MARKUS 3 - Alkitab Singog In Mongondow Masa In Tanaa

Ki Yesus nongundam kon intau kon singgai in Sabat

¹ Ki Yesus sinumuot bui kon baḷoi pososambayangan. Kon tua oyúon tobatú intau inta ḻimanea tosimpaḷ noḻempeng.

² Kon baḷoi pososambayangan tatua oyúon doman in intau mita inta moibog motayak kon taḷá i Yesus, sinbá oyúon in baḻíon monia dodoyonan popongaduan kon i-Nia. Tuamai in umuran tarukiraan mako monia mongo mongundam doman in ki Yesus kon singgai in Sabat.

³ Dá ki Yesus in noguman kon intau inta noḻempeng in ḻimanea tosimpaḷ tua, “Koḻigai kon naa bo sindog kon tayowon intau mita tanaa.”

⁴ Onda intua iḻibó i Yesus kon intau mita kon tua, “Aka podudui in agama, onu in motaau aidan naton kon singgai in Sabat? Momia kon mopia andeka moraat? Moposaḷamat kon intau andeka moḻimod?” Mosia komintan nongobió.

⁵ Korogi-rogi in ki Yesus nobobui magí-mako kon intau mita inta kon tua, táe moajar doman totok in gina-Nea sin totuu motogat in gina monia tua. Onda intua Sia in noguman kon intau inta noḻempeng in ḻima tatua, “Sintakdon in ḻimamu.” Dá sinintak doman in intau tatua in ḻimanea, bo baḷú domandon nopia in ḻimanea tatua.

⁶ Dá intau mita in Parisi nonaḷámaidon kon baḷoi pososambayangan tatua, bo minayá noyosingog takin intau mita i Herodes, kon naonda in poḷoḻimod kon i Yesus.

Intau mobayong kon bingkí in danow

⁷ Noiduduimai kon tua, ki Yesus takin murí-Nea mita sinimípa bo nopobayá in Danow Galilea. Táe nobayong totok in intau nongkon Galilea in dinumudui kon i Yesus. Nobayong doman in namangoi nongkon Yudea,

⁸ nongkon Yerusalem, nongkon butá Idumea, nongkon dotá in pomukaan kon Yordan, bo nongkon butá in Tirus bo Sidon. Mosia komintan in namangoi kon i Yesus, sin kinodongogandon monia in bayongan inta inaidan-Nea.

⁹ Mobayong totok in intau, manangka intua ki Yesus nokitayak in uangga kon murí-Nea mita, sinbá diá kogupitan monia in Sia.

¹⁰ Bo nobayong totok in intau inundaman-Nea, dá bayongan in intau notakit komintan moḷongasi dimiug kon i Yesus bo moḻiai kon i-Nia.

¹¹ Bo intau mita inta kinotoḷangan in dimukud moraat, pomuḷoi in mokoontong kon i-Nia baḷú tumungkud kon tayowon-Nea bo momaḷú in moguman, “Ikobí nion in ki Adí i Allah!”

¹² Táe ilarang totok i Yesus in dimukud mita moraat tatua in mopotaau kon ki ine in Sia.

Ki Yesus nomiḻí kon murí-Nea mopuḷú bodoyowá

¹³ Onda intua ki Yesus notakod kon buḷud tobatú, bo nogoiní kon intau mita inta kinoibog-Nea. Intau mita tatua in namangoi,

¹⁴ bo Sia nonantúdon kon intau mopuḷú bodoyowá takin singog nanaa, “Akuoi in momiḻí kon i monimu, sinbá moiko in tumakin kon i-Nakó. Potabá-Ku in moiko mopotaa-taau mako in Habar Mopia nongkon i Allah,

¹⁵ bo moiko in ogoian-Ku in kawasa moguntun kon dimukud mita moraat.”

¹⁶ Naa in tangoi monia mopuḷú bodoyowá tua: Ki Simon (inta dinonoi doman ki Petrus),

¹⁷ ki Yakobus bo ki Yohanes ki utatnea. Taya dua naa ki adí mita i Zebedeus (mosia in sinangoian ki Boanerges, inta mangaḻenea, “ki adí in gotup”),

¹⁸ ki Andreas, ki Pilipus, ki Bartolomeus, ki Matius, ki Tomas, ki Yakobus ki adí i Alpeus, ki Tadeus, ki Simon intau in Zelot,

¹⁹ bo ki Yudas Iskariot inta nomalidawan kon i Yesus.

Ki Yesus bo ki Beelzebul

²⁰ Onda intua ki Yesus nobuidon kon baḷoi. Táe intau nobayong buipabí namangoi noyosipun, sahingga in ki Yesus bo murí-Nea mita diádon nokopongaan.

²¹ Intau mita in noguman, “Nobundaidon in Sia nion!” Bo naonda in kinodongogan in ginaḷum-Nea in singog monia tua, binayádon monia ginamá in ki Yesus.

²² Mototundú mita kon agama Yahudi inta namangoi nongkon Yerusalem noguman, “Kinotoḷangan i Beelzebul in Sia! Itoi in dimukud mita moraat tatua in nobogoi in kawasa kon i-Nia moguntun kon dimukud moraat.”

²³ Dá ki Yesus nogoiní kon intau inta mobayong tua bo nongonguman kon poumpamaan mita. Kai-Nia, “Uḻe, diábí kumaan kon akaḷ aka dimukud moraat moguntun kon dimukud doman moraat.

²⁴ Sin aka tobatú dodatuan bo mosilai mokolo-kolompó inta mososaturuan, yo diábí mononoi in dodatuan tatua.

²⁵ Ande, aka motoḷuadí diá motobatú bo mosisaturuan doman yo mogoguyaatbí in motoḷuadí tatua.

²⁶ Dá natuabí doman kon bonu in dodatuan in Ibilis aka mosia mosisaturuan bo moyosilai, diábí doman monahang moonggot bo moyoyang.

²⁷ Diábí doman tobatúmai intau in mokotuot kon bonu in baḷoi intau moropot bo mogagow kon kapunyaan in intau moropot tatua, aka diáneapa muna togoton in intau moropot tatua. Tantú munaneapabí togoton bodongka kogamaannea in kapunyaan in intau moropot tatua.

²⁸ Pokotaaudon! Aka intau mogaid kon dosa bo mohojat, yo motaaupabí ampungan in sia.

²⁹ Táe aka mohojat in sia kon Roho i Allah, yo intau tatua in diábí motaau ampungan! Sin hojatan tatua in dosabí mononoi.” (

³⁰ Ki Yesus in noguman natua sin oyúon in intau in noguman kon Sia in kinotoḷangan in dimukud moraat.)

Ki iná bo ki utat mita i Yesus

³¹ Noiduduimai kon tua, ki iná bo ki utat mita i Yesus namangoi. Mosia in sinimindog kon ḷuai bo nopotabá kon intau mogoiní kon i Yesus.

³² Dodai intua nobarong intau in iḻimitú kon ḻibumai Yesus. Dá mosia in noguman kon i-Nia, “Pak Guru, ki iná bo ki utat mita i Pak Guru, tua kon ḷuai. Mosia notayak kon i Pak Guru.”

³³ Táe ki Yesus in notubag, “Ki inebí in ki iná-Ku? Ki inebí in ki utat-Ku mita?”

³⁴ Onda intua ki Yesus nobobui magí-mako kon i monia inta iḻimitú kon ḻibu-Neamai bo noguman, “Naabí in ki iná bo ki utat-Ku mita!

³⁵ Intau inta dinumudui kon ibog i Allah, siabí tua in ki utat-Ku ḷoḷaki bo ki utat-Ku mita bobay bo ki iná-Ku.”