MALEAKHI 3 - Alkitab Singog In Mongondow Masa In Tanaa

¹ Tubag i Tuhan Inta Totok in mokawasa, “Akuoi in mopotabábí in totabá-Ku mita sin moposadia in daḷan bayáan-Ku. Dá baḷúdon in Akuoi, ki Tuhan inta sinayak monimu, in mamangoidon in Baḷoi-Ku. Totabá-Ku inta sinano-tanob monimu tatua in mamangoi bo mopotaau in dodandian-Ku.”

² Táe ki ine in mokotongod kon singgai ki Tuhan mamangoi mokipogontong in awak-Nea? Sin Sia in naonda bo tuḷú in mononontaḷ kon logam, bo naonda bo sabong in momomatá.

³ Sia in mamangoi sin mohakim, naonda bo intau inta mondarit bo mopomurni in saḷaka. Naonda bo intau momomia kon logam mopomurni in buḷawan bo saḷaka, natuata in totabá i Tuhan in mopomurni in imang mita sinbá mosia in moposumba in kuruban mita podudui kon onu inta kinoibog i Tuhan.

⁴ Dá nádon kon dungkuḷmai, ki Tuhan in moibogdon kon kuruban mita inta posumba kon i-Nia in umat in Yohuda bo Yerusalem.

⁵ Guman i Tuhan Inta Totok in mokawasa, “Akuoi in mamangoibí kon inimu sin mohakim. Akuoi in ḷagidon mobaḻí sakusi kon mososihir mita, kon intau mita inta mototuaḻingan, inta noguman kon uboḷ, inta notombogá kon dodai in nobogoi in gaji kon intau inta sinondanan, inta nondorot kon intau boba-bobay, uno-unon, bo intau ango-angoi, bo kon intau mita inta diá mohoromat kon i-Nakó.”

Sosumba mopuḷú noporosen

⁶ “Akuoibí in ki Tuhan, bo Akuoi in diábí mobaḷui. Tuamai in moiko buí i Yakub, diá iyopú.

⁷ Naonda bo mogoguyang monimu koḻipod, moiko komintan in sinumabatdon kon hukum-Ku mita bo diá nosatia in nopobayá intua. Pobuidon mangoi kon i-Nakó, dá Akuoi in mamangoidon bui kon inimu. Táe moiko in moḻibó, ‘Onu in musti aidan nami sinbá mobui kon ini-Mu?’

⁸ Tanaa in Akuoi moḻibó kon inimu: Motaau degá akaḷan in intau in ki Allah? Notantúbí kon diá. Táe moiko in monguboḷbí doman kon i-Nakó. Moiko in moḻibó, ‘Naonda?’ Tubag-Ku: Kon daḷom in moguboḻi kon mopuḷú noporosen bo mobogoi in sosumba.

⁹ Bayongan in bangusa in nonguboḷ kon i-Nakó, dá moiko komintan in kotugatanbí in kutuk.

¹⁰ Diadon in mopuḷú noporosenmu komintan kon Baḷoi-Ku sinbá oyúon in kaanon mobayong totok kon tua. Tungkuḷaidon in Akuoi, dá ontongbí monimu kon Akuoi in momukat kon ḷoḻingkop mita in soroga bo mobogoi kon i monimu in bayongan inta mopia.

¹¹ Diábí pomayá-Ku mako in pangkoḷá momoguyaat kon bungai in boyómu, pangkoi mita in anggurmu in modatogbí totok in bungainea.

¹² Dá moiko in tangoion bidon in bayongan intau moḷunganga, sin butámu mobaḻí tampat inta totok in mopia pogutunan.”

Ki Allah in nopodandi in tabi

¹³ Ki Tuhan in noguman, “Tosingogonmu mita in totuubí kon mopoompámai kon i-Nakó.” “Táe moiko in moguman, ‘Onu degá in siningog nami kon ini-Mu?’

¹⁴ Moiko in noguman, ‘Diábí in mangaḻenea in mogundoi kon i Allah. Onubí in baragunanea in mopobayá in oaidan naton kon i Tuhan Inta Totok in mokawasa, andeka mopoontong kon i-Nia kon kita in nomanasaḷdon kon aid naton inta noitaḷá?

¹⁵ Inontong bidon naton tontaní kon intau mita inta moḷoḷatú in moḷungangabí. Intau moraat in deemanbí tongá modugang motomoman, táe mosia in monungkuḷbí doman kon kososabar i Allah pongin aid monia moraat, bo mosia in moisimparutbí doman.’ ”

¹⁶ Bo intau mita inta moondok kon i Tuhan in mosigumanan, Ki Tuhan in nokodongog bo nonaridi kon onu inta siningog monia. Intau mita inta nohoromat kon i-Nia bo inta notoguondok kon i-Nia, pinais in tangoinea kon bonu in buk pomomaisan inta kon tayowon-Nea.

¹⁷ Ki Tuhan Inta Totok in mokawasa in noguman, “Mosia in mobaḻí umat-Ku. Kon singgai Akuoi mopobayá in oaidan-Ku, mosia in mobaḻí umat inta totok in kinotabi-Ku. Kotabi-Kubí in mosia, naonda bo guyanga ḷoḷaki motabi kon i adínea inta nogaid dinumudui kon ibognea.

¹⁸ Umat-Ku in mokoontongbí doman kon yoposi in ukur in intau mopia bo intau moraat, kon sigad in intau inta mogundoi kon i-Nakó bo inta diá.”