MARKUS 14 - Alkitab Singog In Mongondow Masa In Tanaa

Tomayá moḻimod kon i Yesus

¹ Singgai moḷoben Paska bo Poramean kon Singgai in Roti Diá Koragi dongkadon doyowa nosinggai. Imang mita itoi bo mototundú mita kon agama umurandon motayak kon daya naonda in pododomok kon i Yesus bo ḻimodon, táe umuni-uni.

² Táe mosia in noguman, “Dikabí in tomayá naton naa aidan pododai kon singgai poramean sin momuká in huru-hara.”

Ki Yesus ininggúan in ḷana mobondu

³ Naonda in ki Yesus kon Betaniadon kon baḷoi i Simon inta koḻipod kinotugatan in takin kuḻit mokorongó, indoianmai namangoidon in tobatú bobay kodia-dia in botoḷ in ḷana narwastu inta momahaḷ totok inta inaidan nongkon uakat mobondu. Wakutu in ki Yesus yogot mongaan, iḷosidon in bobay tatua botoḷ in ḷana nobondu tatua bo pinoginggúnea kon uḷu i Yesus in bonunea.

⁴ Táe oyúon intau tongonumai in kon tua in sinumorú poḷat nosingog, “Onubí in mangaḻe pinomoguyaatannea kon ḷana mobondu tatua?

⁵ Ḷana tatua in motaaubí potaḷui moiḻiu kon toḷu nogatut doit saḷaka, bo doit tatua in motaau ogoi kon intau nobogá!” Dá sinorúan monia in bobay tatua.

⁶ Táe ki Yesus in noguman, “Pomayádon mako in pogaidannea kon tua! Nongonu sin moposusabímai kon ginanea in moiko? Sia in nogaidon kon soaḷ inta mopia kon i-Nakó bo patus dayowon.

⁷ Sin aka intau mita inta nobogá umuranbí oyúon in kon sigad monimu. Aka moibog motuḷung in moiko kon i monia, yo pomuḷoi mako motaaubí. Táe Akuoi in diábí pomuḷoi mako in moyotakin monimu.

⁸ Bobay tanaa ain nogaid kon onu in motaaunea aidan. Ḷananea tatua in pinosadianea kon poḷobongan kon i-Nakó kon wakutu in Akuoi diápa minatoi.

⁹ Pirisayadon singog-Ku! Kon dunia naa, kon ondakabí in popohabaran in Habar Mopia nongkon i Allah, yo aid in bobay tanaa in umuranbí domandon oumanon sin monorop kon inia.”

Ki Yudas nonomayá moposarakan kon i Yesus

¹⁰ Bo ki Yudas Iskariot, tobatú murí i Yesus nongkon sigad inaya mopuḷú bodoyowá, minayá kon imang mita itoi takin monomayá moposarakan kon i Yesus kon i monia.

¹¹ Nokodongogmai kon singog i Yudas natua, totok nopia in gina monia, dá dinandi monia kon ogoian monia in doit in ki Yudas. Dá mulaidon notayak kon kasampatan in ki Yudas moposarakan kon i Yesus.

Ki Yesus nongaan noyotakin i murí-Nea mita

¹² Kon singgai dungkuḷ porayaan kon Roti Diá Koragi – wakutu in intau moratadon kon domba Paska – murí-Nea mita in noḻibó kon i Yesus, “Kon onda in koibog i Pak Guru posadiaan nami kon pongaanan kon singgai in Paska?”

¹³ Dá ki Yesus in nopotabá kon murí-Nea doyowa takin koyow, “Bayádon in kotá, kon tua oyúon ḷoḷaki inta kodia-dia in kendi inta kon bonu in tubig. Sia in moyodungkuḷ monimu. Duduidon kon inia

¹⁴ tumuot kon baḷoi inta tuotannea bo pogumandon kon i togi baḷoi tatua, ‘Ki Pak Guru nokiḻibó, mongo kon onda in tampat pongaanan i Pak Guru takin murí-Nea mita kon kaanon Paska.’

¹⁵ Bo tundúonbí in intau tatua kon inimu in tobatú yuang moḷoben inta kon ḻimonik. Ruangan tatua ain notompia, bo notouḷutdon in pakakatnea. Sadiadon kon tua in yagi-yaginea sin pongaanan naton.”

¹⁶ Dá minayá domandon in murí-Nea taya dua kon kotá. Noidapotmai in kotá tatua, onu inta pinoguman i Yesus natua doman in nouḻí monia. Bo noposadiadon in mosia kon kaanon Paska.

¹⁷ Naonda in nodoḷomdon, namangoidon in ki Yesus takin murí-Nea mopuḷú bodoyowá tatua.

¹⁸ Bo wakutu in mosia iḻimitúdon nongaan, ki Yesus in noguman, “Akuoi in moguman kon i monimu, kon tobatú nongkon sigad monimu nion inta nongaan noyotakin-Ku tanaa, moposarakan kon i-Nakó.”

¹⁹ Nokodongogmai kon singog i Yesus natua, noajar totok in gina in murí-Nea mita. Bo mulaidon kon batúannea noguman kon i Yesus, “Pak Guru, deemanbí akuoi toh inta imakusud i Pak Guru?”

²⁰ Tubag i Yesus, “Sia tua in tobatú murí kon sigad monimu mopuḷú bodoyowá naa, inta mongaan topindanan-Ku.

²¹ Totuubí kon ki Adí Intau in matoibí ná inta ain pinais kon bonu in Buk Motusi. Táe moboditodon totok in intau inta moposarakan kon i Adí Intau tatua! Maníka bo diá kon dodai in onda in pinononggadí in sia!”

Pinongaanan noyotakin i Tuhan

²² Wakutu in mosia yogot mongaan, ki Yesus in nogamá kon roti bo nosambayang nopoyaput in sukur kon i Allah. Onda intua binonsi-bonsig-Nea in roti tatua bo inogoi kon murí-Nea mita poḷat noguman, “Gamá bo kaandon, awak-Ku in naa.”

²³ Nopaḷut mako kon tua Sia nogamá kon palo inta pinobonuan kon anggur. Ki Yesus nosambayang, nopoyaput in sukur kon i Allah, bodongka nobogoi in palo tatua kon murí-Nea mita. Onda intua mosia komintan nonginum kon anggur tatua.

²⁴ Bo ki Yesus in noguman, “Naadon in dugú-Ku inta mopototuu kon dodandian i Allah, dugú inta pinobutak sin kopontingan in intau mobarong.

²⁵ Popirisayabí: Akuoi in diá bidon monginum bui kon anggur tanaa modapot kon wakutu in akuoi monginum kon anggur mobagu moyotakin monimu kon dunia mobagu i Amá-Ku.”

²⁶ Noiduduimai kon tua mosia nopodondong in tobatú dondong dodayow. Nopaḷut mako kon tua mosia minayádon in Buḷud Zaitun.

Pinopotaauan i Yesus kon ki Petrus doí mongaku murí-Nea

²⁷ Noiduduimai kon tua, ki Yesus noguman kon i monia, “Moiko komintan naa in moḷaguibí monaḷámai kon i-Nakó. Sin kon bonu in Buk Motusi ain pinais, ‘Ḻimodon i Allah in gombalanea bo paanan domba moirangkap in moḷagui.’

²⁸ Táe naonda in biagondon bui in Akuoi, Akuoi in umuna kon i monimu mayá in Galilea.”

²⁹ Dá ki Petrus in nosingog, “Diá ah, biarbí taḷaanmai monia in ki Amá, táe akuoi in doíbí monaḷámai.”

³⁰ “Pokotorop Petrus,” guman i Yesus, “doḷom doman naa, wakutu in manuk diápa mokukú kodua, yo koyongandon kotoḷu in iko moguman kon deemanbí murí-Ku.”

³¹ Ki Petrus in nosingog noropot, “Biarbí akuoi matoi moyotakin i Amá, táe diábí mokoimontanmai in akuoi in moguman kon diá nokanalku in ki Amá!” Bo murí-Nea mita ibanea in noguman doman natua.

Ki Yesus kon Taman Getsemani

³² Mosia in noiyaputdon in tobatú tampat inta sinangoian Getsemani, kon tua ki Yesus noguman kon murí-Nea mita, “Ḻitúpa kon naa sin Akuoi mayápa mosambayang!”

³³ Onda intua ki Yesus nonongganut kon i Petrus, kon i Yakobus bo kon i Yohanes noyotakin-Nea minayá. Bo mulaidon sia angoian robonoḷ in dodob bo moḻia-ḻiaw in gina.

³⁴ Ki Yesus in noguman kon i monia, “Morobonoḷ totok in dodob-Ku, naonda bo matoi in korasaan-Ku. Kon naapa in moiko moyotakin-Ku bo umuran kiḷuka-ḷukadmai!”

³⁵ Ki Yesus inumuna topiḻik, noḻin yayú kon i monia bo sinumungkud bo nosambayang. Sia nopoigum aka motaau yo dika poantug kon i-Nia in roriga tatua.

³⁶ Kai-Nia, “Amá, o Amá, diábí in diá motaau aidan i Amá. Poyayúdon in roriga tanaa kon i-Nakó. Táe deemanbí ibog-Ku in duduian, aidaibí in onu inta koibog i Amá.”

³⁷ Nosambayang mako in ki Yesus namangoi bui in Sia kon murí-Nea mita, bo kinobayáan-Neamai nongosiug in mosia. Sia in noguman kon i Petrus, “Simon, nosiug degá iko? Tongá tojam yo diá mokooḷat in iko?”

³⁸ Sia in noguman doman kon i monia, “Umuran poḷukad bo posambayang sinbá diá kosobaan in moiko. Totuubí kon rohomu i moibogbí mogaid kon inta mobanar, táe diá mokosanggup in moiko sin tabiat in tapú naa moyangkó.”

³⁹ Komintanpa doman in ki Yesus minayá nosambayang. Sia nosambayang ná doman inta muna in pinoigum-Nea.

⁴⁰ Nopaḷut mako nosambayang, bui namangoi kon murí-Nea mita in Sia, kinobayáan-Neamai nosiugpa doman mako in mosia sin sinomposiugdon totok. Dá diádon kotaauan monia mongo onupa in poguman kon i Yesus.

⁴¹ Naonda in kon intoḷuneadon in ki Yesus namangoi kon i monia, Sia noḻibó, “Umpaka yo mosiug bo mogogaipa doman mako in moiko? Motaaudon! Aindon wakutunea ki Adí Intau posarakan kon ḻima in intau mita baradosa.

⁴² Pobangondon, koḻigai mayádon in kita. Indoiai! Intau inta moposarakan kon i-Nakó niondon!”

Ki Yesus Dinomok

⁴³ Koyogotpa in ki Yesus noyosingogmai, noiangoidon in ki Yudas, tobatú murí i Yesus inta kon sigad nayamopuḷú bodoyowá tua. Sia in noyotakin intau mobayong inta kodia-dia in pitow bo bobobak. Mosia tua pinotabá in imang mita itoi, mototundú mita kon agama Yahudi bo in itoi mita intau Yahudi.

⁴⁴ Intau inta moposarakan kon i Yesus nobogoidon in tomponuot kon i monia, nanaa, “Intau inta ayokanku, Sia tua intaunea.” “Domok in Sia bo ḷukadai kopia.”

⁴⁵ Kon wakutu in ki Yudas noidapotdon, baḷú in sia namangoi kon i Yesus bo noguman, “Pak Guru!” Onda intua inayokannea in ki Yesus.

⁴⁶ Bo intau mita inta namangoi noyotakin i Yudas nodomokdon kon i Yesus poḷat sinogot monia kon ḻima-Nea.

⁴⁷ Táe tobatú intau nongkon sigad monia tua in norabut kon pitow bo nonotad kon bongoḷan in tobatú ata i imang moḷoben, sahingga in notampil.

⁴⁸ Bo ki Yesus in noguman kon i monia, “Degá kai monimukamai Akuoi naa in intaubí moraat dá mamangoi in moiko takin kodia-dia in pitow bo bobobak sin modomok kon i-Nakó?

⁴⁹ Pomuḷoi in singgai Akuoi kon Baḷoi Tuhan bo motundúmai kon tayowon monimu, táe diábí domokon monimu. Táe totuu kon tua in mustibí mobaḻí, sinbá mobaḻí domandon onu inta pinais kon bonu in Buk Motusi.”

⁵⁰ Murí-Nea mita in noroḷagui nonaḷámai kon i-Nia.

⁵¹ Tobatú tayowmobiag inta tongá nogibintoḷ in daing dinumudui kon i Yesus. Domokon doman intau mita,

⁵² táe binukánea in bintoḷnea tatua, bo noḷagui diá koḷambu-ḷambung.

Ki Yesus kon tayowon in Mahkama Agama

⁵³ Ki Yesus in dinia kon baḷoi i imang moḷoben. Kon tua, noyosipundon magí in bayongan imang itoi, itoi mita intau Yahudi bo mototundú mita kon agama Yahudi.

⁵⁴ Ki Petrus dinumudui kon i Yesus táe nongkon noyayú bo noidapot in palas in baḷoi i imang moḷoben. Kon tua dinimiug in sia kon tuḷu bo nonayang noyotakin in tontara mita inta noḷukad.

⁵⁵ Imang mita itoi bo mahkama mita agama totok moḷongasi motayak kon bukti mita inta motaau popotaḷáan kon i Yesus sinbá motaau ḷabúan in hukuman matoi. Táe diá tobatúmai in nouḻí monia in bukti.

⁵⁶ Totuu mobayong in sakusi inoiní sin mobogoi in katarangan uboḷ soaḷ ki Yesus, táe noyo-noyoposi in katarangan monia tua.

⁵⁷ Bo sinimindog doman in tongonumai intau inta mobogoi in katarangan uboḷ soaḷ ki Yesus, guman monia,

⁵⁸ “Dinongog nami intau tanaa noguman, ‘Umpagon-Ku in Baḷoi Tuhan inta inaidan in intau, bo naonda in toḷu nosinggai bui posindogon-Ku in ibanea inta deeman intau in nogaid.’ ”

⁵⁹ Táe katarangan tatua noyo-noyoposimai doman.

⁶⁰ Dá sinimindogdon in imang moḷoben kon tayowon monia komintan bo noḻibó kon i Yesus, “Eta diá tubagan-Mu onu in pinonapud in intau mita tanaa kon ini-Mu?”

⁶¹ Táe tongá kibio-biómai in ki Yesus. Totokbí in doí notubag in Sia. Bo buipa doman imang moḷoben tatua noḻibó kon i-Nia, “Degá iko nion Datu Mopoposaḷamat, ki Adí i Allah inta Totok in mokudus?”

⁶² Tubag i Yesus, “Akuoi in Sia tua, bo moiko komintan in mokoontongbí kon i Adí Intau ḻimitú kon dotá in koḷanan i Allah Inta Totok in mokawasa bo mamangoi mongin goḷom kon ḷangit!”

⁶³ Dá nomera-merakdon kon ḷambungnea in imang moḷoben tatua bo noguman, “Diá bidon paraḷu motayak kon sakusi ibanea in kita!

⁶⁴ Sin dinongogdon monimu tontaní in hojatan-Nea kon i Allah. Yo onu in kaputusan monimu in tanaa?” Pinutusdon monia kon kotaḷá in ki Yesus bo patus hukumon matoi.

⁶⁵ Bo tongonumai intau nomangkoidon nonduyá kon i Yesus. Pinomponan monia i mata-Nea bo binongkug, nopaḷut mako bo moḻibó, “Pogumanka, ki ine in nomongkug kon ini-Mu?” Tontara mita moḷoḷukad nonokap doman kon i-Nia.

Ki Petrus doí nongaku murí i Yesus

⁶⁶ Wakutu in ki Petrus kon palaspa, tobatú ata bobay i imang moḷoben minayá intua.

⁶⁷ Naonda in nokoontong kon i Petrus nonayang mako kon diug in tuḷu, sinarukiranea totok in pogot i Petrus bodongka noguman, “Iko doman intau inta moyotakinmai i Yesus intau in Nazaret tatua?”

⁶⁸ Táe binayowan i Petrus. Kainia, “Diábí kotaauanku bo diábí komangaḻeanku onu i makusudmu,” tua in tubag i Petrus kon ata bobay tatua. Onda intua ki Petrus minayá in ngara moḷoben kon baḷoi imang moḷoben tatua. [Dodai intua nokukú i manuk.]

⁶⁹ Bo bui doman inontong in ata bobay tatua in ki Petrus, dá kaín gumannea doman kon intau mita kon tua, “Totuu sia naa in tobatúbí doman intau monia!”

⁷⁰ Táe bui doman nomayow in ki Petrus. Diá noonggot, intau mita noguman doman kon i Petrus, “Diá motaau momayow, iko nion tobatú doman takin monia tua, sin iko nongkon Galilea!”

⁷¹ Bo nomangkoidon nongibot in ki Petrus. Kainia, “Totuu, diábí kinotaauanku in intau inta imakusud monimu tua!”

⁷² Kon dodaipa doman tuata manuk nokukú kon induanea. Bo kinotoropandon i Petrus kon munadon pinoguman i Yesus kon inia, “Kon diápa mokukú in manuk kon induanea, koyongandon kotoḷu in sia nomayow deeman murí.” Bo nongombaḷ mopoina-inak in ki Petrus.