LUKAS 22 - Alkitab Singog In Mongondow Masa In Tanaa

Tomayá moḻimod kon i Yesus

¹ Kon singgai moḷoben Roti Diá in ragi inta sinangoi Paska nodiugdon.

² Imang mita itoi bo mototundú mita kon agama norai mongo naonda in poḷoḻimod monia kon i Yesus, táe umuni-uni sin moondok kon intau moantó.

Ki Yudas noyopakat moḻimod kon i Yesus

³ Onda intua Ibilis ginumonú kon i Yudas inta dinonoi ki Iskariot, tobatú murí i Yesus inta kon sigad nayamopuḷú bodoyowá.

⁴ Dá minayá in sia bo noyosingog takin imang mita itoi bo intau mita inta moḷoḷukad kon Baḷoi Tuhan. Sia nongonguman kon soaḷ naonda in daya moposarakan kon i Yesus kon i monia.

⁵ Nopia totok in gina in intau mita tatua, dá dinandi monia kon ogoian monia in doit in sia.

⁶ Ki Yudas in noibog, dá mulaidon in sia bo umuni-uni in motayak kon kasampatan moposarakan kon i Yesus kon i monia.

Posadiaan kon kaanon Paska

⁷ Nodapotdon in singgai moḷoben Roti Diá in ragi, tuata in singgai inta porataan kon domba Paska.

⁸ Dá ki Yesus in nopotabá kon i Petrus bo kon i Yohanes, “Bayádon bo posadiadon kon pongaanan naton kon singgai moḷoben Paska.”

⁹ Dá taya dua noḻibó, “Kon onda in kon ibog i Pak Guru bayáan nami posadiaan?”

¹⁰ Ki Yesus notubag, “Aka moiko tumuot kon tobatú kotá, yo moiko in moyodungkuḷ in tobatú ḷoḷaki inta nodia kon kendi kon bonu-bonu in tubig. Dudui kon inia modapot in baḷoi inta pongandupannea,

¹¹ bo pogumandon kon i togi baḷoi tatua nanaa: Ki Pak Guru in nokiḻibó kon i tuang, ‘Kon onda in tampat inta motaau-Ku pongaanan takin murí-Ku mita kon singgai in Paska naa?’

¹² Yo tundúonbí i togi baḷoi tatua kon i namunda in tobatú yuang moḷoben kon ḻimonik. Kon tua aindon notouḷutdon in pakakatnea mita, dá sadiadon kon tua.”

¹³ Onda intua minayádon in ki Petrus bo ki Yohanes. Kinobayáanmai monia komintanbí notongkai ná inta ain pinoguman i Yesus. Bo sinadiadon monia kon tua in pongaanan monia kon singgai in Paska.

Nongaan noyotakin i Yesus

¹⁴ Naonda in wakutuneadon mongaan, ki Yesus in iḻimitú noyotakin in murí-Nea mita kon meja pongaanan.

¹⁵ Bo Sia in noguman kon i monia, “Akuoi in moibogdon totok mokaan kon kaanon Paska tanaa moyotakin monimu wakutu in diápa mokorasa kon roriga in Akuoi!

¹⁶ Sin muna-Kudon poguman kon i monimu: Akuoi in diá bidon mokaan bui kon kaanon tanaa modapot intua komintan poponiatadon i Allah kon dunia naa.”

¹⁷ Onda intua binuat-Nea in palo pongonginuman kon anggur bo nosambayang nopoyaput in sukur kon i Allah. Nopaḷut mako Sia noguman, “Gamá in naa bo silai-silaidon mako;

¹⁸ sinbá kotaauandon monimu: pinangkoidon kon tanaa mako, Akuoi in diá bidon bui monginum kon anggur tanaa modapot in ki Allah mamangoidon momarenta saḷaku Datu.”

¹⁹ Onda intua ki Yesus in nogamá kon roti. Bo naonda in sinambayangan-Nea mako, binonsi-bonsig-Nea in roti tatua bo inogoi kon i monia poḷat noguman, “Naadon in awak-Ku [inta pinosarakan kon i monimu. Aidai doman in naa, saḷaku tanda kon moiko in umuran monorop kon i-Nakó.”

²⁰ Natua doman, naonda in nopaḷut mako nongaan, Sia in nobogoi in palo pongonginuman kon anggur tatua kon i monia poḷat noguman, “Pongonginuman tanaa in dodandian i Allah inta mobagu inta ain sinoḻiuan in dugú-Ku. Dugú inta ain pinobutak sin kopontingan monimu.”]

²¹ “Táe indoiai! Intau inta momaḻidawan kon i-Nakó in naadon koyota-yotakin-Ku!

²² Adí Intau in totuubí kon matoi ná inta ain sinantú i Allah; táe moboditodon in intau inta momaḻidawan kon i-Nia!”

²³ Dá mosia in nomangkoidon nosiḻibóan mongo ki ine in kon sigad monia tua in momia natua.

Bobayowan wakutu in nongaan doḷom

²⁴ Bo nomukádon bobayowan kon sigad in murí mita i Yesus. Mosia in nobobayowan mongo ki ine in moḷobe-ḷoben kon sigad monia tua.

²⁵ Nokodongogmai kon natua, ki Yesus in noguman kon i monia, “Mongongawasa kon dunia naa inta diá nonotaau kon i Allah, mondorot kon rayatnea, bo pongawasanea mita sinangoi, ‘Mogogoḻiung kon Rayat.’

²⁶ Táe moiko in diábí motaau natua. Mustibí nanaa, intau inta totok in moḷoben kon sigad monimu in mustipabí mobaḻí ná inta totok mointok, bo itoi in mustibí mobaḻí naonda bo bobantung.

²⁷ Ki ine degá in moḷobe-ḷoben: intau inta iḻimitú nongaan kon meja mongo intau inta nobantung kon inia? Tantú intaubí inta iḻimitú tatua. Táe Akuoi in kon sigad monimu naa in saḷakubí bobantung.

²⁸ Kon bonu in roriga inta korasaan-Ku, moiko in umuran kotaki-takin-Ku.

²⁹ Ná ki Amá ain nobogoi kon i-Nakó in hak momarenta, dá Akuoi in mobogoi in hak tatua kon i monimu.

³⁰ Takin natua dá moiko in motaau doman mobarasanang takin-Ku kon wakutu in Akuoi in mobaḻí Datu. Bo moiko in ḻimitú kon ḻimonik in mopuḷú bodoyowá in tampat pomomarentaan sin momarenta kon mopuḷú bodoyowá nosuku in bangusa Israel.”

Pinopotaauan kon diá akuon i Petrus in ki Yesus

³¹ “Simon, Simon, indongogai! Ibilis aindon inogoian in kasampatan monungkuḷ kon i monimu; ná gandum pinoyotontaní kon kuḻitnea, sahingga inta mopia in pinoyotontanídon kon inta moraat.

³² Táe iko Simon, aindon sinambayangan-Ku, sinbá motantú in pirisayamu. Bo aka iko mobuidon mangoi kon i-Nakó, yo mustimubí doman iropotanmu in gina in bayongan ginaḷummu.”

³³ Táe ki Petrus in notubag kon i Yesus, “Tuhan, akuoi in diábí moondok in tumuot kon ponjara andeka matoi moyotakin i Tuhan!”

³⁴ Dá ki Yesus in noguman, “Pirisayadon in singog-Ku Petrus! Diápa mokukú in manuk in singgai naa, iko in koyongandon kotoḷu in nomayow kon deemanbí murí-Ku.”

Dompet, botutu andeka pitow

³⁵ Nopaḷut mako nosingog kon tua, Sia in noguman kon i monia, “Tungkuḷ in pinotabá-Ku in moiko bo diá-Ku inogoi nodia kon dompet, botutu andeka sapatu, yo degá nokoimontanmai in moiko in kinodaitan in onu bo onu?” “Dia!” tubag monia.

³⁶ Dá ki Yesus in noguman, “Yo tanaa mako in poguman-Ku, ki ine in kodompet andeka kobotutu yo mustibí dia; bo ki ine in diá kopitow, yo mustibí in sia mopotaḷui in jubahnea sin potaḷui kon pitow.

³⁷ Sin pirisayadon in tontagá kon Buk Motusi inta noguman nanaa, ‘Sia in inanggap naonda bo intau moraat,’ mustibí mobaḻí kon i-Nakó. Sin onu inta pinais kon Buk Motusi soaḷ Akuoi, koyogot bidon mobaḻí in tanaa mako.”

³⁸ Dá murí-Nea mita in noguman, “Tuhan, indoiaika, doyowadon pitow in kon naa.” Dá kai Yesus doman, “Mobaḻídon nion.”

Ki Yesus nosambayang kon buḷud in Zaitun

³⁹ Ki Yesus in iḷumuai kon kotá bo minayá in tampat inta biasamai bayáan-Nea kon buḷud in Zaitun. Murí-Nea mita minayá doman takin-Nea.

⁴⁰ Naonda in noiyaputdon kon tua, Sia in noguman kon i monia nanaa, “Posambayangdon, sinbá moiko in diá moitaḷá aka koangoian in sobaan.”

⁴¹ Onda intua Sia iyumayú topiḻik kon murí-Nea mita tatua, degá topogaraban batu in koyayúnea, bodongka sinumungkud bo nosambayang.

⁴² Nanaa in sambayang-Nea, “Amá, aka motaau, yo poyayúdon kon i-Nakó in roriga tanaa inta musti kobayáan-Ku. Táe deemanbí podudui in ibog-Ku, poduduibí kon ibog i Amá tontaní.” [

⁴³ Tobatú malaekat namangoi kon i-Nia bo noginropot kon gina-Nea.

⁴⁴ Tantúdon moondok in Sia, dá umurandon in Sia mosambayang. Uḷat-Nea in naonda bo dugú motait kon butá.]

⁴⁵ Nopaḷut mako nosambayang, nobuat in Sia bo minayá bui kon murí-Nea mita. Kinobayáan-Neamai, mosia in nosiug mako sin moajar totok in gina monia.

⁴⁶ Bo Sia in noḻibó kon i monia, “Nongonu sin mosiugbí in moiko? Pobangondon bo posambayang sinbá diá kotugatan sobaan in moiko.”

Ki Yesus dinomok

⁴⁷ Koyogotpa in ki Yesus monongginamai kon murí-Nea mita tatua, namangoidon in intau tokawang, inta dinia i Yudas tobatú murí i Yesus tua. Noiyaputmai kon tua, ki Yudas baḷú minayá kon i Yesus bo nongayok.

⁴⁸ Táe ki Yesus in noguman kon inia, “Yudas, degá ayokmu bidon tanaa in mobaḻí tanda kon iko in nomaḻidawandon kon i Adí Intau?”

⁴⁹ Naonda in murí mita i Yesus nokoontong kon onu inta nobaḻí tatua, mosia in noḻibó, “Tuhan, tokosibatondon nami in pitow in mosia naa!”

⁵⁰ Bo tobatú intau kon sigad monia tatua in nonibat kon tobatú bobantung i imang moḷoben, dá nopongkó in bongoḷannea.

⁵¹ Táe ki Yesus in noguman, “Donaaidon!” Bo kinadaian-Neadon in bongoḷan in intau tatua bo inundaman.

⁵² Onda intua, ki Yesus in noguman kon imang mita itoi bo tontara mita inta moḷoḷukad kon Baḷoi Tuhan, takin itoi mita in Yahudi inta namangoi kon i-Nia sin modomok, kai-Nia, “Degá kai monimu kamai Akuoi naa in intaubí moraat, sin moiko in sidiabí mita in pitow bo bobobak in mamangoi modomok kon i-Nakó?

⁵³ Pomuḷoi in singgai Akuoi umuran kon yua-yuak monimu kon bonu in Baḷoi Tuhan, táe diábí domokon monimu. Táe naa in wakutudon monimu sin kinawasadon in Ibilis in moiko.”

Ki Petrus nomayow kon deemanbí murí i Yesus

⁵⁴ Ki Yesus in dinomok monia bo dinia pinobayá in baḷoi i imang moḷoben. Ki Petrus in dumuduianmai kon i monia, táe nongkon moyayú.

⁵⁵ Kon palas in baḷoi imang moḷoben tatua, intau mita nonontuḷú bo iḻimitú iḻimibu kon tuḷu tatua. Ki Petrus in minayá doman bo dinumugang kon i monia.

⁵⁶ Bobantung bobay in nokoontong kon i Petrus iḻimitú kon bingkí in tuḷu tatua bo umuran sinaridiannea mangoi. Onda intua bobantung tatua in noguman, “Iko doman inta umuran moyotakinmai i Yesus!”

⁵⁷ Táe binayowan i Petrus kainia, “Beresibí diá nokanalku in intau tatua!”

⁵⁸ Diá noonggot kon tua, tobatú doman intau in nokoontong kon i Petrus bo noguman nanaa, “Iko doman tobatú nongkon i monia ma!” Táe ki Petrus in notubag, “Diábí, deemanbí akuoi!”

⁵⁹ Degá tongojammai nongkon tua, tobatú doman in intau nopobaḷú kon i Petrus nanaa, “Totuu uḻe, intau doman tanion in dumodudui i Yesus, sin sia intau doman in Galilea!”

⁶⁰ Táe ki Petrus in notubag doman nanaa, “Diábí kinomangaḻeanku in makusud in singogmu tanion!” Bo kon dodaipa doman tatua, kon wakutu in ki Petrus yogot nosingog kon tua, dinongogmai manuk in nokukúdon.

⁶¹ Ki Yesus baḷú nobobui kon i Petrus dá baḷú bo doman kinotoropannea in onu inta ain pinoguman i Yesus kon inia nanaa, “Kon wakutu in diápa mokukú in manuk singgai naa, iko aindon koyongan kotoḷu momayow kon iko in deemanbí murí-Ku.”

⁶² Bo iḷumuaidon in ki Petrus nongkon tua bo nongombaḷ mopoina-inak.

Ki Yesus pinoyambá bo binongkug

⁶³ Intau mita inta noḷukad kon i Yesus nopoyambá kon i-Nia bo poḷat nomongkug.

⁶⁴ Inoḻingoian monia in daing mata-Nea bo pinoḻibóan nanaa, “Pogumanka mongo ki ine in nomongkug kon ini-Mu?”

⁶⁵ Bo noyagi-yagipa doman in siningog monia inta poningkuḻe kon i-Nia.

Ki Yesus kon tayowon in Pongadilan

⁶⁶ Bo naonda in doḷom-doḷomdon, nosipundon in guhanga mita in ḻipu intau Yahudi, imang mita itoi bo mototundú mita kon agama, bo nodia kon i Yesus pinotayow kon sidang agama.

⁶⁷ Mosia in noguman kon i-Nia nanaa, “Pogumanka kon inami mongo Iko inta Datu Mopoposaḷamat?” Dá ki Yesus in notubag, “Umpakabí poguman-Ku kon inimu, táe moiko in umuranbí doman diá mopirisaya.

⁶⁸ Bo umpakabí oyúon in ḻibóon-Ku kon inimu, yo doíbí doman moiko motubag.

⁶⁹ Táe bá poguman-Kudon kon i monimu, kon tanaa mako, ki Adí Intau in ḻimitú bidon mako kon dotá in koḷanan i Allah Inta Mokawasa.”

⁷⁰ Dá mosia komintan in noḻibó nanaa, “Aka natua, yo Iko naa in ki Adí i Allah?” Ki Yesus in notubag, “Moiko bidon tontaní in noguman kon Akuoi naa ki Adí i Allah.”

⁷¹ Dá nosingog in mosia komintan, “Diá bidon paraḷu in kita motayak kon sakusi ibanea, sin dinongogdon naton tontaní onu in pinoguman-Nea!”