LUKAS 2 - Alkitab Singog In Mongondow Masa In Tanaa

Kinolahiran i Yesus

¹ Kon wakutu intua ki Kaisar Agustus nomarenta nokipais in tangoi in bayongan intau kon dodatuan in Rum.

² Naa in pinomangkoian pinogiapan kon intau mita, wakutu in ki Kirenius nobaḻí gubernur kon butá in Siria.

³ Intau mita minayá nokipais in tangoi monia kon ḻipú monia tontaní.

⁴ Ná doman tua in ki Yusup. Sia in nobuat nongkon ḻipú in Nazaret kon Galilea bo minayá in Betlehem butá in Yudea, ḻipú inta kinolahiran i Daud, sin sia in buí i Daud.

⁵ Sia takin i Maria ki kantangnea inta sidiadon tua, nokipais doman in tangoi monia.

⁶ Naonda in mosia kon Betlehem notompodon in wakutu i Maria mononggadí.

⁷ Sia nopolahir in adí ḷoḷaki, ki adínea guya-guyang. Adí tatua binakutnea in yumbit in daing bodongka pinouḻid kon bonu in duḷang sin mosia in diá nokouḻí kon baḷoi pinongandupan.

Gombala mita bo malaekat

⁸ Doḷom tua in kon ḻipú tatua, oyúon in gombala mita inta yogot in moḷukad kon domba mita monia.

⁹ Indoianmai sinimindogbí magí in malaekat i Tuhan, bo nokipogontong kon i monia. Sindar i Tuhan nonimbayag kon i monia, dá totok inangoian in ondok i mosia.

¹⁰ Táe malaekat tatua in noguman, “Dika moondok! Sin akuoi in mamangoi moguman kon habar mopia kon i monimu, habar inta totok in mokosanang kon gina in bayongan intau.

¹¹ Singgai in naa kon ḻipú i Daud, noilahirdon in Datu inta mopoposaḷamat kon i monimu, tuata in ki Kristus, ki Tuhan naton.

¹² Yo bá kotaauan monimu, yo naa in tandanea: Moiko in mokodungkuḷ kon adí mointok inta binakut in yumbit in daing bo pinouḻid kon bonu in duḷang.”

¹³ Bo daḻídon malaekat tatua sinakinan in malaekat inta nobarong ibanea, inta nodayow kon i Allah, kai monia,

¹⁴ “Dinayo-dayowdon in ki Allah kon tampat inta Totok in Moḷantud! Bo dodamean umuran kotaki-takin monimu, intau inta umuran mogaid kon mokosanang kon gina i Tuhan!”

¹⁵ Naonda in malaekat mita tatua nonaḷámai kon i monia sin nobuidon kon soroga, gombala mita tatua noyosingog. Nanaa in yosingog monia tua, “Koḻigai bá mayá in Betlehem in kita bo moindoi kon onu inta ain nobaḻí kon tua, ná inta ain pinoguman i Tuhan kon i naton.”

¹⁶ Dodaipa doman tatua mosia minayá nokipodungkuḷ kon i Maria bo kon i Yusup takin adí mointok inta pinouḻid mako kon bonu in duḷang.

¹⁷ Bo naonda in inontong monia in adí mointok tatua, inouman in gombala mita tatua in onu inta ain pinoguman in malaekat i Tuhan kon i monia soaḷ adí tatua.

¹⁸ Bo intau mita inta nokodongog kon ouman in gombala mita tatua nongoherang.

¹⁹ Táe ouman tatua sinagú mako i Maria kon bonu in ginanea bo umuran kon bonu in raiannea.

²⁰ Onda intua nobuidon in gombala mita tatua sindaḷan modayow bo moduí kon i Allah sin onu inta ain inontong bo dinongog monia tua notongkai inta ain pinoguman in malaekat kon i monia.

Singgai pinosunatan kon i Yesus

²¹ Naonda in umurdon waḷu nosinggai, Adí tatua sinunat. Bo sinangoian monia ki Yesus, tangoi inta pinoki ponangoi in malaekat kon i-Nia wakutu in diápa kon bonu in sian i iná-Nea.

Ki Yesus pinosarakan kon i Tuhan kon Baḷoi Tuhan

²² Bo naonda in notompodon wakutunea pondaritan podudui in hukum i Musa, ki Yesus in dinia monia kon Yerusalem sin posarakan kon i Tuhan.

²³ Sin oyúon pinais kon bonu in hukum i Tuhan, nanaa, “Komintan adí ḷoḷaki guya-guyang mustibí posarakan kon i Tuhan.”

²⁴ Mosia in makusud doman mobogoi in ḷagapan tarangkuku topar andeka paḷoma doyowa inta nongoguodpa mobaḻí kuruban ná inta ain sinantú kon Hukum i Tuhan.

²⁵ Kon wakutu intua, kon Yerusalem oyúon intau tangoinea ki Simeon. Sia naa intau mopia bo inta umuran dinumudui kon parenta i Tuhan, bo sia in mogoḷat doman mako kon koangoian in mopoposaḷamat kon Israel. Sia naa in umuran kinawasa in Roho i Allah.

²⁶ Roho i Allah ain noguman muna kon inia kon sia in diápabí matoi aka diápa mokoontong kon Datu Mopoposaḷamat inta pinodandi i Tuhan.

²⁷ Singgai intua sia dinia in Roho i Allah minayá sinumuot kon Baḷoi Tuhan. Naonda in ki Yusup bo ki Maria nodia kon i Yesus inta mointokpa tua kon Baḷoi Tuhan sin pogaidan kon onu inta ain sinantú in hukum agama.

²⁸ Indoianmai ginamáneabí in ki Yesus bo kinoyotan poḷat nodayow kon i Allah, kai-nia,

²⁹ “Tanaa mako Tuhan, aindon inaidan-Mu onu inta pinodandi-Mu. Tuamain pomayádon mako in bobantung-Mu naa matoi takin pia in gina.

³⁰ Sin mataku tontaní inta ain nokoontong kon mopoposaḷamat inta nongkon ini-Mu.

³¹ Sia in sinadia-Mu kon bayongan in intau:

³² sia naonda bo bayag inta nonimbayag kon daḷan in intau mita ibanea, sinbá mosia in mamangoi kon ini-Mu; tuata in bayag inta mobaḻí dodoyonan poduían kon umat-Mu Israel.”

³³ Ki iná bo ki amá-Nea noherang totok in nokodongog kon onu in siningog i Simeon kon Adí tatua.

³⁴ Ki Simeon nomarakat kon i monia bo noguman kon i Maria ki iná in Adí tatua, “Adí tanaa aindon piniḻí i Allah sin momutú bo moposaḷamat kon moantó intau Israel. Sia in mobaḻí tanda nongkon i Allah, inta bayowan in moantó intau,

³⁵ bo iko Maria in mokorasa naonda bo tura-turakon in pitow, táe Adí tanaa in mobuká kon onu inta noibuni kon gina in intau moantó.”

³⁶ Kon tua oyúon doman in nabi bobay inta ain nogoguyang totok. Ki Hana in tangoinea, ki adí i Panuel, nongkon suku in Asyer. Pitu notaong sia nobiag noyotakin i buḷoinea,

³⁷ táe tanaa sia dongkadon boba-bobay, bo umurnea aindon waḷu nopuḷú boopat notaong. Sia umuranbí mamangoi in Baḷoi Tuhan. Doḷom bo singgai sia mogaid kon onu inta kino ibog i Tuhan, sia in mosambayang bo mopuasa.

³⁸ Bo kon dodai intua sia in namangoi doman, bo nodayow kon i Allah bo noginsilang kon intau mita inta mogoḷat mako kon wakutu koangoian i Tuhan moposaḷamat kon Yerusalem. Pinogumannea mongo ki ine in Adí tatua.

Nobui kon Nazaret

³⁹ Naonda in nodait inaidan i Yusup bo i Maria onu inta pinarenta kon hukum i Tuhan, mosia in nobuidon kon Nazaret kon Galilea.

⁴⁰ Adí tatua nodugangdon in koḷoben bo koropot-Nea. Sia mobijaksana totok bo totok doman kinotabi i Allah.

Ki Yesus kon Baḷoi Tuhan

⁴¹ Pomuḷoi in taong guyanga i Yesus mayámai in Yerusalem sin porayaan kon singgai moḷoben Paska.

⁴² Bo naonda in ki Yesus umurdon mopuḷú bodoyowá notaong, mosia in minayá in Yerusalem moraya kon singgai in Paska, ná biasamai.

⁴³ Naonda in nopaḷutdon pinorayaan tatua, mosia nobuidon, táe ki Yesus in kon Yerusalempabí bo diá kinotaauan i iná bo i amá-Nea.

⁴⁴ Kai monia kamai Sia in noitakinbí kon yua-yuak in intau mita inta topobayáan monia tua. Bambí tosinggaidon kon binayáan monia bo mulaidon sinayak monia in Sia kon sigad in ginaḷum mita monia bo kon bayongan in intau inta nogogintaauan monia.

⁴⁵ Táe diá noyodungkuḷ monia, dá mosia in nobui kon Yerusalem bo notayak kon i-Nia.

⁴⁶ Naonda in toḷudon nosinggai in pinotayakan monia, indoianmai monia yo kon bonubí in Baḷoi Tuhan in Sia. Sia ḻimitú mako kon yua-yuak in mototundú mita kon agama bo mokidongog mako kon potundúan monia bo poḷat doman in Sia mopoḻibó-ḻibó kon i monia.

⁴⁷ Komintan intau inta mokodongog in mongoherang sin totok mopandoi in Sia motubag kon onu in ḻibóon.

⁴⁸ Natua doman in guyanga-Nea. Totok doman noherang in nokoontong kon i-Nia. Dá ki iná-Nea in noguman nanaa kon i-Nia, “Uḻe, nongonu inaidan-Mubí in nanaa kon inami? Noḻia-ḻiawdon totok in gina naminda i amá-Mu in notayak kon ini-Mu!”

⁴⁹ Táe ki Yesus notubag, “Nongonu sin ki amá bo ki iná in motayakbí kon i-Nakó? Eta degá diábí kinotaauan i amá bo i iná kon Akuoi in mustibí oyúon kon bonu in Baḷoi i Amá-Ku?”

⁵⁰ Táe diá kinomangaḻean monia in singog i Yesus tatua.

⁵¹ Onda intua ki Yesus nobuidon kon Nazaret noyotakin monia bo umuran dinumudui kon parenta in guyanga-Nea. Bayongan inta ain nobaḻí umuran sinagú i Maria kon bonu in ginanea.

⁵² Kodugang-kodugangdon in koḷoben bo kopandoi i Yesus, bo Sia in umuran kinotabi i Allah bo kinoibog in bayongan intau.