LUKAS 4 - Alkitab Singog In Mongondow Masa In Tanaa

Ki Yesus sinoba in Ibilis

¹ Naonda in nobatun mako kon tubig in Ongkag Yordan ki Yesus, Sia kinawasa in Roho i Allah bo dinia minayá in padang gurun.

² Kon tua Sia sinoba in Ibilis opat nopuḷú nosinggai in koonggotnea. Opat nopuḷú nosinggai tua Sia diá nokaan kon onu bo onu dá pangabisannea, ginogoy in Sia.

³ Bo namangoidon in Ibilis noguman kon i Yesus, “Iko in totu-totuu ki Adí i Allah? Yo, pogumanaika in batu mita tanion sinbá mobaḻí roti.”

⁴ Táe ki Yesus in notubag, “Kon Buk Motusi oyúon in pinais nanaa, ‘Intau deemanbí tongá mobiag in roti.’ ”

⁵ Bo Ibilis in nodia kon i Yesus minayá in tampat inta moḷantud bo sinundúnea kon i Yesus in bayongan dodatuan in dunia

⁶ poḷat noguman nanaa, “Komintan kawasa bo kaoyúonan tanaa in daitonku ogoi kon ini-Mu, sin tanaa komintan ain bidon inogoi kon inakó dá naa komintan in motaaukubí ogo-ogoi mako kon i inekabí inta kinoibogku pobogoian.

⁷ Dá aka Iko bo moibog mosumba kon inakó yo daitonkubí ogoi kon ini-Mu intua komintan.”

⁸ Táe ki Yesus in notubag, “Aindon pinais kon Buk Motusi, ‘Sumba in ki Tuhan, ki Allahmu, sin tongábí Sia in motaau undoionmu.’ ”

⁹ Dá Ibilis in nodia kon i Yesus minayá in binubungan Baḷoi Tuhan kon Yerusalem bo noguman kon i-Nia, “Aka Iko in ki Adí i Allah? Yo ḷandukka monag nongkon naa.

¹⁰ Sin kon Buk Motusi ain pinais nanaa, ‘Ki Allah in mopotabá in malaekat-Nea mita moḷukad kon ini-Mu kopiraan totok.

¹¹ Natua doman, singkaponbí monia in Iko dá diábí moidatong kon batu in sioḷ-Mu.’ ”

¹² Ki Yesus in notubag, “Ain pinais domandon kon Buk Motusi in nanaa, ‘Donaai in iko mosoba kon i Tuhan, ki Allahmu.’ ”

¹³ Naonda Ibilis nopaḷut nosoba kon i Yesus, sinaḷáanneadon in ki Yesus bo mogoḷat kon wakutu inta mopia angoian bui.

Ki Yesus nobui kon Galilea

¹⁴ Onda intua ki Yesus minayádon bui in Galilea, bo Sia in umuran kon bonu in kawasa in Roho i Allah. Habar soaḷ ki Yesus noisiardon kon bayongan ḻipú tatua.

¹⁵ Kon tua, Sia minaya-mayá mako kon baḷoi pososambayangan bo nopoyaput in Habar Mopia bo umuran dayowon in bayongan intau in Sia.

Ki Yesus diá sinarima kon Nazaret

¹⁶ Ki Yesus minayá doman in Nazaret, tobatú ḻipú inta kinoitoian-Nea. Kon singgai in Sabat, podudui in kabiasaan-Nea, Sia minayá in baḷoi pososambayangan. Sia in sinimindog bo nobaca kon Buk Motusi,

¹⁷ sia inogoian in buk i Nabi Yesaya. Binuká-Nea in ḻitodan buk tatua bo kinobukaan-Nea in tontagá inta noguman nanaa,

¹⁸ “Roho i Tuhan oyúon kon i-Nakó, sin Akuoi in ain piniḻí-Nea mopoyaput in Habar Mopia kon intau mita bogá. Sia nopotabá kon i-Nakó mopotaau in popoḷuaian kon intau mita kon sinokodakop bo mongundam kon mata in intau mita bilog; bo mopoḷuat kon intau mita inta sinokodorot

¹⁹ bo mopotaau doman in koangoian i Tuhan moposaḷamat in umat-Nea.”

²⁰ Nopaḷut mako binaca-Nea intua, iḻitod-Nea bui in buk tatua bo pinobui-Nea kon intau inta mogogaid kon baḷoi pososambayangan tatua, bodongka iḻimitú. Bayongan in intau inta kon bonu in Baḷoi Pososambayangan tatua inimindoi kon i-Nia.

²¹ Bo nomangkoidon in ki Yesus nosingog nanaa, kon i monia, “Onu in pinais kon tontagá tanaa yo singgai domandon naa inintompodan kon wakutu in moiko nokodongog.”

²² Onu inta poguman-Nea, komintan mokosanang kon gina monia, sahingga kinoibog monia in Sia bo umuran monia indongogan in poguman-Nea. Bayongan in intau kon tua komintan in noḻibo-ḻibóan, “Degá Siabí naa inta ki adí i Yusup?”

²³ Dá ki Yesus in noguman nanaa, “Tantú nanaabí in singogon monimu kon i-Nakó, ‘Ei mongongundam, undamaidon in awak-Mu tontaní. Bo aidai domandon kon naa, kon ḻipú-Mu tontaní in onu inta ain dinongog nami inaidan-Mu kon Kapernaum!’ ”

²⁴ Ki Yesus in noguman doman, “Poguman-Kudon kon i monimu, diábí in nabi in horomaton kon ḻipú-Nea tontaní.

²⁵ Táe indongogai in singog-Ku naa: kon tungkuḷ i Nabi Elia, wakutu in kinodaitan kaanon sin toḷudon notaong kapin in diá nonguya-nguyan. Wakutu intua noantó in dongkadon boba-bobay kon Israel.

²⁶ Tongá umpaka natua yo ki Elia in diábí pinotabá i Allah minayá kon tobatú boba-bobay kon Israel, táe pinotabá-Neabí in sia minayá kon tobatú boba-bobay kon Sarpat kon butá in Sidon.

²⁷ Natua doman in kon tungkuḷ i Nabi Elisa, tungkuḷ intua nobayong in intau Israel in kinotugatan in panyaki kuḻit inta mokorongó, táe diábí tobatúmai in kon sigad monia tua in inundaman, koḻikudbí in ki Naaman intau in Siria tua.”

²⁸ Nokodongogmai kon tua, nodait sinumorú in intau mita inta kon bonu in Baḷoi Pososambayangan tatua.

²⁹ Mosia in sinimindog bo noguntun kon i Yesus pinoḷuai kon in kotá tatua, bo dinia monia in Sia kon bingkí in irang kon tudu in buḷud tatua sin tomayáan monia tuḷudon kon irang tatua in Sia.

³⁰ Táe minayá in Sia bo ginimilo-gilot mako kon intau mobayong dá diá nouḻí monia bo minayádon in Sia.

Intau inta Kinotoḷangan in dimukud moraat

³¹ Onda intua ki Yesus minayá in Kapernaum, tobatú kotá kon Galilea. Kon tua in Sia nopoyaput doman in Habar Mopia kon singgai in Sabat.

³² Pototundú-Nea mokosanang totok kon gina monia, sin mokobangkaḷ totok onu in singogon-Nea.

³³ Kon baḷoi pososambayangan tatua oyúon doman in tobatú intau inta kinotoḷangan in dimukud moraat. Intau tatua in nomaḷú,

³⁴ “Ei Yesus, intau in Nazaret, onuon-Mu in kami? Degá mamangoi in Iko momutú kon inami? Kinotaauankubí in Iko: Iko in totabá inta Motusi nongkon i Allah!”

³⁵ Táe ginuakan i Yesus in dimukud moraat tatua, “Kibio-biómai bo ḷuaidon iko kon intau tanion!” Dá dimukud moraat tatua nogumpang kon intau tatua kon tayowonmai monia komintan, onda intua sia iḷumuaidon pia-pia nongkon intau tatua.

³⁶ Komintan intau in nongoherang bo nosingog, “Diábí tongá ibo-ibog in singog-Nea mita. Mokobangkaḷ totok in pososingog-Nea bo takin kawasa in Sia nokipoḷuai in dimukud mita moraat tatua, bo ḷumuai doman in mosia!”

³⁷ Dá habar soaḷ ki Yesus noibaya-bayádon mako kon bayongan ḻipú kon tua.

Ki Yesus nongundam kon moantó intau

³⁸ Onda intua ki Yesus in nonaḷámai kon baḷoi pososambayangan tatua bo minayá kon baḷoi i Simon. Kon tua ki guyá i Simon notakit pinonikan in patú bo irimintonow, dá pinoguman monia kon i Yesus in soaḷ tatua.

³⁹ Dá minayá dinimiug kon tosiugan i guyá i Simon tatua in ki Yesus bo ininggamáan-Nea in patú tatua. Kon dodaipa doman in tatua bo nopia in ki guyá i Simon dá nobangondon in sia bo nobantung kon i monia.

⁴⁰ Naonda in tongkaná in tumoyopdon mata in singgai, komintan intau in nodia mangoi kon i utat mita monia inta notakit noyagi-yagimai sin angoion pokiundam kon i Yesus. Bo nodait iyapu i Yesus in mosia dá nongopia in takit mita monia tua.

⁴¹ Dimukudpa mita moraat in iḷumuai nongkon moantó intau, sindaḷan kumarak bo moguman, “Iko nion in ki Adí i Allah!” Táe totok in sinorúan i Yesus in mosia bo diá inogoi mosingog sin kotaauandon monia kon Sia tua in Datu Mopoposaḷamat.

Ki Yesus nopoyaput in Habar Mopia kon bonu in baḷoi pososambayangan

⁴² Naonda in modiugdon mobayag, ki Yesus nonaḷámai kon kotá tatua bo minayá in tobatú tampat inta moingongow totok. Táe mulaidon bo sinayak monia in Sia, bo naonda in noyodungkuḷ monia, inampagan monia in Sia kon bá diápa monaḷámai kon i monia kon tua.

⁴³ Táe ki Yesus in noguman nanaa, “Habar Mopia kon naonda in ki Allah momarenta mustibí bayáan-Ku doman poyaput kon kotá mita ibanea, sin tuabí in mangaḻe pinopotabáan i Allah kon i-Nakó mamangoi in dunia naa.”

⁴⁴ Manangka intua ki Yesus minaya-mayá mako in bayongan baḷoi pososambayangan kon butá in Yudea bo nopoyaput in Habar Mopia tatua.