MARKUS 2 - Alkitab Singog In Mongondow Masa In Tanaa

Ki Yesus nongundam kon intau ḻempeng

¹ Tongonumai nosinggai noiduduimai kon tua, ki Yesus in minayádon bui in Kapernaum bo noisiardon in habar kon Sia in oyúon kon baḷoi.

² Bo namangoidon in intau mita kon tua. Mosia in noyosipun kon tua dapot in diádon tampat umpaka ngara yo nopuḻingdon in intau. Ki Yesus in nopotaau in Habar Mopia nongkon i Allah kon i monia.

³ Koyogotpa in Sia mosingog, indoianmai intau taya opat namangoi kon i Yesus kobuḻi-buḻig in intau ḻempeng.

⁴ Táe popisí in mobarong totok in intau, dá diá in mosia noiyaput kon i Yesus, dá noponik in mosia bo nomukat kon atop in baḷoi inta kon tombutungmai i Yesus. Onda intua sinuntundon monag monia in intau ḻempeng tatua pinoyotakin in boḷad tosiugannea.

⁵ Naonda in inontongmai i Yesus kon totuudon in mosia mopirisaya, dá Sia in noguman kon intau ḻempeng tatua, “Adí-Ku, inampungandon in bayongan dosamu.”

⁶ Táe tongonumai in mototundú mita kon agama in Yahudi nomangkoidon nongunsingog kon bonu in gina, kai monia,

⁷ “Totuu mobarani in intau tanaa in mosingog natua! Sia in mohojat kon i Allah. Ki inebí in motaau mongampung kon dosa, tongábí ki Allah tontaní?”

⁸ Táe kon dodaipa doman in tuata kinotaauan i Yesus in raian monia. Dá Sia in noguman, “Nongonu sin moiko in moraibí natua kon bonu in ginamu?

⁹ Onda degá in mogampa-gampang, moguman, ‘Dosamu inampungandon’, andeka moguman, ‘Pobangondon, bingkat in boḷad pinosiuganmu bo bayádon’?

¹⁰ Táe tanaa poniata-Kudon kon i monimu, kon ki Adí intau kokawasa mongampung kon dosa in intau kon dunia naa. Nosingog mako natua.” Ki Yesus in noguman kon intau ḻempeng tatua,

¹¹ “Pobangondon, bingkat in boḷad pinosiuganmu bo pobuidon!”

¹² Bango-bangon in intau tatua bo nobingkat kon boḷad tosiugannea bo iḷumuai koonto-ontong monia komintan. Intau mita kon tua noherang takin pia in gina bo nodayow kon i Allah, kai monia, “Diápa dodai onda kita in nokoontong kon onu inta nobaḻí ná tanaa!”

Ki Yesus nogoiní kon i Lewi

¹³ Nopaḷut mako kon tua ki Yesus minayá bui in pintad Danow Galilea. Bayongan intau namangoi kon i-Nia. Bo Sia nobogoi in topotundú kon i monia.

¹⁴ Wakutu in ki Yesus nopobayá natua, Sia in nokoontong kon tobatú intau mononagi kon pajak tangoinea in ki Lewi inta ki adí i Alpeus. Ki Lewi naa ḻimitú mako kon kantor in pajak. Ki Yesus in noguman kon inia, “Duduidon kon i-Nakó,” Dá sindo-sindog in ki Lewi bo dinumuduidon kon i Yesus.

¹⁵ Wakutu in ki Yesus koyogot nongaan kon baḷoi i Lewi, nobayong mononagi mita kon pajak bo intau mita inta inanggap diá mopia i intau moantó, nongaan noyotakin i Yesus bo murí-Nea mita. Sin nobayong in kon sigad monia tua in dinumudui kon i Yesus.

¹⁶ Wakutu intua tongonumai in mototundú kon agama in Yahudi inta nongkon golongan Parisi nokoontong kon i Yesus nongaan noyotakin in mononagi mita kon pajak bo intau mita inta inanggap diá mopia tua. Dá mosia in noḻibó kon murí mita i Yesus, “Nongonu sin gurumu in nongaanbí noyotakin in mononagi mita kon pajak bo intau mita inta diá mopia tua?”

¹⁷ Táe dinongog i Yesus in ḷoḻibó monia tatua, dá sinubagan-Nea, “Intau mita mosehat diábí moparaḷu kon dokter, tongábí intau motakit. Bo Akuoi in namangoi deemanbí mogoiní kon intau inta monganggap kon mopiadon in sia, táe mamangoibí kon intau mita inta ain inanggap yoyatan.”

Popopuasa

¹⁸ Kon singgai tobatú, wakutu in murí mita i Yohanes Mobobaptis bo intau mita in Parisi nopuasa. Dá oyúon intau in namangoi kon i Yesus bo noḻibó, “Nongonu sin murí mita i Yohanes Mobobaptis bo murí mita in intau in Parisi mopuasabí, táe murí mita i Pak Guru in diábí?”

¹⁹ Ki Yesus in notubag, “Kon rame ponikaan, yobayat mita in intau inta nonika in diábí motaau in mopuasa kon wakutu in mosia koyota-yotakinpa in intau inta nonika tua, tantú mongaanbí moyotakin in mosia.

²⁰ Tongá oyúonbí in wakutunea nonikaan ḷoḷaki tatua gamáan nongkon imonia, bo bain tuata mosia in mopuasa.

²¹ Diábí intau in mopoduḷampong in didit mobagu kon ḷambung inta nokoyongandon. Sin didit nobagu inta pinoduḷampong tatua in mobadang bo momerak kon ḷambung koyongan tatua, dá modugangdon moḷoben berak in ḷambung tatua.

²² Ná doman tua, diábí in intau mogaḻin kon anggur kon bonu in botutu kuḻit inta nokoyongandon. Sin anggur nobagu tatua i mokopopisíbí kon koberakan in botutu tatua, dá tumpaḷadon mogoguyaat in botutu bo anggur. Tuamai in anggur nobagu musti bonuon doman kon botutu nobagu!”

Soaḷ singgai in Sabat

²³ Kon tobatú singgai in Sabat, ki Yesus noitaḻib kon gobá in gandum, bo murí-Nea mita nokoyut kon bungai in gandum.

²⁴ Dá intau mita in Parisi in noguman kon i Yesus, “Nongonu sin murí-Mu mita in momiabí kon onu inta pinoton kon bonu in hukum agama naton, pinongin mogaid kon onu inta pinoton aidan kon singgai in Sabat?”

^25-26 Dá tubag doman i Yesus kon i monia, “Degá diápa kinobacaan monimu onu in inaidan i Daud, wakutu in ki Abyatar nobaḻí imang moḷoben. Wakutu in ki Daud bo dumoduduinea mita ginogoy bo diá kokaa-kaanon, sia in sinumuot kon Baḷoi Tuhan, bo nokaan kon roti inta ain pinosumba kon i Allah. Bo inogoiannea doman in roti tatua in dumoduduinea mita. Bokaka aka podudui in agama naton, yo tongábí imang in motaau mokaan kon roti tatua.”

²⁷ Ki Yesus in noguman doman, “Singgai in Sabat pinomia sin kopontingan in intau, deemanbí intau in pinomia sin singgai in Sabat.

²⁸ Dá tuamai singgai in Sabat kon bonubí doman in kawasa i Adí Intau.”