MALEAKHI 2 - Alkitab Singog In Mongondow Masa In Tanaa

¹ Ki Tuhan Inta Totok in mokawasa in noguman kon imang mita, “Naa in parenta-Ku kon inimu:

² Horomatdon in Akuoi pongin aidmu. Aka moiko doí mokidongog kon tosingogon-Ku, moiko in kutukon-Ku. Bayongan inta tarimaan monimu saḷaku rijiki in mobaḷuidon kutuk. Totuubí, bayongan inta mopia in kinutuk-Kudon, popisí in moiko in doí mopandungmai kon parenta-Ku.

³ Ki adímu mita in tokohukumon-Ku, bo pogotmu in ḻepoan-Ku in taai in biag inta pinokuruban monimu, bo moiko in pogambat kon bonturungan in taai.

⁴ Dá kotaauandon monimu kon parenta tanaa in inogoi-Kudon, sinbá dodandian-Ku takin imang mita, buí i Lewi, umuranbí pakéon.

⁵ Kon dodandian tatua Akuoi in nopodandi kon i monia in kobiagan inta moodom bo motompia, bo mosia in pinotabá-Ku mohoromat kon i-Nakó. Kon dodai intua mosia in nohoromatbí bo motoguondok kon i-Nakó.

⁶ Mosia in motundú kon inta totuu, bo deemanbí inta noitaḷá. Mosia in mobiagbí modagin kon i-Nakó, bo takin gina motuḻid dumudui kon ibog-Ku. Mosia in motuḷung doman kon mobayong in intau sinbá diádon mogaid kon inta moraat.

⁷ Totuu kon nobaḻí oaidan in imang mita in motundú kon inta mobanar soaḷ Akuoi, ki Tuhan Inta Totok in moḷantud. Kon i monia tuata in poḻibóan in rayat mongo onu in koibog-Ku, sin mosia tua in totabá-Ku mita.

⁸ Táe tanaa, moiko, imang mita, sinumabatdon nongkon daḷan inta moitutui. Totundúmu mita ain nokopopisí kon nobayong in intau in mogaid kon inta moitaḷá. Moiko in nomoguyaatdon kon dodandian inta pinomia-Ku takin i monimu.

⁹ Dá baḻíon-Kubí doman in moiko poompáanmai in umat in Israel sin moiko in diá notoindudui kon koibog-Ku, bo popisí in moiko mopoyo-poyoposi kon intau kon dodai in motundú kon umat-Ku.”

Rayat dia motoindudui kon i Allah

¹⁰ Kita naa in koamábí kon inta notongkai! Kita naa in binaḻí i Tuhan notongkai! Aka natua, yo nongonu sin mosiḻionganbí kon dodandian bo takin aid natua moḻiongdon kon dodandian inta pinomia i Allah takin mogoguyang naton!

¹¹ Umat in Yohuda ain iḻimimpat kon dodandian i Allah takin i monia bo nogaidon kon inta mokokoningkim kon Yerusalem bo sinangkub in butá. Mosia in nongotordon kon Baḷoi i Tuhan inta kinotabinea bo notonibuḷoi in bobay mita inta nosumba kon dewa mita in bangusa ibanea.

¹² Igumon mako intau mita inta nogaid kon natua in poyayúondon i Tuhan nongkon umat in Israel. Igumon mako mosia in diádon dumudui kon bangusa naton moposumba in kuruban mita kon i Tuhan Inta Totok in mokawasa.

¹³ Bo naa in aidmu inta ibanea. Mezbah i Tuhan in pinuḻingandon monimu in ḷuá; moiko in nongombaḷ bo mogamui sin ki Tuhan in doídon kon kurubanmu mita.

¹⁴ Moiko in moḻibó nongonu sin doíbí in Sia motarima. Popisí in kinotaauan i Tuhan in moiko kon diá motoindudui kon bobay inta sinonibuḷoi monimu kon dodai in noguodpa. Bobay tatua in yobayat kon kobiaganmu, táe moiko in nomaḻidawandon kon inia, Umpaka kon tayowon i Allah moiko in nodandidon kon umuran motoindudui kon i-Nia.

¹⁵ Kinotaauan monimu kon ki Allah Inta Totobatú tua noponobatúdon kon awak bo jiwa takin bobay tatua? Onu degá in makusud i Tuhan kon tua? Tongábí bá moiko in mokouḻí kon adí mita inta mobaḻí umat i Allah inta mopia. Dá ḷukadaibí in awakmu, dika modapot in oyúon in kon sigad monimu inta diá mosatia kon i buḷoinea bobay.

¹⁶ “Kodoí-Kubí in gogaatan,” guman i Tuhan Allah in Israel. “Kodoí-Kubí aka tobatú kon sigad monimu in mogaid kon ná tatua in koḻingánea kon i buḷoinea bobay. Dá ḷukadaidon in awakmu bo dika mokoimontanmai in momaḻidawan kon i buḷoimu.”

Singgai ponisigan nodiugdon

¹⁷ Binaḻí monimu in ki Allah mobú in mokodongog kon oumanmu. Táe moiko in moḻibó, “Yo naondabí in pinopobú nami in ki Tuhan?” Takin tosingogon, “Bayongan in intau inta nogaid kon inta moraat in inanggap mopia i Tuhan, bo kinoibog-Nea in mosia.” Andeka moḻibó, “Kon onda in ki Allah inta inanggap moadil tatua?”