LUKAS 17 - Alkitab Singog In Mongondow Masa In Tanaa

Soaḷ mita inta mokopopisí mogaid kon dosa

¹ Ki Yesus in noguman kon murí-Nea mita, “Soaḷ mita inta mokopopisí kon intau mogaid kon dosa in pastibí kon oyúon. Táe moboditobí in intau inta mokopopisí tatua!

² Intau natua in maníka bo popotogotan in gantung kon sigogownea, bo ḷadungon kon dagat dika in mobiag in sia bo tongá mokopopisí kon intau mita mointok tanaa mogaid kon dosa.

³ Tuamai, mokopoingatdon! Aka ki utatmu bo mogaid kon noitaḷá, yo toboḷow. Aka sia bo moibog mokidongog, yo ampungai.

⁴ Aka sia bo nogaid kon dosa kon inimu, kopitu in tosinggai bo pomuḷoi doman mako in sia mamangoi bo moguman, ‘Maapondon akuoi,’ yo ampungaibí doman in sia.”

Soaḷ pirisaya

⁵ Dá rasuḷ mita tatua in noguman kon i Tuhan Yesus, “Tuhan, iropotaidon in pirisaya nami.”

⁶ Tubag i Tuhan, “Aka oyúon in pirisaya monimu tongákabí ná koḷoben in batoḷ in sesawi, yo moiko in motaaubí moguman kon pangkoi in kayu inta moḷoben tatua, ‘Korabutdon in iko bo kobiagdon kon bonu in dagat,’ dá pangkoi in kayu tatua in dumuduibí doman kon singogmu.”

Oaidan in bobantung kon i tuangnea

⁷ “Aka kuma bo kon sigad monimu nion kobobantung inta nomajeko kon gobá andeka noḷukad kon domba, bo aka bobantung tatua mobuidon mangoi, yo degá moiko in moguman nanaa, ‘Igai bá mongaandon’?

⁸ Tantú diábí natua! Sia in pastibí moguman kon bobantungnea nanaa, ‘Koḻikatdon bo oḷudaipa in akuoi. Pogiḷambung in ḷambung inta modarit bo oḷaton in akuoi dapot in mopaḷut mongaan bo monginum; bain tua bo mongaan in iko.’

⁹ Umpaka yo dayowonneapa doman in bobantungnea tatua sin aindon inaidannea inta pinoki aid kon inia?

¹⁰ Natua doman in moiko. Aka inaidandon mita monimu in onu inta pinoki aid kon i monimu yo singogdon nanaa, ‘Kami naa in tongábí bobantung mita inta diá in baragunanea; kami in tongábí mogaid kon onu inta pinoki aid kon inami.’ ”

Ki Yesus nongundam kon intau mopuḷú

¹¹ Kon bonu in binayáan mopobayá in Yerusalem, ki Yesus nongin daḷan inta kon sigad in Samaria bo Galilea.

¹² Wakutu in Sia sinumuotdon kon tobatú ḻipú, Sia inangoi in intau taya mopuḷú inta pinanyaki kuḻit inta mokorongó. Mosia in tongábí sinimindog mako nongkon moyayú

¹³ bo nomaḷú nanaa, “Yesus! Tuang! Kotabipa in kami naa!”

¹⁴ Dá ki Yesus in nobobui kon i monia bo noguman, “Bayádon bo pokiindoi kon i imang mita in awak monimu nion.” Bo kon daḷanpa in mosia, nopiadon takit monia tua.

¹⁵ Wakutu in tobatú intau kon sigad monia tua nokotaaumai kon sia ain nopia, sia nobui mangoi kon i Yesus sindaḷan nodayow kon i Allah.

¹⁶ Noiyaputmai kon i Yesus, sia in sinumungkud kon tayowon sioḷ-Nea bo nopoyaput in sukur moantó kon i Yesus. Sia tua in intau in Samaria.

¹⁷ Dá ki Yesus in noguman kon inia, “Kinotaauan-Ku kon moiko mopuḷú in komintan bidon nongopia, yo onda in taya siow?

¹⁸ Nongonu sin tongábí intau inta mokokiangoi in noibog namangoi bui bo mopoyaput in sukur moantó kon i Allah?”

¹⁹ Bo ki Yesus in bui noguman kon intau tatua, “Pobuatdon bo bayádon. Iko in nopirisaya kon i-Nakó dá nopia.”

Wakutu i Allah mamangoi momarenta

²⁰ Tongonumai intau in Parisi in namangoi bo noḻibó kon i Yesus mongo toonu in ki Allah in mamangoi momarenta. Dá ki Yesus in notubag, “Aka ki Allah momarenta yo diábí pinangkoi kon tanda mita inta koontongan in intau,

²¹ dá intau in moguman nanaa, ‘Indoiaika, sia in naa!’ andeka, ‘Kon tua in dia!’ Sin ki Allah in nomangkoidon nomarenta kon yua-yuak monimu.”

²² Ki Yesus in noguman kon murí-Nea mita nanaa, “Moiangoibí in wakutunea, moiko in moibog moindoi kon tobatú singgai nongkon singgai mita i Adí Intau tatua, táe moiko in diábí mokoontong.

²³ Táe oyúon intau in moguman kon i monimu nanaa, ‘Indoiai, kon tua in sia!’ andeka ‘Indoiai, kon naa in dia!’ Táe dikabí in moiko ḷumuai bo motayak kon i-Nia.

²⁴ Sin naonda bo kilat inta nonimbayag nongkon popod in ḷangit toḷosi bo mopobayá doman popod in ḷangit tobotak natuata in singgai koangoian in Adí Intau.

²⁵ Táe Sia in munapabí mokorasa kon roriga bo diápabí tarimaan in intau mita masa in tanaa.

²⁶ Kon singgai inta koangoian in Adí Intau naonda bo kon masa i Nabi Nuh tungkuḷ intua.

²⁷ Intau mita in nongaanbí bo nonginum, nobuḷoi bo pinobuḷoi nodapot kon singgai ki Nuh sinumuotdon kon bonu in kapaḷ bo ḷunud moḷoben namangoi bo nomutú kon intau mita tatua.

²⁸ Ná doman tua in nobaḻí kon masa i Lot. Intau mita in nongaan, nonginum, nopotaḷui, notaḷui, nomunak bo nobaḷoi.

²⁹ Táe naonda in ki Lot iḷumuai nongkon Sodom, kon singgaipa doman tatua, tuḷu bo balerang noḷabú nongkon ḷangit bo nomutú kon i monia komintan.

³⁰ Natua doman in mobaḻí kon wakutu in Adí Intau mamangoi.

³¹ Kon singgai tatua, aka ki ine in kon tudu in atop in baḷoinea, yo donaaidon moponag bo mogamá kon kapunyaannea kon bonu in baḷoi. Natua doman intau inta kon gobá, donaai bidon mobui kon baḷoinea.

³² Toropdon onu inta ain nobaḻí kon i buḷoi Lot!

³³ Intau inta moramuji totok moposaḷamat in nyawanea, yo sia in kobuḻian in nyawanea, táe intau inta kobuḻian in nyawanea sin dinumudui kon i-Nakó, sia in mosaḷamatbí.

³⁴ Pirisayaai in singog-Ku tanaa: Kon doḷom kobaḻían intua, oyúon doyowa intau in nosiug toḷantaan. Tobatú in diaan, tobatú in taḷaan.

³⁵ Doyowa in bobay inta koyogot mogiḻing kon gandum, tobatú in diaan, tobatú doman in taḷaan. [

³⁶ Aka doyowa doman intau in yogot nogaid kon gobá, yo tobatú in diaan, bo tobatú doman in taḷaan.]”

³⁷ Dá murí mita i Yesus in noḻibó kon i-Nia, “Kon onda in kobaḻían intua komintan, Tuhan?” Ki Yesus in notubag, “Kon onda oyúon mahaḷuk minatoi, kon tua oyúon doman in ḷagapan mokokaan kon mahaḷuk minatoi in moyosipun.”