MARKUS 12 - Alkitab Singog In Mongondow Masa In Tanaa

Poumpamaan Mototomoyó kon Gobá in Anggur

¹ Noiduduimai kon tua ki Yesus mulaidon bui nosingog takin nomaké in poumpamaan kon imang mita itoi, guru mita in agama bo itoi mita intau Yahudi. Kai-Nia, “Oyúon tobatú intau nomuḷa kon anggur kon gobánea. Gobá tatua iḻibunea sinondok. Bo pinogaidannea doman kon tampat pomomugutan kon bungai in anggur. Sia nogaid doman kon ḷangkeang poḷoḷukadan. Onda intua pinotomoyónea in gobá in anggurnea tatua kon tongonumai intau mototomoyó bodongka minayá in sia kon ḻipú inta moyayú.

² Naonda in wakutuneadon posipúan kon bungainea, ki togi gobá tatua nopotabá in bobantungnea minayá kon mototomoyó mita tatua sin mogamá kon silainea.

³ Táe dinomok in mototomoyó mita tatua in bobantung tatua. Binongkug monia bodongka pinoki pobuian takin diá doman inogoian in onu bo onu.

⁴ Ki togi gobá tatua in nopotabá bui in bobantungnea ibanea. Táe binontung doman in mototomoyó mita tatua kon uḷu in bobantung tatua poḷat inuntun bo siniba-sibáanmai.

⁵ Ki togi gobá tatua nopotabá bui in bobantungnea ibanea. Táe iḻimod monia in bobantungnea tatua. Bo ná doman tua in pinogogaid monia kon bobantung mita inta noiduduimai: oyúon binongkug, oyúon doman iḻimod.

⁶ Dá ki inepa in motaau potabá i togi gobá in tanaa mako? Dongkadon tobatú intau, tuata in ki adínea tontaní inta totok in kotabi-tabinea. Pangabisannea pinotabáneadon in ki adínea tatua minayá kon mototomoyó tatua. Pinikirnea, ‘Notantúbí kon horomaton monia in ki adíku tanaa.’

⁷ Táe nokoontongmai in mototomoyó mita tatua kon adí tatua, nosigumanan in mosia, ‘Sia tanaa inta mowaris kon kapunyaan tanaa. Koḻigai bá ḻimodon naton in sia, bá moiḷabúdon kon i naton in gobá tanaa!’

⁸ Dá dinomokdon monia in adí tatua bo iḻimod. Mayatnea iḷumbú monia kon ḷuai in gobá tatua.”

⁹ Ki Yesus in noḻibó, “Yo onu in aidan i togi gobá tatua in tanaa? Notantúbí kon angoionnea putúan in mototomoyó mita tatua, bo potomoyóneadon kon intau ibanea in gobá in anggur tatua.

¹⁰ Bo tantú kinobacaan bidon monimu in tontagá tanaa kon bonu in Buk Motusi, ‘Batu inta diá pinaké in mogogaid kon bangunan nobaḻídon batu inta totok in moponting.

¹¹ Tuata in aid i Tuhan; totuu mopia!’ ”

¹² Dá itoi mita Yahudi inta nokodongog kon poumpamaan tatua, moḷongasidon totok modomok kon i Yesus, sin kinotaauan monia kon poumpamaan tatua pinopomakusudbí i Yesus kon i monia. Táe moondok in mosia kon intau moantó. Dá sinaḷáanmai monia in ki Yesus.

Pogoguboḻi kon Pajak

¹³ Onda intua tongonumai intau in Parisi bo intau i Herodes pinotabá minayá kon i Yesus bo moḻibó sin potayakan monia kon taḷá-Nea.

¹⁴ Mosia in namangoi bo noḻibó kon i-Nia, “Pak Guru, kinotaauan nami ki Pak Guru in mojujur bo diá moondok kon singog i inekabí. Diábí in bunion i Pak Guru in motundú kon soaḷ inta kinoibog i Allah aidan in intau, sin ki Pak Guru in diábí mopoyoposi intau. Dá tuamai in pogumanka kon inami, ‘Aka podudui in atorang agama naton, motaau degá in moguboḻi kon pajak kon i Kaisar andeka diá? Musti moguboḻi kon pajak in kita mongo diá?’ ”

¹⁵ Táe kinotaauanbí i Yesus in kinomomunapik monia tua. Dá iḻibó-Nea, “Nongonu sin moiko in moibogbí motayak kon taḷá-Ku? Poontongka kon i-Nakó in tobatú doit saḷaka.”

¹⁶ Dá inogoi monia kon i Yesus in tobatú doit saḷaka. Ki Yesus in noḻibó kon i monia, “Gambar bo tangoi ine in naa?” “I Kaisar,” tubag monia.

¹⁷ “Dá aka natua,” kai Yesus, “ogoi kon i Kaisar onu in nobaḻí kapunyaan i Kaisar, bo ogoi kon i Allah onu in kapunyaan i Allah.” Mosia in nongoherang nokodongog kon singog-Nea tatua.

Kobiagan naonda in Matoi

¹⁸ Tongonumai intau nongkon golongan Saduki namangoi kon i Yesus. (Golongan Saduki naa inta noguman kon intau minatoi in diábí biagon bui.)

¹⁹ Mosia in noḻibó kon i Yesus, “Pak Guru, ki Musa in nomais kon hukum tanaa kon inaton: ‘Aka tobatú ḷoḷaki matoi bo diápa kogadí, dá ki utatnea mustibí mobuḷoi kon i baḷunea, sinbá mobogoi in buí kon inia inta ai minatoi tua.’

²⁰ Nokoimontandon in nobaḻí kon i monia pitu mogutat. Inta guya-guyang nobuḷoi, bo minatoi táe diápa kogadí.

²¹ Onda intua ki ai-ainea nogindua nobuḷoi kon i baḷunea tua, táe minatoi domandon in sia bo diápa doman kogadí. Tua in nobaḻí doman kon i utatnea inta intoḷunea,

²² noidapot kon i utatnea impitunea. Pangabisan bobay tatua minatoi doman.

²³ Aka kon singgaidon inta kobiagan bui intau minatoi, yo ki buḷoi ine in bobay tatua? Sin taya pitu mogutat tua komintandon nononibuḷoi kon inia!”

²⁴ Ki Yesus in noguman, “Noitaḷádon totok in raian monimu. Diá komangaḻean monimu in Buk Motusi andeka kawasa i Allah.

²⁵ Sin aka intau mita minatoi mobiagdon bui, yo mosia in diá bidon motonibuḷoi bui, táe mosia in mobiag bidon naonda bo malaekat kon soroga.

²⁶ Bo soaḷ intau minatoi mobiag bui, degá diápa kinobacaan monimu kon bonu in buk i Musa soaḷ díat inta nodokot tua? Kon bonu in tontagá mita tatua pinais kon ki Allah in noguman kon i Musa, ‘Akuoibí naa in ki Allah i Abraham, i Ishak bo i Yakub.’

²⁷ Ki Allah tua in deemanbí ki Allah in intau minatoi. Sia in ki Allahbí in intau nobiag. Noitaḷádon totok in pororai monimu!”

Parenta inta totok moponting

²⁸ Bo namangoidon tobatú mototundú kon agama nokidongog kon pinongonguman i Yesus bo in intau mita inta nongkon golongan Saduki tatua. Mototundú kon agama tatua nokoontong kon mopiabí totok in pinotubag i Yesus kon intau mita tatua. Dá sia in noḻibó kon i Yesus, “Degá parenta taonda in paling moponting nongkon bayongan parenta?”

²⁹ Tubag i Yesus, “Naa in parenta inta paling moponting: ‘Indongogaidon, ei intau Israel! Ki Tuhan tua in ki Allah naton, ki Tuhan tua tongábí tobatú.

³⁰ Totu-totuudon kotabi in ki Tuhan Allahmu, takin ḻimbatú in ginamu, jiwamu, raianmu bo bayongan ropotmu.’

³¹ Bo naa in parenta induanea: ‘Kotabibí in tumpaḷa intau ná kototabimu, kon awakmu tontaní.’ Diá bidon parenta ibanea mako in moponti-ponting nongkon parenta doyowa tanaa.”

³² Dá kai mototundú kon agama tatua, “Noitutui totok intua Pak Guru! Totuubí in guman-Mu: Tongábí tobatú in Tuhan, Sia tuata in ki Allah, bo diábí ibanea mako.

³³ Bo intau in mustibí totu-totuu motabi kon i Allah kon bonu in ginanea, bo kon bonu in raiannea bo ropotnea. Bo mustibí doman in sia motabi kon tumpaḷa intau ná kototabinea kon awaknea tontaní. Tuabí in mopia-pia nongkon mobogoi in sosumba inta kuruban tubáan bo kuruban mita ibanea kon i Allah.”

³⁴ Inontong i Yesus in mototundú kon agama tatua mopiadon in pototubagnea. Dá ki Yesus noguman kon inia, “Iko in motoyongdon mobaḻí anggota in umat i Allah.” Nopaḷut mako kon tua diádon tobatúmai intau nokobaḻí mopoḻibó-ḻibó kon i-Nia.

Soaḷ Datu Moposaḷamat

³⁵ Wakutu in ki Yesus yogot mobogoi in totundú kon bonu in Baḷoi Tuhan, noḻibó in Sia nanaa, “Naondabí degá sin mototundú mita kon agama motaau moguman kon ki Datu Mopoposaḷamat tua in buí i Daud?

³⁶ Bokaka ki Daud tontaní kon dodai in kinawasa in Roho i Allah – noguman, ‘Ki Tuhan nogumandon kon i Tuhanku: ḻitúdon kon dotá in koḷanan-Ku modapot in potungkud-Ku in bayongan saturu-Mu.’

³⁷ Dá aka ki Daud monangoi kon i Datu Mopoposaḷamat tatua ‘Ki Tuhan’, yo naondabí kon Sia tua in buí i Daud?” Bayongan intau inta kon bonu in Baḷoi Tuhan, komintan mosanang in gina in mokodongog kon i Yesus notundú.

Tompoingat sinbá mokopoingat kon mototundú mita kon agama

³⁸ Sia in noguman kon i monia, “Mokopoingatdon kon mototundú mita kon agama. Mosia moibog-ibog modondaḷoi bo mogi jubah moḷanggó bo moibo-ibog doman horomaton kon pasar.

³⁹ Mosia in moibo-ibog doman ḻimitú kon tampat inta mopia aka kon bonu in baḷoi pososambayangan bo kon poramean mita.

⁴⁰ Mosia in monguboḷ kon intau mita inta dongkadon boba-bobay bo mogagow kon baḷoi monia. Aid mita monia moraat oḻingoian monia in sambayang inta mobanat. Mosia tua in notantú bidon kon motarimabí kon hukuman inta moiḻiu in bogat!”

Sosumba in tobatú boba-bobay

⁴¹ Kon singgai tobatú ki Yesus iḻimitú sinumayow in kas pobobonuan kon sosumba kon Baḷoi Tuhan, poḷat noindoimai mako kon intau mita mopobonu in doit monia kon kas tatua. Nobayong in intau nooyúon nopobonu in doit mobayong.

⁴² Kon tua namangoi domandon in tobatú intau inta dongkadon boba-bobay inta nobiag nobogá. Sia nopobonu doman in doitnea tambaga doyowa, doit logam inta paling mointok in nilainea.

⁴³ Dá ki Yesus in nogoiní kon murí-Nea mita bo noguman kon i monia, “Tarukira in naa: Inta inogoibí in intau boba-bobay bo bogá tatua in mobayo-bayong nongkon inta inogoi in intau mita ibanea.

⁴⁴ Sin mosia in nobogoi nongkon kalebean monia. Táe intau boba-bobay tatua in umpaka nobiag nobogá totok in sia, táe sia in nobogoibí in bayongan onu inta oyúon kon inia – inta totokpabí in paraḷunea pakéon kon kobiagannea.”