LUKAS 9 - Alkitab Singog In Mongondow Masa In Tanaa

Ki Yesus nopotabá in murí-Nea mopuḷú bodoyowá

¹ Ki Yesus nogoiní kon murí-Nea inta mopuḷú bodoyowá bo nobogoi in kawasa moguntun kon dimukud moraat bo mongundam doman kon bayongan takit.

² Onda intua nopotabá kon i monia minayá nopotaa-taau mako in Habar Mopia kon naonda in ki Allah mamangoi momarenta saḷaku Datu poḷat mongundam kon intau mita inta notakit.

³ Naa in koyow-Nea kon i monia, “Donaaibí modia kon onu bo onu in kon binayáan. Dika doman modia kon tungkud andeka baḷun, kaanon andeka doit, andeka ḷambung pomaḷuian.

⁴ Aka moiko bo ain sinarima kon baḷoi tobatú, dá pogutundon kon tua modapot in mopaḷut in oaidanmu kon kotá tatua.

⁵ Bo aka oyúon in intau inta doí motarima kon i monimu, yo ḷuaidon kon kotá tatua bo topirai in ḷobud kon sioḷmu saḷaku tompoingat kon i monia.”

⁶ Dá minayádon in murí i Yesus mopuḷú bodoyowá tatua bo sindaḷan nopoyaput in Habar Mopia poḷat doman mongundam kon intau mita inta nongotakit kon ḻipu mita inta kinobayáan monia.

Ki Herodes bo ki Yesus

⁷ Naonda in ki Herodes, datu kon wilayah tatua nokodongog kon bayongan inta ain nobaḻí tatua, nobingung in sia, sin oyúon doman intau in moguman kon ki Yohanes in nobiagdon bui.

⁸ Oyúon doman in noguman, “Ki Elia namangoidon bui, bo oyúon doman in noguman, tobatú nabi tungkuḷ intua nobiagdon bui.”

⁹ Ki Herodes in nosingog nanaa, “Akuoi ain nopotabá kon intau nomongkó kon uḷu i Yohanes. Yo ki Inebí in sia tanaa inta kain habar ain nogaid kon inta nokoherang totok kon intau.” Dá sia in umuran moramuji sinbá moyodungkuḷ i Yesus.

Ki Yesus nopokaan intau ḻima noribu

¹⁰ Bo naonda in rasuḷ mita inta pinotabá i Yesus nobuidon mangoi, inouman monia kon i Yesus in onu inta ain pinomia monia. Dá dinia i Yesus in mosia minayá sinumontaní kon tobatú kotá, tangoinea kotá in Betsaida. Tongá ki Yesus bo murí-Nea mita in kon tua.

¹¹ Táe naonda in kinotaauan in intau mobayong tatua, dinuduian monia in Sia. Dá pinomayá-Neadon mako mosia in dinumudui kon i-Nia. Kon tua ki Yesus nopoyaput in Habar kon naonda in ki Allah momarenta saḷaku Datu bo nongundam doman kon intau mita inta notakit kon tua.

¹² Naonda in noungkoḷomdon in singgai, namangoidon kon i-Nia in murí-Nea inta mopuḷú bodoyowá tatua bo noguman, “Pak Guru, poki pobuiaidon in intau mita tanion sinbá motaaupa in mosia motayak kon pongaanan bo pogogaian monia kon ḻipú inta nodiugmai kon naa, sin noyayú bo noitontaní totok in tampat naton naa.”

¹³ Táe ki Yesus in noguman kon i monia, “Moikobí in mobogoi in kaanon kon i monia tua.” Dá kai monia doman, “Kon inami tongá oyúon in roti ḻima bo toyá doyowa. Koḻikudbí in aka mayá motaḷui in kami dá oyúon in ogoi kaanon monia?”

¹⁴ (Aka iaponmai in intau kon tua, yo degá ḻimamai noribu in kobayongnea komintan intau ḷoḷaki.) Dá ki Yesus in noguman kon murí-Nea mita, “Pokiḻitúaidon komintan in mosia kolo-kolompóon, tokolompok toḷoḻimamai nopuḷú in intau.”

¹⁵ Murí-Nea mita nogaid kon onu inta ain pinoguman kon i monia. Pinoki ḻitúandon mita monia in intau moantó tatua.

¹⁶ Onda intua ginamádon i Yesus in roti ḻima bo toyá doyowa nobungá tatua, bodongka iḷumangag kon ḷangit bo nosukur kon i Allah. Onda intua binonsi-bonsig-Nea in roti tatua bo inogoi kon murí-Nea mita pinoki silai kon intau moantó tatua.

¹⁷ Mosia nongaan komintan dapot in nobotug. Onda intua sinipun monia in ki agat mita in roti tatua. Nosipun magí yo mopuḷúpa bodoyowá nokompé.

Pinongakuan i Petrus kon i Yesus

¹⁸ Kon singgai tobatú, wakutu in ki Yesus yogot nosambayang, murí-Nea mita namangoi kon i-Nia. Dá ki Yesus in noḻibó kon i monia, “Aka podudui guman in intau, yo ki ine in Akuoi naa?”

¹⁹ Dá mosia in notubag, “Oyúon in noguman ki Yohanes Mobobaptis. Oyúon doman in noguman ki Elia, ibanea doman in noguman tobatú nabi tungkuḷ intua bo nobiag bui.”

²⁰ Ki Yesus in noḻibó bui kon i monia, “Aka podudui in raian monimu, yo ki ine in Akuoi naa?” Dá ki Petrus in notubag, “Ki Amá in Datu Mopoposaḷamat inta pinodandi i Allah.”

Ki Yesus nongonguman kon roriga bo popatoi-Nea

²¹ Bo ki Yesus in noguman kon murí-Nea mita, “Donaai poguman magí-mako monimu kon i inekadon.”

²² Bo ki Yesus in noguman doman nanaa, “Ki Adí Intau mustibí motarima kon roriga mobayong, bo Sia in bayowan in itoi mita in ḻipu, imang mita itoi bo mototundú mita kon agama bo ḻimodon, táe kon singgai intoḷunea biagon bui.”

²³ Onda intua Sia in noguman doman kon i monia, “Intau inta moibog dumudui kon i-Nakó, mustibí ḻiongonnea in oaidannea tontaní, bo momotaan kon roriganea pomuḷoi in singgai bo umuran dumudui kon i-Nakó.

²⁴ Sin intau inta tongá umuran moibog mogaid kon oaidannea tontaní, kobuḻian in kobiagannea, táe intau inta moibog moḻiong kon rupa-rupa sin mogaid kon oaidan-Ku, mosaḷamat in sia.

²⁵ Onubí in baragunanea, intau mokouḻí kon bayongan rupa-rupa inta mopira kon dunia naa, aka tua komintan bo tongá mokobodito kon inia?

²⁶ Sin intau inta mooyá in mongaku kon sia tua in dumodudui-Ku bo mooyá in mogaid kon onu inta ain sinundú-Ku, yo ki Adí Intau mooyá doman in mongaku kon sia in dumodudui-Ku kon wakutu in moiangoi in Sia takin kawasa-Nea bo kawasa i Amá bo in malaekat mita inta motusi!

²⁷ Bá kotaauan monimu in naa: kon sigad monimu tanaa oyúon in diápabí matoi aka sia in diápa mokoontong kon i Allah mamangoi momarenta saḷaku Datu.”

Ki Yesus kon tudu in buḷud

²⁸ Degá waḷudon nosinggai nongkon pinotundúan kon bayongan tatua, ki Yesus in nodia kon i Petrus, kon i Yohanes, bo kon i Yakobus notakod kon buḷud sin mosambayang.

²⁹ Wakutu in ki Yesus yogot nosambayang kon tua, indoianmai yo pogot-Nea in nobaḷui bo ḷambung-Nea in nobaḻídon nobudó mopouḻi-uḻinag.

^30-31 Daḻí doman bo inontong in intau doyowa, tuata in ki Musa bo ki Elia nokipogontong kon yuak in bayag inta nongkon soroga. Mosia nosirita takin i Yesus soaḷ kopopatoi-Nea inta diádon moonggot bo kobayáan-Nea kon Yerusalem.

³² Wakutu intua ki Petrus takin yobayatnea mita nosiug, táe naonda in mosia noibangon inontong monia in sindar motarang nonimbayag kon i Yesus bo intau doyowa sinimindog kon diug-Nea.

³³ Bo naonda in intau doyowa tatua nonaḷámai kon i Yesus, ki Petrus in noguman kon i Yesus, “Pak Guru, mopira totok kita in kon naa. Maníka mogaid in kami kon ḷoḷaigan toḷu, tobatú in kon i Pak Guru, tobatú kon i Musa, bo tobatú in kon i Elia.” (Onu in siningog i Petrus tatua diábí kinomangaḻeannea.)

³⁴ Yogotpa in ki Petrus nosingog, baḷú noikoḷubung mangoi in goḷom kon i monia, sahingga inangoiandon in ondok in mosia.

³⁵ Bo kinodongogandon in singog nongkon yuak in goḷom tatua in noguman, “Tanaa in ki Adí-Ku inta piniḻí-Ku. Indongogaidon in Sia!”

³⁶ Naonda in nogogai singog tatua, indoianmai monia yo dongkadon ki Yesus tontaní in kon tua. Táe tua komintan diábí inouman in murí-Nea mita kon intau ibanea.

Ki Yesus nongundam kon adí inta kinotoḷangan in dimukud moraat

³⁷ Nopoikoḷomai kon singgai, wakutu in ki Yesus bo murí-Nea taya toḷu nosiḻigdon nongkon buḷud tatua. Intau moantó namangoi kon i Yesus.

³⁸ Tobatú ḷoḷaki kon sigad in intau moantó tatua nomaḷú, “Pak Guru, tuḷungaipa bo indoiai in ki adíku tuḷong tua!

³⁹ Aka dimukud moraat mamangoi monubu kon inia, sia in baḷú kumarak bo motorondó totok in awaknea bo bibignea ḷuaian in burá. Dimukud tatua umuran mopororiga kon inia, bo gogió diádon taḷaanneamai in ki adíku tatua!

⁴⁰ Akuoi in nokituḷungdon kon murí mita i Pak Guru moguntun kon dimukud tatua, táe diá mokomampu in mosia.”

⁴¹ Dá ki Yesus sinumorú kon murí-Nea mita kai-Nia, “Moiko nion intau mita inta moibog momaḷawang bo diá mopirisaya! Komangoipa degá in onda Akuoi musti umuran moyotakin monimu bo mosabar in moindoi kon oaid mita monimu? Dia mangoi in adí tanion!”

⁴² Kon wakutu in adí tatua nopobayá kon i Yesus, dimukud moraat tatua nopobanting kon inia poḷat sinorondónea in awak in adí tatua. Táe totok in sinorúan i Yesus in dimukud moraat tatua bo pinoki ḷuaian-Nea nongkon adí tatua dá nopiadon in adí tatua bo poḷatdon pinosarakan kon i amánea.

⁴³ Komintan intau noherang in nokoontong kon kawasa i Allah inta námai tua in koḷoben. Kon wakutu intau mita nongoherangpa totok kon bayongan inta pinomia-Nea tatua, ki Yesus noguman kon murí-Nea mita,

Ki Yesus nongonguman bui kon soaḷ kopatoian-Nea

⁴⁴ “Tarukira bo dika koḻiongan in singog-Ku tanaa: Ki Adí Intau posarakan kon kawasa in intau.”

⁴⁵ Tongá diá kinomangaḻean in murí-Nea mita in singog-Nea tatua. Sin tua in sinontuonbí binuni kon i monia sinbá diá komangaḻean monia. Bo mosia in moondok doman in moḻibó kon i-Nia.

Ki ine in moḷobe-ḷoben?

⁴⁶ Bo nomukádon in bobayowan kon sigad in murí mita i Yesus. Mosia in nobobayowan mongo ki ine in moḷobe-ḷoben kon sigad monia tua.

⁴⁷ Tongá kinotaauan i Yesus in raian monia tatua, tuamai in ginamá-Nea in mongoadí tobatú bo pinoki sindogan-Nea kon diug-Neamai.

⁴⁸ Bo Sia in noguman kon murí-Nea mita, “Intau inta notarima kon adí tanaa sin nokotorop kon i-Nakó, yo tua in mangaḻenea sia notarima kon i-Nakó; bo ki ine in notarima kon i-Nakó, yo sia in notarima doman kon i-Nia inta nopotabá kon i-Nakó; sin ki ine moompá in dodia kon sigad monimu komintan, yo siabí tua in moḷobe-ḷoben!”

Intau inta deeman murí i Yesus noguntun kon dimukud moraat

⁴⁹ Ki Yohanes in noguman nanaa kon i Yesus, “Tuhan, kami in nokoontong kon intau noguntun kon dimukud moraat nomaké in tangoi i Tuhan, tongá inampagan nami in sia, sin sia in deemanbí dumodudui naton.”

⁵⁰ Dá ki Yesus in noguman kon inia, “Donaaibí ampagan monimu in sia, sin ki ine in momayow kon i monimu, yo sia tua in yobayat monimu.”

Ki Yesus bo intau in Samaria

⁵¹ Naonda in modiugdon wakutu i Yesus mayá in soroga, sinantú-Neadon kon Sia in mayádon in Yerusalem.

⁵² Dá Sia in nopotabá kon intau inumuna kon i-Nia. Mosia in minayá bo sinumuot kon ḻipú intau in Samaria. Makusud monia tua in moposadia kon onu inta paraḷuon i Yesus.

⁵³ Táe intau mita in Samaria doí motarima kon koangoian i Yesus, sin noniatadon totok kon Sia nopobayá ná Yerusalem.

⁵⁴ Nokotaaumai kon natua in ki Yakobus bo ki Yohanes inta murí i Yesus, mosia in noḻibó nanaa, “Tuhan, moibog degá in ki Tuhan bá poigumon nami in tuḷu moḷabú nongkon ḷangit bo momutú kon i monia komintan?”

⁵⁵ Táe ki Yesus nobobui kon i monia bo sinumorú.

⁵⁶ Dá mosia minayádon kon ḻipú ibanea.

Intau mita inta moibog mobaḻí dumodudui i Yesus

⁵⁷ Naonda in ki Yesus bo murí-Nea mita nongingguputdon kon bobayáan monia, oyúon intau in noguman kon i Yesus, “Pak Guru, akuoi moibog dumudui kon i Pak Guru kon ondakabí in bayáan!”

⁵⁸ Táe ki Yesus in noguman kon inia, “Uḻe, Serigala oyúon in bubúnea, ḷagapan oyúon in pugadnea, táe ki Adí Intau in diábí in tampat posiugan-Nea.”

⁵⁹ Ki Yesus noguman nanaa kon intau ibanea, “Duduidon kon i-Nakó!” Tongá intau tatua in notubag nanaa, “Tuang ogoiaipa muna in kasampatan in akuoi moḷobong kon i amáku.”

⁶⁰ Táe ki Yesus in noguman kon inia, “Pomayádon mako in intau minatoi moḷobong kon intau minatoi; táe iko in bayádon bo poyaputdon in Habar Mopia kon bayongan intau kon ḻipu-ḻipúannea. Poguman kon ki Allah in mamangoidon momarenta saḷaku Datu.”

⁶¹ Bo oyúon doman intau in noguman nanaa kon i Yesus, “Pak Guru, akuoi in moibog dumudui kon i Pak Guru, táe ogoiaipa muna in wakutu in akuoi mayá moguman kon bayongan in ginaḷumku.”

⁶² Táe ki Yesus in notubag, “Pomuḷoi in intau inta momangkoidon momajeko, bo mobobuipa ná tumi, yo sia tua in diábí patus mobaḻí umat i Allah.”