MARKUS 13 - Alkitab Singog In Mongondow Masa In Tanaa

Ki Yesus noguman kon kouuyan in Baḷoi Tuhan

¹ Naonda in ki Yesus iḷumuai nongkon Baḷoi Tuhan, tobatú murí-Nea noguman kon i Yesus, “Pak Guru, indoiaika in bangunan tanaa. Tarukira in batunea mita. Totuu mopia!”

² Tubag i Yesus, “Inontongmu bidon in bangunan mita inta noḷoben tatua toh? Táe diábí tobatúmai in batu mita tatua in pomayá mako moitudu mako kon tampatnea. Komintanbí daiton rumbunon.”

Roriga bo pomogutúan

³ Noiduduimai kon tua ki Yesus minayá in Buḷud in Zaitun bo iḻimitú kon tampat inta noyogintayow in Baḷoi Tuhan. Ki Petrus, ki Yakobus, ki Yohanes bo ki Andreas namangoi kon i-Nia sin nongonguman takin-Nea.

⁴ Mosia in noguman kon i Yesus nanaa, “Pak Guru, pogumanpa kon inami mongo toonu in kobaḻían intua komintan? Bo onu in mobaḻí tanda aka wakutuneadon?”

⁵ “Mokopoingat,” kai Yesus, “Dika modapot in koakaḷan in moiko.

⁶ Mobayong intau mamangoi bo momaké in tangoi-Ku poḷat moguman, ‘Akuoi naa in Sia tua!’ bodongka monguboḷ in mosia kon intau moantó.

⁷ Aka moiko mokodongog kon goḷotup mita in parang bo habar mita poparangan, dikabí moondok. Sin tua in mustibí mobaḻí muna, táe deemanbí kon tuadon i wakutunea mokiamat.

⁸ Tobatú bangusa moparang in bangusa ibanea. Tobatú negara monuntun kon negara ibanea. Ḻinug bo malarat mobaḻí kon bayongan tampat. Tua komintan bagupabí pomangkoian in roriga, naonda bo takit inta korasaan in bobay inta mononggadí.

⁹ Musti mokopoingat in moiko sin domokon bo pokisidang kon mahkama agama. Moiko in bongkugon kon baḷoi mita pososambayangan. Diaan in moiko potayow kon mongongawasa mita bo datu popisí in moiko in murí-Ku mita. Bo tuata in kasampatan monimu mongonguman kon i monia soaḷ Akuoi.

¹⁰ Habar Mopia nongkon i Allah tua, musti muna potaau magí-mako kon bayongan in bangusa.

¹¹ Bo aka domokon bo diaan in moiko kon pongadilan, yo dikabí mohawatir kon soaḷ onu in musti singogon monimu. Aka wakutudon monimu mosingog, yo singogdon onu in poporoho kon i monimu kon wakutu intua. Sin deemanbí moiko in mosingog, táe Rohobí i Allah.

¹² Kon dodai intua intau moposarakanbí kon i utatnea tontaní sin ḻimodon, natua doman aidan in tobatú guyanga ḷoḷaki kon i adínea. Adí mita moḷawangdon kon i amá bo kon i inánea, bo moposarakan kon i monia sin pokiḻimod.

¹³ Moiko in kodoí in bayongan intau sin dumodudui-Ku. Táe mosia inta mokotahang dapot in pangabisan in posaḷamatonbí.”

Oaid moraat inta mokorimumud

¹⁴ “Moiko in mokoontong kon ‘Oaid moraat inta mokorimumud’ simindog kon tampat inta poton sindogan. (Tarukiradon onu in mangaḻenea!) Kon wakutu intua intau inta kon Yudea, musti moḷagui mopobayá in buḷud.

¹⁵ Intau inta kon atop in baḷoi dikadon moponag bo tumuot kon baḷoi sin mogamá kon onukadon.

¹⁶ Intau inta kon gobá dika bidon mobui sin mogamápa kon jubahnea.

¹⁷ Mokoondok totok in singgai tatua kon i monia inta sidia bo inta koyogotpa in mopoteté in adí!

¹⁸ Posambayang sinbá soaḷ mita tatua in diá mobaḻí kon dodai in pongonguagat.

¹⁹ Kon singgai mita inta mokoondok tatua, moiantugbí in roriga inta diápa dodai onda in nobaḻí pinangkoipamai pinomia i Allah in dunia naa nodapot i masa in tanaa, bo diábí domandon mobaḻí bui.

²⁰ Aka kuma bo diádon impoḷokan i Allah i wakutunea tatua, dá diábí in tobatúmai in mosaḷamat. Táe popisídon in umat-Nea, dá impoḷokan i Allah in wakutu-Nea.

²¹ Kon wakutu intua aka oyúon intau in moguman kon i monimu, ‘Indoiai, Ki Datu Mopoposaḷamat kon naa!’ ande ‘Indoiai, kon tua in Sia!’ – dikabí mopirisaya kon intau tatua.

²² Sin ki inta deeman totu-totuu mopoposaḷamat bo ki inta deeman doman totu-totuu nabi in mamangoibí. Mosia in mogaid doman kon soaḷ mita inta diá in poḻiuan, bo soaḷ mita inta mokoherang sin ponguboḷ, bo aka oyúon in kasampatan yo mopoyaying doman kon umat mita i Allah.

²³ Dá, tuamai mokopoingatdon! Tua komintan nodait-Kudon pinoguman kon i monimu wakutu in diápa mobaḻí intua.”

Koangoian Adí Intau

²⁴ “Táe naonda in kon wakutudon in roriga tatua, mata in singgai mobaḻídon mosindip, bo buḷan diádon monindar.

²⁵ Tundi mita moḷabú nongkon ḷangit, bo bayongan in mongongawasa kon baḷangon motombauk.

²⁶ Kon wakutu in tuata koontongandon ki Adí Intau mamangoi kon bonu in goḷom takin kawasa moḷoben bo kamuliaan.

²⁷ Sia in mopotabábí in malaekat-Nea mita sin mosipun kon umat inta ain piniḻí-Nea nongkon siku mita in dunia naa, nongkon popod mita in dunia mopobayá in popod in ḷangit.”

Topotundú nongkon pangkoi in ara

²⁸ “Paké in topotundú nongkon pangkoi in ara. Aka tanganea mita moḷunow bo moḷukó, bo momangkoidon momoḻimping, yo kotaauandon monimu kon diádon moonggot bo sempodon in pononinggai.

²⁹ Ná doman tua, aka moiko mokoontong kon soaḷ mita tatua mobaḻí, yo kotaauandon monimu kon modiugdon totok in wakutunea.

³⁰ Pokotaaudon! Bayongan inta mobaḻí tanaa in mobaḻíbí kon wakutu in intau mita inta nobiag masa in tanaa diápa matoi modait.

³¹ Ḷangit bo butá in moinggamábí, táe singog-Ku in mononoibí.”

Diábí in tobatúmai intau mokotaau kon wakutunea

³² “Umpaka natua, táe diábí in tobatúmai in mokotaau kon singgai ande wakutu kobaḻían tua. Malaekat mita kon soroga bo Adí in diábí doman monotaau kon tua, tongábí ki Amá in monotaau.

³³ Manangka intua moiko in musti umuran mobasadia, sin diá kotaauan monimu in wakutunea.

³⁴ Kaadaannea in ibarat tobatú intau inta nonaḷámai kon baḷoinea bo minayá in tampat moyayú. Sia nopotabá in bobantungnea mita noḷukad kon baḷoinea bodongka nosilai kon oaidan kon i monia kon batúannea. Bo sia in nongoyow kon intau inta pinoki ḷukadan in ngara sinbá umuran moḷukad mokopopia.

³⁵ Tuamai in moiko musti umuran kiḷuka-ḷukadmai, sin diábí kinotaauan monimu mongo toonu in ki togi baḷoi mobui mangoi – moḷoḷabung, ande moonggot kon doḷom, ande modiug mobayag, ande bagu momuká in mata in singgai.

³⁶ Sinbá aka sia daḻi-daḻí mamangoi, yo diá koangoianmai moiko in koyogot in mosiug.

³⁷ Onu in poguman-Ku kon i monimu tanaa, poguman-Ku doman kon bayongan intau: umuran kiḷuka-ḷukadmai!”