LUKAS 21 - Alkitab Singog In Mongondow Masa In Tanaa

Sosumba in intau boba-bobay

¹ Kon Baḷoi Tuhan tatua, ki Yesus in nokoontong kon intau mita inta nooyúon nopobonu in doit kon kas inta pobobonuan kon sosumba.

² Sia in nokoontong doman kon intau boba-bobay inta nobiag totok in nobogá nopobonu in doit kon bonu in kas tatua.

³ Dá ki Yesus in nosingog nanaa, “Indongogai: inta inogoi in boba-bobay tanaabí in mobayo-bayong nongkon inta inogoi in intau mita ibanea kon naa.

⁴ Sin mosia tua in nobogoi in sosumba nongkon kalebean in kapunyaan monia. Táe intau boba-bobay tanaa, umpakabí in sia nobiag nobogá totok, táe sia in nobogoibí in bayongan inta onu in kon inia inta sabanarnea in totokpabí in paraḷunea pakéon kon kobiagannea.”

Ki Yesus nongonguman kon korumbunan Baḷoi Tuhan

⁵ Naonda intau mita nongonguman kon kogogaga in Baḷoi Tuhan inta ain kinompitan in batu mita mongogaga takin pakakat mita inta ain pinosumba kon i Allah, dá ki Yesus in noguman kon i monia,

⁶ “Oyúonbí in wakutunea porumbunan kon onu inta inontong monimu tanion; diábí in tobatúmai batu in pomayápa mako in moiguntuḷ motompia kon tampatnea inta muna!”

Pomangkoian in roriga

⁷ Mosia in noḻibó kon i Yesus, “Pak Guru, toonu intua mita bo mobaḻí? Bo onu in tanda kobaḻían intua komintan?”

⁸ Ki Yesus in noguman, “Mokopoingatdon, sinbá moiko in diá koakaḷan. Moantó in intau in mamangoi momaké in tangoi-Ku bo moguman, ‘Akuoi in Sia!’ bo ‘Wakutuneadon.’ Táe dikabí indongogan monimu in mosia.

⁹ Bo dikabí moondok aka moiko bo mokodongog kon habar poparangan bo pomarontakan. Sin tua komintan in mustibí kon mobaḻípa muna. Táe tua in deemanpabí wakutunea.”

¹⁰ Ki Yesus in noguman doman nanaa, “Bangusa tobatú moparang doman takin bangusa ibanea, bo negara tobatú mayá monubu kon negara doman ibanea.

¹¹ Kon bayongan tampat mobaḻí in yagi-yagi. Ḻinug inta moropot totok, malarat moḷoben bo panyaki mita. Kon ḷangit mobaḻí in soaḷ mita inta totok in mokodoit.

¹² Táe kon wakutu in diápa mobaḻí intua komintan, moiko in domokondon muna monia bo pogutúon. Moiko in diaan monia pobayá in baḷoi pososambayangan bo adilon poḷat potuoton kon ponjara. Diaan potayow kon datu bo pongawasa sin moiko in murí-Ku.

¹³ Tua in kasampatan monimu mopoyaput in Habar Mopia inta nongkon i Allah.

¹⁴ Tuamai mokopotantú kon gina bo dikabí mohawatir in morai mongo onu in potubag monimu aka poḻibo-ḻibóan monia.

¹⁵ Bá kotaauan monimu kon Akuoibí in moguman kon onu inta musti potubag monimu, sahingga saturu mita monimu tua, diá mokoḷawang ande mokobayow kon onu in singogon monimu.

¹⁶ Moiko in posarakan in guyangamu, i utatmu, in yobayatmu mita bo in bayongandon ginaḷummu. Bo ibanea in tokoḻimodon.

¹⁷ Moiko saturuon in bayongan intau sin moiko in murí-Ku.

¹⁸ Táe diábí tougatmai in buok kon uḷumu in moḷabú.

¹⁹ Aka moiko monahang bo mokosabar, yo mosaḷamatbí.”

Korumbunan in Yerusalem

²⁰ “Aka ontongon monimu bo Yerusalem in kopungondon in tontara mita, yo kotaauandon monimu kon diádon moonggot bo poguyaatondon in kotá tatua.

²¹ Kon wakutu intua, intau mita inta kon Yudea musti moḷagui mayá in buḷud, bo intau mita inta kon kotá musti momamping andeka musti monaḷámai kon kotá tatua, bo intau kon ḻipú in dikabí mamangoi in kotá.

²² Sin singgai mita tatua in ‘Singgai bidon Pohukuman’, sinbá mobaḻídon onu inta ain pinais kon bonu in Buk Motusi.

²³ Mokoondok in singgai mita tatua aka kon bobay inta sidia bo inta kogadípa kon mointok! Kotá tanaa in koantugan in roriga moḷoben bo hukumon i Tuhan.

²⁴ Oyúon in ḻimodon, oyúon doman in diaan saḷaku intau inta dinakop bo pobayá in ḻipu-ḻipúannea; bo intau inta diá mopirisaya momoguyaat kon Yerusalem modapot mopaḷut in wakutu inta sinantú i Tuhan kon i monia.”

Koangoian in Adí Intau

²⁵ “Bo tandanea in koontonganbí kon mata in singgai, kon buḷan bo kon tundi. Kon dunia naa, bayongan in intau mongoondok bo mongotoboḻingo in mokoontong bo mokodongog kon singog in bokoḷ.

²⁶ Intau mita in moondok totok in moyogintayow in onu inta mobaḻí kon dunia naa, bo bayongan kawasa kon baḷangon motombauk.

²⁷ Kon dodai in tuata mamangoi in ki Adí Intau kon yua-yuak in goḷom takin kawasa bo kamuliaan inta totok in moḷoben.

²⁸ Aka tua bo mobaḻídon, yo pobangondon bo ḷangag kon ḷangit, sin diádon moonggot bo posaḷamaton in moiko.”

Totundú nongkon pangkoi in ara

²⁹ Ki Yesus in nongonguman kon poumpamaan kon i monia nanaa, “Tarukiraka in pangkoi in ara bo pangkoi ibanea mako!

³⁰ Aka tubúnea bo mulaidon ontongon, yo kotaauan bidon monimu kon diá bidon moonggot bo wakutudon in pomomunak.

³¹ Natua doman, aka moiko bo mokoontongdon kon kobaḻían intua komintan, dá kotaauan bidon monimu kon ki Allah in ḷagi bidon momarenta saḷaku Datu.

³² Pokotaaudon in moiko! Soaḷ mita tatua in mobaḻíbí kon wakutu intau mita inta nobiag masa in naa, diápa modait matoi.

³³ Ḷangit bo butá in diábí mononoi, táe singog-Ku in mononoibí.”

Tonggina sinbá umuran kiḷuka-ḷukadmai

³⁴ “Ḷukadai in awakmu bo dika tongá umuran morai kon rame bo monginum kon oinumon inta mokoḷoḷangu andeka tongá umuran morai kon kobobiagmu, sahingga in aka wakutu-Nea bo daḻí moiangoi, yo diá mokopobasadia in moiko.

³⁵ Sin singgai tatua in moiangoi naonda bo poyogaḷap kon bayongan in intau kon dunia naa.

³⁶ Tuamai in umuran kiḷuka-ḷukadmai bo posambayang sinbá umuran moropot in moiko bo mokobaḻí simindog kon tayowon Adí Intau.”

³⁷ Aka singgai, ki Yesus in mobogoi in totundú kon bonu in Baḷoi Pososambayangan, táe aka doḷom yo sia in mayá in Buḷud Zaitun mogutun kon tua.

³⁸ Pomuḷoi in doḷo-doḷom, intau in mamangoi in Baḷoi Pososambayangan sin mokidongog kon totundú mita i Yesus.