MARKUS 1 - Alkitab Singog In Mongondow Masa In Tanaa

Ki Yohanes Mobobaptis

¹ Naa in Habar Mopia soaḷ ki Yesus Kristus, ki Adí i Allah.

² Habar Mopia tatua in pinangkoi ná inta pinais i Nabi Yesaya, nanaa, Ki Allah in noguman: “Naadon in totabá-Ku, ‘Pinotabá-Ku in sia umuna kon ini-Mu, sinbá sia in momontang kon daḷan bayáan-Mu.’

³ Oyúon intau in nobaḷú kon padang gurun, ‘Sadiaaidon in daḷan kon i Tuhan; tuḻidon in daḷan bayáan-Nea.’ ”

⁴ Naonda inta pinais dá natua domandon in ki Yohanes noiangoi kon padang gurun. Sia in nobaptis kon intau bo nopotaau in Habar nongkon i Allah. Ki Yohanes noguman, “Moiko in musti mogogaidon in mogaid kon dosamu mita bo musti baptison, sinbá ampungan i Allah in moiko.”

⁵ Dá bayongan intau inta nongkon butá in Yudea bo inta nongkon kotá in Yerusalem namangoi nokidongog kon i Yohanes. Mosia in nongaku kon dosa mita monia, bo binaptis i Yohanes in mosia kon Ongkag in Yordan.

⁶ Ki Yohanes in nogiḷambung in ḷambung inta nongkon bubuḷ in unta. Baannea in nongkon kuḻit bo kaanonnea i pangkoḷá bo biluk in kayuon.

⁷ Sia in noguman doman nanaa: “Moiduduimai kon inakó, moiangoi in intau inta kawasa-Nea noiḻiu kon inakó. Umpaka tongá kumuyung mobuká kon togot in sapatu-Nea, yo diábí patus in akuoi.

⁸ Akuoi in mopobaptis kon i monimu in tubig, táe Sia in mopobaptis kon i monimu in Roho i Allah.”

Ki Yohanes nobaptis kon i Yesus

⁹ Kon wakutu intua namangoi in ki Yesus nongkon Nazaret butá in Galilea bo binaptis i Yohanes kon Ongkag in Yordan.

¹⁰ Naonda in ki Yesus nobatundon nongkon tubig tatua, inontong-Nea in ḷangit nobukat bo Roho i Allah noponag dinumompá kon i-Nia naonda bo paḷoma.

¹¹ Poḷat kinodongogan in singog i Allah noguman, “Ikobí in ki Adí-Ku inta kinotabi-Ku, Ikobí in kinosanang in gina-Ku.”

Ki Yesus sinoba Ibilis

¹² Noiduduimai kon tua Roho i Allah nodia kon i Yesus minayá in padang gurun.

¹³ Opat nopuḷú nosinggai Sia in kon tua, bo sinoba ibilis in Sia. Mahaḷuk mita kaḻig kotaki-takin-Nea doman kon tua, bo malaekat mita namangoi nobantung kon i-Nia.

Ki Yesus nogoiní kon murí opat inta mododomok kon toyá

¹⁴ Naonda in ki Yohanes dinomok pinobonu kon ponjara, ki Yesus minayá in Galilea, bo nopotaau kon tua in Habar Mopia inta nongkon i Allah.

¹⁵ Ki Yesus in noguman, “Ki Allah in ḷagidon momangkoi momarenta. Pogogaidon moiko in mogaid kon dosa bo popirisayadon kon Habar Mopia inta nongkon i Allah!”

¹⁶ Wakutu in ki Yesus minayá nongin pintad in Danow Galilea, nokoontong in Sia kon intau doyowa inta mododomok kon toyá in oaidan monia. Ki Simon bo ki ai-ainea ki Andreas in tangoi monia. Mosia in koyogot molandará kon danow tatua.

¹⁷ Ki Yesus in noguman kon i nayadua, “Duduidon kon i-Nakó, bá baḻíon-Kudon in moiko mololandará kon intau.”

¹⁸ Dá baya-bayádon sinaḷáan monia in landará bo dinumudui kon i Yesus.

¹⁹ Ki Yesus nongingguput kon bobayáan-Nea bo nokoontong doman bui kon intau doyowa mogutat ibanea, ki Yakobus bo ki Yohanes in tangoi monia. Taya dua naa ki adí i Zebedeus. Mosia naa kon bonupa in uangga monompiamai kon landará monia.

²⁰ Daḻí bo inoiní i Yesus in mosia. Dá sinaḷáanmaidon monia in ki amá monia inta kon bonupa in uangga takin intau mita inta ginajian i amá monia. Bo minayádon in mosia dinumudui kon i Yesus.

Intau inta kinotoḷangan dimukud moraat

²¹ Ki Yesus bo murí-Nea mita noidapotdon kon kotá in Kapernaum. Kon singgai in Sabat noiduduimai, ki Yesus sinumuot kon baḷoi pososambayangan bo nomangkoidon notundú.

²² Intau mita inta nokodongog noherang bo moibog kon pototundú-Nea. Sin pototundú-Nea in mokobangkaḷ, deeman ná pototundú in guru mita in agama.

²³ Kon wakutu intua kon bonu in baḷoi pososambayangan tatua oyúon tobatú intau inta kinotoḷangan in dimukud moraat. Intau tatua in nomaḷú,

²⁴ “Ei Yesus, intau in Nazaret, onuon-Mu in kami? Mamangoi degá momutú kon inami in Iko? Kotaauankubí in Iko: Iko nion in totabá i Allah inta motusi!”

²⁵ “Kibio-biómai!” torú i Yesus kon dimukud moraat tatua, “Ḷuaidon nongkon intau tanaa!”

²⁶ Dá totokdon in ginugur in dimukud moraat in intau tatua, onda intua takin karak iḷumuaidon in dimukud moraat tatua nongkon intau tatua.

²⁷ Bayongan intau nongoherang totok, dá nosiḻiboandon in mosia, “Onu in naa? Tobatú totundú mobagu! Takin bangkaḷon bo kawasa Sia nomarenta kon dimukud mita moraat, bo dinuduian doman monia in singog-Nea.”

²⁸ Dá habar soaḷ ki Yesus ḷagidon noiwaya kon bayongan butá in Galilea.

Nobayong intau inundaman i Yesus

²⁹ Naonda iḷumuai mako nongkon baḷoi pososambayangan tatua, ki Yesus takin i Yakobus bo i Yohanes minayá in baḷoi i Simon bo i Andreas.

³⁰ Dodai intua ki guyá i Simon noitosiug mako sin notakit pinonikan in patú. Dá naonda in ki Yesus bo murí-Nea mita noiponikmai kon baḷoi, baḷúdon monia bo pinotaau kon i Yesus.

³¹ Dá ki Yesus minayá dinimiug kon i guyá i Simon poḷat nokadai kon ḻimanea sinbá mobangon. Kon dodaipa doman tua bo nopia in patúnea, bo baḷúdon in bobay tatua bo nogoḷud kon kaanon kon imonia.

³² Naonda in noungkoḷomdon singgai, intau mita nopodondon mangoi kon i Yesus in intau nongotakit bo inta kinotoḷangan in dimukud moraat.

³³ Bayongan intau kon kotá tatua noyosipun kon muna in baḷoi tatua.

³⁴ Dá bayongan takit inta norupa-rupamai kon intau mita tatua nodait inundaman i Yesus, ná doman tua in dimukud mita inta moraat, nodait-Nea doman sinokountun. Diá-Nea inogoi mosingog in dimukud mita moraat tatua, sin kinotaauan monia in Sia.

Ki Yesus Kon Galilea

³⁵ Nopoikoḷomai kon singgai, subupa, nobangondon in ki Yesus bo iḷumuai. Sia minayá in tampat inta noitontaní bo nosambayang kon tua.

³⁶ Táe binayá sinayak i Simon bo yobayat-Nea mita.

³⁷ Naonda in noyodungkuḷdon monia in ki Yesus, pinotaau monia, “Bayongan intau notayak kon i Guru.”

³⁸ Tongá ki Yesus in noguman, “Koḻigai, kita mayápa in kotá mita ibanea inta kon diugmai naa, sinbá potaau-Kupa doman kon i monia in Habar Mopia, sin tuabí in mangaḻe inangoian-Ku.”

³⁹ Dá ki Yesus minaya-mayádon mako kon bayongan in ḻipú kon Galilea bo nopotaau in Habar Mopia kon bonu in baḷoi pososambayangan monia bo noguntun kon dimukud mita moraat.

Ki Yesus nongundam kon intau inta panyaki kuḻit mokorongó

⁴⁰ Tobatú intau inta pinanyaki kuḻit inta mokorongó in namangoi kon i Yesus bo sinumungkud kon tayowon-Nea poḷat noguman, “Aka kuma bo totabionpa i Amá, yo mopiabí i Amá in akuoi.”

⁴¹ Dá notabi in ki Yesus kon intau tatua, dá kinadaian-Nea intau tatua bo poḷat noguman, “Motabi in Akuoi, yo kopiadon!”

⁴² Kon dodaipa doman tatua bo noinggamá in panyaki tatua bo nopiadon in intau tatua.

⁴³ Onda intua ki Yesus nopotabá kon intau tatua takin koyow:

⁴⁴ “Pokoingat, donaai oumanon kon i inekadon, táe bayádon kon i imang bo pokitantúdon kon inia kon iko in totu-totuudon nopia. Bo pobogoi in iko kon sosumba sukurmu podudui in atorang i Musa mobaḻí bukti kon intau mita kon iko in nopiadon.”

⁴⁵ Táe intau tatua minayábí bo nongonguman magí-mako kon onu inta nobaḻí kon inia tua, sahingga in ki Yesus diádon mobebas tumuot kon kotá tatua. Sia in tongádon kon ḷuai in kotá, kon tampat mita inta moingongow. Táe bayongan intau inta nongkon ḻipu-ḻipúannea umuran doman mamangoi kon i-Nia.