MARKUS 11 - Alkitab Singog In Mongondow Masa In Tanaa

Ki Yesus sinontomu kon Yerusalem takin Pia in Gina

¹ Wakutu in mosia nodiugdon kon Yerusalem, mosia noiyaputdon in kotá in Betpage bo Betania, kon oyuk in buḷud in Zaitun. Kon tua ki Yesus nopotabá in murí-Nea doyowa,

² takin koyow, “Bayádon kon ḻipú inta kon tayowonmai tatua. Naonda in moiko tumuot kon ḻipú tatua, moiko in mokoontong kon tobatú ki adí in keledai inta kotogo-togot. Keledai tatua diápa dodai onda in sinakoian intau. Bukádon togot in keledai tatua bo dia mangoi.

³ Bo aka oyúon intau in moḻibó mongo nongonu sin bukaanbí monimu in keledai tatua? dá poguman, ‘Ki Tuhan moparaḷu, bo ḷagion-Neabí pobuion.’ ”

⁴ Dá minayá in murí-Nea taya dua tua bo nokodungkuḷ kon ki adí in keledai inta sinogot kon tayowon baḷoi kon bingkí in daḷan. Dá binukádon monia in keledai tatua.

⁵ Bo intau inta sinimindog mako kon tua in noḻibó kon i monia, “Ei! Mongonu in moiko? Nongonu sin bukaanbí monimu in keledai tanion?”

⁶ Bo sinubagan monia ná singog inta pinoguman i Yesus kon i monia. Dá pinomayádon mako in intau mita tatua in pinodiaan monia kon keledai tatua.

⁷ Wakutu in noiyaputdon kon i Yesus in keledai tatua, inaipandon monia in jubah in ḻikud in keledai tatua, bo sinumakoidon in ki Yesus kon keledai tatua.

⁸ Mobayong intau in mopoompat in jubah monia kon daḷan, oyúon doman in moporarit in tanga mita mongointok kon daḷan, tanga inta ginamá monia nongkon gobá.

⁹ Mosia inta kon muna bo inta dumuduianmai nongkon tumi Yesus komintan mopobaḷú, “Dinayo-dayowdon in ki Allah! Binarakatandon in Sia inta namangoi kon bonu in tangoi Tuhan!

¹⁰ Mobiagdon in pomarentaan-Nea kon singgai moiduduimai – pinomarentaan i Daud mogoguyang naton! Dinayo-dayowdon in ki Allah Inta Totok moḷantud!”

¹¹ Noiyaputmai kon Yerusalem sinumuot in ki Yesus kon Baḷoi i Allah. Kon tua Sia nonarukira kon bayongan yagi-yagi. Táe popisí in noungkoḷomdon dá sia takin murí-Nea mopuḷú bodoyowá minayádon in Betania.

Ki Yesus nogodi-godi kon pangkoi ara

¹² Nopoikoḷomai kon singgai, naonda in ḷumuaidon mosia kon Betania inangoian gogoy in ki Yesus.

¹³ Nongkon moyayúpa inontong-Neadon in pangkoi in ara inta nobambar. Dá nongandupa in Sia notayak kon ḷabú in bungainea. Táe diábí tobatúmai in nouḻí-Nea, koḻikud in daunnea mita, sin dodai intua deemanpabí doman pomomungai in ara.

¹⁴ Bo ki Yesus in noguman kon pangkoi in ara tatua, “Pinangkoi kon tanaa mako diá bidon tobatúmai intau in mokaanpa bui kon bungaimu!” Dinongog in murí-Nea mita in singog-Nea tatua.

Ki Yesus sinumuot kon Baḷoi Tuhan

¹⁵ Onda intua mosia noiyaputdon kon Yerusalem, bo ki Yesus minayá bui in Baḷoi Tuhan. Kon tua Sia noguntun kon intau mita inta morodagang kon palas in Baḷoi Tuhan tatua. Binaḻintuang-Nea in meja mita monia inta pononoḻiuan kon doit, bo bangko mita in intau mopopotaḷui in paḷoma.

¹⁶ Bo diá tobatúmai intau in ogoi-Nea modia kon onukadon in tumaḻib mongin palas in Baḷoi Tuhan tatua.

¹⁷ Noiduduimai kon tua ki Yesus nobogoi in totundú kon intau mita kon tua. Sia in noguman, “Kon bonu in Buk Motusi ain pinais: Ki Allah in noguman, ‘Baḷoi-Ku in tangoionbí Baḷoi Pososambayangan in bayongan bangusa.’ Táe tanaa in binaḻí bidon monimu pugad in mogogagow!”

¹⁸ Singog-Nea tatua dinongog in imang mita itoi bo mototundú mita kon agama in Yahudi. Dá nomangkoidon in mosia motayak kon naonda in poḷoḻimod kon i Yesus. Mosia in moondok kon i-Nia sin bayongan intau mopia in gina mokodongog kon totundú-Nea.

¹⁹ Naonda in noungkoḷomdon, ki Yesus bo murí-Nea mita iḷumuaidon kon kotá tatua.

Totundú nongkon pangkoi in ara

²⁰ Doḷo-doḷom nobangon monik, wakutu in mosia noitaḻib kon pangkoi in ara tatua, inontong monia minatoidon pangkoi in ara tatua nodapot in uakatnea mita.

²¹ Bo kinotoropan bui i Petrus onu inta nobaḻí koḷabung. Dá ki Petrus in noguman kon i Yesus, “Pak Guru, indoiaika! Pangkoi in ara inta inodi-odian i Pak Guru tua aindon minatoi!”

²² Kai Yesus, “Popirisayadon kon i Allah.

²³ Dá totuu kon moiko in motaaubí moguman kon buḷud tanaa, ‘Pobuatdon bo ḷabúdon kon bonu in dagat!’ bo mobaḻíbí doman intua kon i monimu; asaḷ bo diá moḻia-ḻiaw in gina monimu, bo mopirisaya in moiko kon onu inta siningog monimu tua in totu-totuubí mobaḻí.

²⁴ Manangka intua yo torop in naa: Aka moiko mosambayang bo oyúon in igumon, yo popirisayabí kon inogoibí i Allah kon inimu onu inigum monimu tua, dá tarimaanbí monimu intua.

²⁵ Bo aka moiko mosambayang, táe oyúonpa intau diá kinosanang in ginamu, yo ampungaipa muna in intau tatua, sinbá ampungan doman i Amámu inta kon soroga in bayongan dosamu. [

²⁶ Aka diá ampunganmu intau ibanea, yo diá doman ampungan i Amámu kon soroga in bayongan dosamu.]”

Ḷoḻibó kon Hak i Yesus

²⁷ Mosia in namangoi bui in Yerusalem. Bo wakutu in ki Yesus minayá noḻibu kon bonu in Baḷoi Tuhan, imang mita itoi, mototundú mita kon agama bo itoi mita intau in Yahudi namangoi kon i-Nia.

²⁸ Mosia noḻibó, “Onu in dodoyonanmu mogaid kon naa komintan? Ki ine in nobogoi in hak tatua kon ini-Mu?”

²⁹ Ki Yesus in noguman, “Akuoi in moḻibó doman kon i monimu. Bo musti tubagan monimu sinbá poguman-Ku doman kon i monimu mongo hak i ine in pinaké-Ku nogaid kon soaḷ mita tanaa.

³⁰ Ki ine in nobogoi in hak kon i Yohanes Mobobaptis, ki Allah andeka intau?”

³¹ Dá nomangkoidon noyosingog in imang mita itoi bo itoi mita intau Yahudi. Mosia in noguman, “Aka kai naton, ‘Nongkon i Allah,’ Yo ḻibóon-Nea bui, ‘Aka natua yo nongonu sin moiko in diábí mopirisaya kon i Yohanes?’

³² Táe moyoyigabí doman aka poguman naton, ‘Hak nongkon intau.’ ” Sin mosia moondok kon intau mobarong, sin intau mobarong tatua nonganggapdon kon ki Yohanes tua in nabibí.

³³ Dá tuamai mosia notubag, “Diá kotaauan nami.” Ki Yesus in noguman kon i monia, “Aka natua, yo diábí doman poguman-Ku kon i monimu, mongo hak i ine in pinaké-Ku nomia kon tua komintan.”