LUKAS 3 - Alkitab Singog In Mongondow Masa In Tanaa

Ki Yohanes Mobobaptis

¹ Kon taong impuḷú bo ḻima kon pinomarentaan i Kaisar Tiberius, wakutu in ki Pontius Pilatus nobaḻí gubernur kon butá in Yudea bo ki Herodes in datu kon Galilea, ki Pilipus ki utatnea in datu kon Iturea bo kon Trakhonitis, ki Lisanias in datu kon Abilene.

² Tungkuḷ intua imang moḷoben in ki Hanas bo ki Kayapas. Kon taong tatuata ki Allah in nosingog takin nomaké kon i Yohanes inta ki adí i Zakharia. Ki Yohanes in namangoi nongkon padang gurun.

³ Ki Yohanes minaya-mayá mako in bayongan ḻipú inta kon diugmai in Ongkag in Yordan bo nopobaḷú, “Pogogaidon in mogaid kon dosa mita bo pokibaptisdon sinbá ampungandon i Allah in bayongan taḷámu.”

⁴ Soaḷ tatua naonda bo inta ain pinais kon bonu in buk i Nabi Yesaya nanaa: “Oyúon singog in intau inta mopobaḷú nongkon padang gurun, ‘Sadiadon in daḷan kon i Tuhan, tuḻidon in daḷan kon i-Nia.

⁵ Toko bumbunai in ḻembong mita, bo pomuḷoi in buḷud bo inta notombuḷud in tokotondodaidon. Daḷan inta nongobelung tokotuḻidon, bo inta nongotontudu tokotondodaion.

⁶ Sinbá komintan intau mokoontong kon i Allah moposaḷamat kon bayongan intau!’ ”

⁷ Ki Yohanes in noguman kon bayongan intau inta namangoi nokibaptis kon inia nanaa, “Ei moiko intau moromú! Ki ine in noguman kon moiko in kotaḻiban in hukuman i Allah inta kon singgai moiduduimai naa?

⁸ Pogumanku kon i monimu, Popoontongpa muna in oaid monimu mopia, saḷaku tanda kon moiko in totu-totuu bidon nogogai in nogaid kon inta diá mopia. Bo donaaipa muna moguman in moiko kon ki Abraham in ki amá nami! Sinbá pogumanku kosilangon kon i monimu, batu mita tanaa in motaaubí aidan i Allah ki adí mita i Abraham!

⁹ Boḻiung aindon sinadia mako pomupuḷ kon pangkoi dapot in uakatnea mita. Pomuḷoi in pinomuḷa inta diá mopomungai in bungai inta mopia in toko-pupuḷonbí bo tubáan kon tuḷu.”

¹⁰ Dá intau moantó kon tua in noḻibó kon inia nanaa, “Aka natua yo onu in musti aidan nami?”

¹¹ Ki Yohanes in notubag, “Aka ki ine in koḷambung doyowa, yo musti in sia mobogoi in ḷambung tobatú kon intau inta diá koḷambung; ná doman tua, aka ki ine in oyúon in kaanon, yo ogoiaibí in intau inta diá kokaanon.”

¹² Wakutu intua oyúon doman in intau mita inta mononagi kon pajak in namangoi nokibaptis kon i Yohanes. Mosia in noḻibó, “Pak guru, onu in musti aidan nami?”

¹³ Tubagnea kon i monia, “Donaai monagi moiḻiu kon onu inta ain sinantú kon i monimu.”

¹⁴ Oyúon doman in tontara in noḻibó, “Yo aka kami, onu in aidan nami?” Tubag i Yohanes, “Donaai mogagow bo donaai momakisa kon intau poḷat moponapud in inta diá mita totuu. Pakédon in gajimu tontaní!”

¹⁵ Kon wakutu intua intau mita nomangkoidon noḻibo-ḻibóan, degá ki Yohanes naa in Datu Mopoposaḷamat inta inoḷat mako monia.

¹⁶ Tuamai in ki Yohanes noguman kon i monia komintan, nanaa, “Akuoi in Mopobaptis kon i monimu in tubig, táe moiangoibí in intau inta moḷobe-ḷoben nongkon inakó. Umpaka tongá mobuká kon togot in sapatunea yo diá kobaḻí in akuoi. Sia tua in mopobaptis kon i monimu in Roho i Allah bo tuḷu.

¹⁷ Digu kokada-kadai-Neadon sin poguaban kon gandum dapot in modarit. Gandum inta nodaritdon tontaníon-Nea bo tagúon kon tampatnea, táe bayongan pangkoinea in tubáan-Nea kon bonu in tuḷu inta diá mopio-piong!”

¹⁸ Norupa-rupamai in tonggina i Yohanes kon wakutu in sia nopoyaput in Habar Mopia.

¹⁹ Tongá naonda in sia nonoboḷow kon i Herodes, datu in Galilea inta mongibog kon i buḷoi i utatnea ki Herodias, bo nonogur doman kon oaidnea mita ibanea inta diá mopia.

²⁰ Tongábí nokodugang kon romú i Herodes nodapot in ki Yohanes pinobonunea kon ponjara.

Ki Yesus binaptis i Yohanes

²¹ Naonda in nodaitdon binaptis in intau mobayong kon tua, ki Yesus namangoi doman nokibaptis. Koyogot in baptison, Sia nosambayang bo ḷangit nobukat,

²² bo Roho i Allah noponag kon i-Nia naonda bo ḷagapan paḷoma. Bo kinodongogandon in singog nongkon ḷangit noguman nanaa, “Iko in ki Adí-Ku inta kinotabi-Ku. Iko in kinoibog-Ku.”

Tangoi mita in mogoguyang i Yesus

²³ Ki Yesus in nomangkoidon nogaid kon oaidan-Nea wakutu in Sia umurdon degá toḷu nopuḷú notaong. Kain intau Sia naa in ki adí i Yusup, inta ki adí i Eli,

²⁴ ki adí i Matat, adí i Lewi, ki Lewi, ki adí i Malkhi, adí i Yanai inta ki adí i Yusup,

²⁵ ki adí i Matica, ki adí i Amos, inta ki adí i Nahum, adí i Hesli, inta ki adí i Nagai,

²⁶ ki adí i Maat, inta ki adí i Matica, inta ki adí i Simei, ki adí i Yosekh, ki adí i Yoda,

²⁷ inta ki adí i Yohanan, ki adí i Resa, inta ki adí i Zerubabel, adí i Sealtiel, inta ki adí i Neri,

²⁸ ki adí i Malkhi, ki adí i Adí, ki adí i Kosam, inta ki adí i Elmadam, ki adí i Er,

²⁹ ki adí i Yesua, inta ki adí i Eleazer, ki adí i Yorin, ki adí i Matat, ki adí i Lewi,

³⁰ inta ki adí i Simeon, ki adí i Yohuda, inta ki adí i Yusup, adí i Yonam, ki adí i Elyakim,

³¹ inta ki adí i Melea, ki adí i Mina, inta ki adí i Matata, ki adí i Natan, ki adí i Daud,

³² ki adí i Isai, ki adí i Obed, ki adí i Boas, ki adí i Salmon, ki adí i Nahason,

³³ inta ki adí i Aminadab, ki adí i Admin, inta ki adí i Arni, ki adí i Hezron, ki adí i Peres, ki adí i Yohuda,

³⁴ inta ki adí i Yakub, ki adí i Ishak, ki adí i Abraham, inta ki adí i Terah, ki adí i Nahor,

³⁵ ki adí i Serug, inta ki adí i Rehu, adí i Peleg, ki adí i Eber, inta ki adí i Salmon,

³⁶ inta ki adí i Kenan, ki adí i Arpakhsad, ki adí i Sem, ki adí i Nuh, inta ki adí i Lamekh,

³⁷ inta ki adí i Metusalah, ki adí i Henokh, ki adí i Yared, inta ki adí i Mahalaleel, ki adí i Kenan,

³⁸ ki adí i Enos, inta ki adí i Set, ki adí i Adam, inta ki adí i Allah.