MARKUS 4 - Alkitab Singog In Mongondow Masa In Tanaa

Poumpamaan Mogogambor

¹ Kon singgai tobatú ki Yesus bui nobogoi in topotundú kon bingkí in Danow Galilea. Nobayong totok intau in namangoi noḻipung kon i-Nia. Manangka intua Sia minayá iḻimitú kon bonu in uangga inta noiḷantak mako kon tubig, bo intau mita sinimindog kon bingkí in Danow.

² Nobayong in sinundú-Nea táe nomaké in poumpamaan. Nanaa in totundú-Nea kon i monia.

³ “Indongogaidon! Oyúon in mogogambor iḷumuai sin mogambor.

⁴ Wakutu in sia nogambor oyúon bibit in noḷabú kon daḷan. Bo noiangoi in ḷagapan bo nodaitnea kinaan in bibit tatua.

⁵ Oyúon bibit inta noḷabú kon tampat inta nobayong in batu bo butánea tongá topiḻik. Bibit tatua ḷagi nobiag sin noyakag in butánea,

⁶ táe wakutu mata in singgai koḷantud-koḷantudon, biagnea mulaidon moḷaḷow poḷat noingkag bo minatoidon sin uakatnea diá noonag in kino kanomannea.

⁷ Oyúon doman bibit inta noḷabú kon yua-yuak in díat. Díat mita tatua nobiag bo nonisí kon biag in bibit mita tatua nodapot in minatoi, sahingga diá nokopomungai.

⁸ Táe oyúon doman bibit in noḷabú kon butá inta mopia. Bibit tatua nobiag, bo nobaḻí noḷoben bodongka nomungai, oyúon kotoḷu nopuḷú noguntuḷ in kobayongnea, oyúon in koonom nopuḷú noguntuḷ bo oyúon doman in kogatut noguntuḷ in kobayongnea.”

⁹ Nopaḷut mako nongonguman kon poumpamaan tatua ki Yesus noguman, “Aka kobongoḷan, yo indongogai!”

Nongonu sin momakébí in poumpamaan ki Yesus

¹⁰ Naonda in ki Yesus noitontaní, intau mita inta nokidongog kon totundú-Nea namangoi kon i-Nia noyotakin in murí-Nea mita mopuḷú bodoyowá tua. Mosia in nopoigum sinbá ki Yesus moginsilang kon mangaḻe in poumpamaan tatua.

¹¹ Dá ki Yesus in noguman kon i monia nanaa, “Moiko inogoiandon in totabi monotaau kon onu inta noibuni soaḷ naonda in ki Allah momarenta saḷaku Datu. Táe kon intau mita inta kon ḷuai sinundú pinongin poumpamaan,

¹² sinbá ‘Umpaka umuran mosia monarukira táe diá kotaauan monia onu in mobaḻí, mosia umuran mokidongog, táe diá momangaḻe, naa mobaḻí sinbá mosia diá mokoontong bo momangaḻe bo dika in mosia mamangoi kon i Allah bo ampungan i Allah in mosia.’ ”

Ki Yesus noginsilang kon mangaḻe in poumpamaan soaḷ mogogambor

¹³ Onda intua, ki Yesus in noguman kon i monia, “Aka diá komangaḻean monimu in poumpamaan tatua, yo naondabí in komomangaḻe monimu kon poumpamaan ibanea mako?

¹⁴ Mogogambor tua in intau inta nopohabar magí-mako in habar nongkon i Allah.

¹⁵ Bibit inta noḷabú kon daḷan in ibarat intau inta nokodongog kon habar soaḷ naonda in ki Allah momarenta. Naonda in sia nokodongog, Ibilis namangoi bo nogamá kon onu inta ain pinomuḷa kon bonu in ginanea.

¹⁶ Bibit inta noḷabú kon tampat inta nobayong in batu, ibarat intau mita inta nokodongog kon habar tatua, bo baḷú sinarimanea takin sanang in gina.

¹⁷ Táe habar tatua diá nonguakat kon bonu in gina monia, sahingga in diá noonggot in pinonahangannea. Naonda i mosia noyogintayow in roriga ande pomogutúan popisí in habar tatua, baḷú in mosia nonaḷámai kon onu inta ain pinirisaya monia.

¹⁸ Bibit inta noḷabú kon yua-yuak in díat, tua in ibarat intau mita inta nokidongog kon habar tatua,

¹⁹ táe mohawatir kon soaḷ kobobiag monia bo moibog mooyúon totok. Ibog monia kon bayongan yagi-yagi in tumuot doman kon gina monia. Tuamai in habar nongkon i Allah inta kon bonu in gina monia sisionnea sahingga diá momungai.

²⁰ Bo bibit inta noḷabú kon butá inta mopia, tua in ibarat intau mita inta nokidongog kon habar tatua bo sinarimanea. Mosia in nomungai nodatog. Oyúon in toḷu nopuḷú, oyúon in onom nopuḷú, bo oyúon doman in mogatut noguntuḷ in kobarong in bungainea.”

Togá inta sinungkuban in tampayang

²¹ Noidudui kon tua noguman bui in ki Yesus nanaa, “Nokoimontandon degá intau in mopoyongkit mako in togá bo tungkubannea in tampayang ande bayáannea ukaton kon ḻimonag in pososiugan? Umpaka yo diá bayáannea ukaton kon tampat pogogukatan kon togá tatua?

²² Diábí in moibuni in diá koontongan; bo diábí doman in noibuni in diá kotaauan.

²³ Tuamai, aka kobongoḷan yo pokidongog!”

²⁴ Guman i Yesus bui, “Tarukira onu inta dinongog monimu naa! Ukuran inta pakéon monimu kon intau ibanea, tua in pakéon i Allah pogukur kon i monimu, sedang bo duganganpa doman in kobayongnea.

²⁵ Sin kon intau inta oyúondon kon inia, ogoian in kobayongon; táe kon intau inta diá in kon inia, yo onuka in topiḻik kon inia yo gamáanbí doman.”

Poumpamaan soaḷ bibit inta nobiag

²⁶ Ki Yesus in nongingguput bui kon ouman-Nea, “Aka ki Allah momarenta saḷaku Datu, kaadaan-Nea in motaau popoumpama naonda bo intau inta nogambor kon bibit kon gobánea.

²⁷ Doḷom sia mosiug; singgai mobangon. Bibit tatua monguakat bo mobiag koḷantud-koḷantud. Táe naonda in kinobobaḻí intua diábí kotaauan in intau tatua.

²⁸ Butábí tatua in mopoḷuai in hasilnea; muna in tanganea, onda intua ḷumondut bodongka momatu in bungainea.

²⁹ Bo aka bungai in gandum tatua moḷutúdon dá pangkoiandon yangkiton in intau tatua sin wakutuneadon monoḻisí kon bungainea.”

Poumpamaan batoḷ in sesawi

³⁰ Ki Yesus bui noḻibó, “Aka ki Allah momarenta saḷaku Datu, yo onu in motaau potongkaian naton kon onu? Onu in contoh inta motaau baḻíon naton dodoyonan poginsilangan kon tua?

³¹ Aka ki Allah momarenta, yo kaadaan-Nea in naonda bo poumpamaan tanaa: Tobatú batoḷ in sesawi ginamá in intau tobatú bo pinomuḷanea kon butá. Batoḷ in sesawi naa in batoḷbí inta paling mointok nongkon bayangan batoḷ kon dunia naa.

³² Táe aka mobiagdon, yo moḷobe-ḷobenbí in sia nongkon bayongan pinomuḷa ibanea. Tanganea mita mongobambar, sahingga ḷagapan mita motaau mamangoi monompugad kon tua bo kooḻiungannea.”

³³ Natua in pinototundú i Yesus kon intau mita. Sia nomaké in poumpamaan mita natua komangoi in komangaḻean monia.

³⁴ Ki Yesus umuran nomaké in poumpamaan aka motundú kon intau mita tatua. Táe aka kon murí-Nea mita, yo daiton-Neabí insilangan.

Ki Yesus nopogogai in tompot moropot

³⁵ Kon singgaipa doman tatua, kon dodai in singgai noungkoḷomdon; ki Yesus in noguman kon murí-Nea mita, “Koḻigai in kita ḷumeag mopoako in ḷoḷan in danow.”

³⁶ Dá ki Yesus sinumakoidon kon uangga takin murí-Nea mita bo nonaḷámaidon kon intau mobayong kon bingkí in Danow. Uangga mita ibanea kon tua doman. Onda intua ki Yesus bo murí-Nea mita iḷumeagdon.

³⁷ Diá noonggot kon binayáan monia, namangoidon in tompot moropot. Bokoḷ namangoidon doman nondangat kon uangga, bo tubig moibonu domandon kon uangga, dá in gogiódon mopuḻing tubig in uangga tatua.

³⁸ Dodai intua ki Yesus nosiug kon dotá in tumi uangga. Sia nonguḷun kon oḷunan bo noḷoḷot. Murí-Nea mita namangoi noguḷung kon i-Nia poḷat noguman, “Pak Guru, diádon degá pandungonmai i Pak Guru, mobodito in kita!”

³⁹ Dá nobangondon in ki Yesus bo nongguak kon tompot tatua poḷat noguman kon danow tatua, “Kibio-biómaidon, kooyongdon!” Dá tompot nogogaidon, bo danow noḷonongdon totok.

⁴⁰ Bo ki Yesus in noḻibó kon murí-Nea mita, “Nongonu sin moondokbí in moiko? Nongonu sin diábí in moiko mopirisaya kon i-Nakó?”

⁴¹ Mosia noondok bo dongkadon nosiḻibóan, “Eta ki inebí in intau tanaa, nodapot in tompot bo bokoḷ in dumuduibí doman kon singog-Nea.”