LUKAS 20 - Alkitab Singog In Mongondow Masa In Tanaa

Kawasa i Yesus

¹ Kon singgai tobatú, ki Yesus yogot in motundú bo mopoyaput in Habar Mopia nongkon i Allah kon intau mita inta kon bonu in Baḷoi Tuhan. Imang mita itoi, mototundú mita kon agama, bo itoi mita intau Yahudi in namangoi,

² bo noguman kon i Yesus nanaa, “Pogumanka kon inami mongo kawasa i ine in pinaké-Mu mogaid kon tua mita, bo ki ine in nobogoi in kawasa tatua kon ini-Mu?”

³ Tubag i Yesus kon i monia, “Akuoi in moḻibó doman kon i monimu. Pogumanka kon i-Nakó.

⁴ Baptisan i Yohanes tua in nongkon i Allah mongo nongkon intau?”

⁵ Dá mosia in noyosingog mongo onu in potubag, kai monia, “Aka tubagan naton nongkon i Allah, dá Sia in moḻibóbí nanaa, ‘Aka natua yo nongonu sin moiko in diábí mopirisaya kon inia?’

⁶ Táe aka tubagan naton, ‘Nongkon intau, dá intau mita tanion mogarabbí in batu kon inaton,’ sin mosia in mopirisayabí kon ki Yohanes tua in tobatúbí nabi.”

⁷ Dá mosia notubag nanaa, “Diá kotaauan nami.”

⁸ Dá ki Yesus in noguman kon i monia, “Aka natua yo diá doman poguman-Ku kon i monimu mongo kawasa i ine in pinaké-Ku nogaid kon bayongan intua.”

Poumpamaan Mototomoyó mita kon Gobá in Anggur

⁹ Ki Yesus in nongonguman doman kon intau mita tatua kon poumpamaan tanaa, “Oyúon in intau in nogaid kon gobá bo pinomuḷaannea kon anggur. Onda intua pinotomoyónea kon mototomoyó mita bodongka minayá in ḻipú ibanea noonggot kon tua.

¹⁰ Onda in wakutuneadon mosipú kon bungai in anggur, ki togi gobá tatua in nopotabá in bobantungnea tobatú minayá kon mototomoyó mita tatua sin mogamá kon silainea. Táe mototomoyó mita tatua in tongábí nomongkug kon bobantung tatua poḷat pinoki pobuian monia, bo diá inogoian in onu bo onu.

¹¹ Onda intua ki togi gobá bui nopotabá in bobantungnea ibanea, táe bobantungnea tatua in binongkug doman monia poḷat pinokopo oyámai bodongka pinoki pobuian, diá doman inogoian in onu bo onu.

¹² Dá buipa doman in kitogi gobá tatua nopotabá kon bobantungnea intoḷunea, táe bobantung tatua sinomu doman monia binongkug bo dongka pinogarab kon ḷuai in gobá.

¹³ Pangabisannea ki togi gobá in norai nanaa, ‘Onupa degá in aidanku? O, potabákudon in ki adíku inta kotabi-tabiku. Aka sia yo pasti kon moinsim in mosia!’

¹⁴ Táe naonda in mototomoyó mita tatua nokoontongmai kon i adínea tatua, mosia in noyosingog bo noguman nanaa, ‘Sia naa inta mogabat kon kapunyaan i amánea. Igai bá ḻimodon naton in sia, sinbá moiḷabúdon kon i naton in gobá tanaa.’

¹⁵ Dá pinogarabdon monia in adí tatua kon ḷuai in gobá bodongka iḻimod.” Bo ki Yesus in noḻibó kon i monia, “Yo aka ki togi gobá tatua bo mobuidon mangoi, yo onu in aidannea kon mototomoyó mita tatua?

¹⁶ Notantú bidon kon mamangoi in sia moḻimod kon mototomoyó mita tatua, bo gobá tatua in potomoyóneadon kon mototomoyó ibanea.” Nokodongogmai kon tua, intau mita in noguman kon i Yesus nanaa, “Poyayúdon kaasí.”

¹⁷ Bo nobobui in ki Yesus kon i monia bo noḻibó, “Aka natua yo onubí in mangaḻe inta ain pinais kon Buk Motusi nanaa? ‘Batu inta iḷumbúdon in intau mita inta mogogaid kon bangunan nobaḻídon batu inta baraguna totok.’

¹⁸ Intau mita inta noḷabú kon batu tatua in morimumud, bo ki ine in koḻintogannea yo mobaḻí ḷobud.”

Soaḷ moguboḻi kon pajak

¹⁹ Mototundú mita kon agama bo imang mita itoi in nonotaaudon kon poumpamaan-Nea tatua in pinomakusud-Neabí kon i monia, dá ḷongasiondon monia domokon in Sia kon dodai intua. Táe mosia in moondok kon intau mobayong tatua.

²⁰ Mototundú mita kon agama bo imang mita itoi umuran monaridi mako kon i Yesus. Kon tua mosia in nonondan kon tobatú intau inta mayá kon i Yesus bo ki ubo-uboḷmai ná intau mopia. Mosia in nokiḻibó in soaḷ inta inanggap monia motaau kouḻían monia kon taḷá i Yesus, sahingga oyúondon in baḻíon monia dodoyonan podomokan kon i-Nia bo posarakan kon i gubernur.

²¹ Dá intau mita inta ain sinokouboḻian tatua in noḻibó kon i Yesus, “Pak Guru, kinotaauanbí nami kon bayongan inta siningog bo inta sinundú i Pak Guru tua in komintanbí totuu. Kinotaauan doman nami kon ki Pak Guru in motundú umuranbí taran-tarangan moguman kon onu in kinoibog i Allah. Sin ki Pak Guru in diábí momomiḻí kon intau.

²² Tuamai in pogumanka kon inami, aka podudui in hukum agama naton, motaau degá andeka diá in moguboḻi kon pajak kon i Kaisar?”

²³ Táe kinotaauanbí i Yesus in makusud monia tua. Tuamai in Sia in noguman,

²⁴ “Poontongka kon i-Nakó in tobatú doit saḷaka.” Bo Sia noḻibó, “Gambar bo tangoi i ine in naa?” Dá kain tubag monia, “Gambar bo tangoi i Kaisar!”

²⁵ Dá ki Yesus in noguman kon i monia, “aka natua yo ogoidon kon i Kaisar onu inta patus ogoi kon i Kaisar, bo ogoi kon i Allah onu inta patus ogoi kon i Allah.”

²⁶ Kon tayowon intau moantó tatua, mosia in diábí nokouḻí kon taḷá i Yesus tobatúpamai. Sedang bo tongábí noherang totok in mosia in nokodongog kon tubag-Nea tatua, dá dongkadon kibio-biómai in mosia.

Soaḷ kobiagan nongkon kinopatoian

²⁷ Tongonumai intau in Saduki namangoi kon i Yesus. (Mosia naa in kolompó intau inta moguman kon intau minatoi in diábí mobiag bui.) Mosia in noḻibó kon i Yesus,

²⁸ “Pak Guru, ki Musa in nomais kon hukum tanaa kon i naton: Aka tobatú ḷoḷaki inta ain nobuḷoi bo minatoi, táe diápa kogadí, dá ki utatnea ḷoḷaki in mustibí mononibuḷoi kon i baḷunea tatua, sinbá sia in mobogoi in buí kon i utatnea inta ain minatoi.

²⁹ Nokoimontandon in nobaḻí kon inaya pitu mogutat inta komintan ḷoḷaki. Inta guya-guyang nobuḷoi kon tobatú bobay. Táe ḷoḷaki tatua minatoi bo diápa kogadí.

³⁰ Dá bobay tatua in bui bo pinobuḷoi i ai-ainea induanea, táe minatoi doman in ki ai-ainea tatua bo diápa doman kogadí.

³¹ Natua doman in nobaḻí kon i ai-ainea intoḷunea dapot impitunea. Mosia nodait minatoi takin diá kogadí.

³² Pangabisannea bobay tatua in minatoi doman.

³³ Yo naonda intua? Ki ine in ki buḷoi in bobay tatua kon sigad i nayapitu tatua aka kon singgaidon kobiagan bui in intau mita minatoi, sin taya pitu tua in komintanbí ain notonibuḷoi takin bobay tatua?”

³⁴ Dá ki Yesus in noguman kon i monia nanaa, “Intau mita inta nobiag masa in naa mobuḷoi ande mokipobuḷoibí mita,

³⁵ táe intau mita inta patus biagon bui nongkon kinopatoiannea, bo mobiag kon masa inta moiduduimai, mosia tua in diá bidon bui morobuḷoi ande mokipobuḷoi.

³⁶ Sin kaadaan monia tua in naonda bidon bo malaekat inta diá bidon mato-matoi. Mosia tua inta sinangoian ki adí mita i Allah sin aindon biniag bui nongkon kinopatoian monia.

³⁷ Ki Musa tontaní aindon noguman kon intau minatoi in totu-totuubí kon biagon bui. Tua in pinaisnea kon Buk Motusi inta nongonguman kon onu in inontongnea kon yua-yuak in díat. Kon tua in ki Tuhan sinangoinea, ‘Ki Allah i Abraham, i Ishak bo i Yakub.’

³⁸ Sia in deemanbí ki Allah in intau minatoi, táe ki Allahbí in intau inta nobiag. Sin kon tayowon i Allah komintan intau in mobiagbí.”

³⁹ Nokodongogmai kon tua, tongonumai in mototundú mita kon agama in noguman nanaa, “Tubag i Pak Guru tua in mopia totok.”

⁴⁰ Tuamai in diádon kobaḻí nopoḻibo-ḻibó in mosia kon i Yesus.

Ki Yesus bo ki Daud

⁴¹ Bo ki Yesus in noḻibó kon i monia, “Naonda sin intau in mogumanbí kon Datu Mopoposaḷamat tatua in buíbí i Daud?

⁴² Bokaka ki Daud tontaní ain nomais kon bonu in buk Mazmurnea nanaa, ‘Ki Tuhan aindon noguman kon i Tuangku: Ḻitúdon kon dotá in koḷanan-Ku,

⁴³ modapot in saturumu mita baḻíon-Ku tumungkud kon ini-Mu.’

⁴⁴ Dá aka ki Daud tontaní monangoi kon i-Nia ki Tuangnea, yo naondabí kon Sia tua in tangoionbí buí i Daud?”

Tonggina i Yesus

⁴⁵ Koyogotpa intau mita mokidongogmai kon i-Nia, ki Yesus in nongonguman doman kon murí-Nea mita nanaa,

⁴⁶ “Mokopoingat in moiko kon mototundú mita kon agama. Mosia tua in moibo-ibog mogiḷambung moonag aka maya-mayá mako, bo moibog doman totok horomaton kon pasar mita. Mosia tua in moibo-ibog doman ḻimitú kon muna totok aka kon baḷoi pososambayangan bo kon bobutungan mita.

⁴⁷ Mosia tua mongongakaḷ kon intau inta dongkadon boba-bobay bo mogagow kon baḷoi monia. Bo oaid monia inta moraat tatua oḻingoian monia in sambayang inta moḷanggó! Hukuman kon i monia tua in nopastibí kon mobogat totok!”