monia intau inta koina kinotoḷangan in dimukud moraat tatua, iḻimitúdon mako kon tua, ain nogiḷambung bo noratakdon in raiannea. Dá noondokdon in mosia komintan.

¹⁶ Intau mita inta ain nokoontong tontaní kon bayongan inta nobaḻí kon intau tatua bo kon boké mita, nongonguman kon inta ain nobaḻí mita.

¹⁷ Bo intau mita kon butá tatua nopoigum kon i Yesus sinbá monaḷámaidon kon tampat tatua.

¹⁸ Wakutu in ki Yesus tumakoidon kon uangga, intau inta koina kinotoḷangan in dimukud moraat, nopoigum kon i Yesus sinbá ogoi doman dumudui in sia.

¹⁹ Táe ki Yesus in noguman kon inia, “Pobuidon bo potaaudon kon i utatmu mita bo kon ginaḷummu mita in bayongan inta inaidan i Tuhan kon inimu, bo ki Tuhan in mopia totok kon inimu!”

²⁰ Dá minayá domandon intau tatua, bo nomangkoidon nopotaau kon daerah mita inta sinangoi, “Kotá Mopuḷú.” Sia nopotaau kon onu inta ain pinomia i Yesus kon inia. Bayongan intau nongoherang nokodongog kon inia.

Ki adí i Yairus – bobay inta noḻiai kon jubah i Yesus

²¹ Ki Yesus minayá bui kon ḷoḷan in danow. Kon bingkí in danow tatua nobarong totok in intau in namangoi noyoḻipung kon ḻibumai Yesus.

²² Kon bingkípa in danow tatua in ki Yesus, indoianmai yo namangoidon in tobatú intau, ki Yairus in tangoinea. Ki Yairus naa in tobatú itoi kon baḷoi pososambayangan kon kotá tatua. Naonda in noyodungkuḷ i Yesus sinumungkud in sia kon tayowon-Nea,

²³ bo totok in nopoigum nanaa kon i Yesus, “Pak Guru, ki adíku bobay notakit moyoyiga. Poigumonku ki Pak Guru mamangoipa moḻiai kon inia sinbá mopia bo diápa matoi!”

²⁴ Dá minayá in ki Yesus noyotakin i Yairus. Mobarong totok intau in sinumakin kon i-Nia, oyúon kon tumi, kon muna, kon koḷoigi, kon koḷanan moyo-moyogundud.

²⁵ Kon sigad monia tua oyúon doman in tobatú bobay inta ain mopuḷú bodoyowá notaong notakit toḷoganmai in dugú aka angoionnea.

²⁶ Bayongan kapunyaannea noitaḷuidon komintan sin pokiundaman kon i dokter, táe diá in mokopia, sedang bo tongábí modugang moyoyiga.

²⁷ Bobay tatua mokakitdon in mokodongog kon ouman soaḷ ki Yesus. Dá kon yua-yuak intau moantó tatua, sia moḷongasi dimiug kon i Yesus nongkon tumi,

²⁸ sin naa in koraiannea, “Tongákabí koḻiaianku in jubah-Nea, yo mopiabí in akuoi!”

²⁹ Sia noḻiai kon jubah i Yesus, bo dodaipa doman intua nogogai in dugú bo kinorasaannea kon nopiadon in sia.

³⁰ Táe kon dodai doman tatuata kinorasaan i Yesus kon oyúon in ropot iḷumuai nongkon i-Nia. Dá Sia in nobobui kon intau mobarong tatua bo noḻibó, “Ki ine in noḻiai kon jubah-Ku?”

³¹ Dá murí-Nea mita in noguman, “Inontongbí i Pak Guru in koantó in intau mita tanion. Yo ḻibóonpa doman i Pak Guru mongo ki ine in noḻiai kon i Pak Guru?”

³² Táe ki Yesus in umuranpa doman nobobui magí-mako motayak kon intau inta noḻiai kon i-Nia.

³³ Bobay tatua inta nokotaaudon kon onu in nobaḻí kon inia tua, takin urot mako sin ondok, sia in namangoi sinumungkud kon tayowon i Yesus bo nongaku kon tua komintan.

³⁴ Dá ki Yesus in noguman kon bobay tatua, “Adí-Ku, popisí in iko bo mopirisaya kon i-Nakó dá nopia in iko! Bayádon takin saḷamat, iko in totu-totuudon nopia!”

³⁵ Koyogotpa in ki Yesus nongonguman, indoianmai namangoidon in tongonumai intau totabá nongkon baḷoi i Yairus. Mosia in noguman kon i Yairus. “Ki adí bobay i tuang minatoidon, dá donaaidon ki tuang mokiposusamai kon i Pak Guru.”

³⁶ Táe diábí pinandungmai i Yesus onu in pinoguman in intau mita tatua. Sia in noguman kon i Yairus, “Dika moondok, popirisayabí!”

³⁷ Bo minayá turus in Sia, táe diádon tobatúmai inogoi-Nea dinumudui kon i-Nia koḻikud in ki Petrus, ki Yakobus bo ki Yohanes inta ki utat i Yakobus.

³⁸ Naonda in mosia noiyaputdon kon baḷoi i Yairus, bo inontongnea in intau mita modowawá mako bo dinongog-Nea doman in ombaḷ bo amui inta moropot.

³⁹ Dá ki Yesus in sinumuot bo noguman, “Nongonu sin moiko in modowawábí bo mongombaḷ? Adí tatua in diábí minatoi; tongábí in sia nosiug!”

⁴⁰ Táe kinosingan monia in ki Yesus. Dá pinoki ḷuaian-Nea in mosia komintan. Onda intua dinia i Yesus in ki iná bo ki amá in adí tatua takin murí-Nea taya toḷu bo sinumuot kon gopot in adí tatua.

⁴¹ Kinadaian i Yesus ḻima in adí tatua poḷat noguman kon adí tatua, “Talita kum,” mangaḻenea, “Adí bobay, poguman-Ku kon inimu: pobangondon!”

⁴² Adí bobay tatua baḷú nobangon, bo minayá. (Umurnea mopuḷúdon bodoyowá notaong.) Bayongan intau inta nokoontong kon onu inta nobaḻí tatua totok in noherang bo noitongau!

⁴³ Táe ilarang totok i Yesus in mosia in mopotaau kon soaḷ tatua kon i inekadon. Sia noguman, “Ogoiaidon in kaanon in adí tanion.”