LUKAS 13 - Alkitab Singog In Mongondow Masa In Tanaa

Oaid inta diá mopia modia kon roriga

¹ Kon wakutu intua oyúon intau in nongonguman kon i Yesus soaḷ intau mita in Galilea, inta dugú monia pinoyobauk i Pilatus in dugú in mahaḷuk inta pinosumba monia kon i Allah.

² Nokodongogmai kon natua, ki Yesus in noguman kon i monia, “Kai monimu kamai dá intaubí mita in Galilea inta iḻimod monia tua in mobayo-bayong in dosa nongkon intau mita in Galilea ibanea?

³ Diáa! Táe pokotoropdon in moiko: aka moiko bo diá mogogai in mogaid kon dosa, yo moiko in moputúbí komintan, naonda bo mosia.

⁴ Andeka kai monimu kamai yo intaubí inta mopuḷú bowaḷu inta kinoumpagan in ḷangkeang kon diug in Siloam in moḷobe-ḷoben in dosa nongkon intau mita inta nogutun kon Yerusalem?

⁵ Diáa! Komintanpa doman in poguman-Ku kon i monimu: Aka moiko bo diá mogogai in mogaid kon dosa, yo moiko in moputúbí doman ná mosia.”

Poumpamaan pangkoi in ara inta diá nomungai

⁶ Nopaḷut mako kon tua ki Yesus in nongonguman kon poumpamaan, nanaa, “Oyúon intau inta gobánea kinobiagan in pangkoi in ara. Sia in namangoi notayak kon bungai in pangkoi ara tatua, táe diá nokouḻí.

⁷ Dá sia in noguman kon moḷoḷukad kon gobá in anggurnea tatua, ‘Aindon toḷu notaong in akuoi umuran mamangoi motayak kon bungai in pangkoi ara tanaa, táe diá kon dodai onda in akuoi nokouḻí kon bungainea. Dá maní pupuḷdon in pangkoinea naa! Sin diábí in baraguna kobiagannea kon butá tanaa!’

⁸ Táe moḷoḷukad kon anggur tatua in noguman nanaa, ‘Pomayápa mako in kobiagannea in taong tanaa, bain pasoḷanku bo pupukan in pangkoinea.

⁹ Dika-dika bo taong moiduduimai naa momungai in sia. Táe aka diápa doman yo pupuḷonku bidon.’ ”

Ki Yesus nongundam kon intau notakit singgai in Sabat

¹⁰ Kon singgai in Sabat, ki Yesus minayá in baḷoi pososambayangan bo nobogoi in totundú.

¹¹ Kon tua oyúon in tobatú bobay inta ain mopuḷú bowaḷu notaong notakit. Bobay tatua nobungkutdon dá diádon motuḻid in sosindognea.

¹² Naonda inontong i Yesus in sia, ki Yesus in noguman, “Iná, nopia bidon in takitmu!”

¹³ Bo pinoukat-Nea in ḻima-Nea kon uḷu in bobay tatua, dá kon dodaipa doman intua sia in sinimindog notuḻid bo poḷat nodayow kon i Allah.

¹⁴ Táe itoi in baḷoi pososambayangan kon tua sinumorú totok in nokoontong kon i Yesus nongundam kon singgai in Sabat. Itoi in baḷoi pososambayangan tatua in noguman kon intau moantó kon tua, “Onom nosinggai in motaau pogaidan monimu, manangka intua angoidon kon singgai mita tatua bo mokiundam, dikabí in kon singgai in Sabat!”

¹⁵ Táe ki Tuhan in noguman kon inia, “Ei intau mongomunapik, degá diábí kinotaauan monimu kon moikopa momuḻi doman kon sapi andeka keledai monimu nongkon ḷantungnea aka kon singgai in Sabat sin bayáan poinumon.

¹⁶ Kon naa oyúon in bobay inta mopuḷúdon bowaḷu notaong in umuran kinokodan mako in Ibilis. Ibilis tatua musti inggamáan nongkon inia. Sin sia tua in buíbí doman i Abraham?”

¹⁷ Nokodongogmai kon singog i Yesus natua, bayongan intau kon tua inta mosaturu kon i-Nia komintan nongooyá; táe ibanea mako in totokbí in nopia gina in nokoontong kon oaid mokoherang inta inaidan-Nea tatua.

Poumpamaan batoḷ in sesawi

¹⁸ Ki Yesus in bui noḻibó, “Onu degá in motaau-Ku popoumpamaan aka ki Allah mamangoi momarenta saḷaku Datu? Naonda degá in kaadaannea?

¹⁹ Kaadaannea tua in naonda bo batoḷ in sesawi, inta ginamá in intau bo pinomuḷa kon gobánea. Batoḷ tatua in nobiag simimpangkoi, dá angoian in ḷagapan bo ponompugadan in pangkoinea.”

Poumpamaan ragi

²⁰ Onda intua ki Yesus in noḻibó bui, “Onupa doman in motaau-Ku popoumpamaan aka ki Allah mamangoi momarenta saḷaku Datu?

²¹ Sia naonda bo ragi inta ginamá in tobatú bobay bo pinobauk kon topong opat nopuḷú noliter, bo kinaui nodapot in kinumutad komintan.”

Ngara inta mosisí

²² Onda intua ki Yesus minayá in kotá-kotáan bo ḻipu-ḻipúannea bo sindaḷan mopoyaput in Habar Mopia mopobayá ná Yerusalem.

²³ Bo oyúon intau in noḻibó nanaa kon i-Nia, “Tuhan, tongá topiḻik degá in intau posaḷamaton?” Dá ki Yesus in notubag,

²⁴ “Poramujidon tumuot kon ngara inta mosisí! Sin pokoingat! Mobarongdon totok in intau moramuji in tumuot kon daḷan tatua táe diá mokotuot.

²⁵ Aka ki togi baḷoi bo simindogdon moḻingkop kon ḷoḻingkop in baḷoinea, yo moiko in dongka bidon simindog mako kon ḷuai bo umuran monangkokó bo moguman, ‘Tuang, bukataipa in ḷoḻingkop sin tuotan nami!’ Táe ki togi baḷoi tatua in motubag kon i monimu nanaa, ‘Diábí kinotaauan-Ku mongo nongkon onda in moiko!’

²⁶ Dá moiko in moguman doman nanaa, ‘Kami inta ain nongaan bo nonginum noyotakin i Tuang, bo ki Tuang doman inta ain nopoyaput in Habar Mopia kon kotá mita nami!’

²⁷ Bo Sia in bui motubag kon i monimu, ‘Diábí kinotaauan-Ku mongo nongkon onda in moiko. Bayádon nongkon naa, moiko intau mita inta nogaid kon mongoraat!’

²⁸ Kon wakutu in mokoontong in moiko kon i Abraham, kon i Ishak bo kon i Yakub takin nabi mita mogaid kon rame kon bonu in dunia mobagu i Allah, yo mongombaḷbí in moiko sin moajar in gina monimu sin aindon inuntun pinoḷuai!

²⁹ Intau mita inta nongkon Pomukaan, Toyopan, Utuan bo Toḷatan komintan mamangoi sin morame kon bonu in Dunia Mobagu i Allah.

³⁰ Bo totuubí kon oyúon intau inta noitontumi, mobaḻí moiuna totok, bo intau inta noiuna totok mobaḻí moitontumi.”

Ki Yesus notabi kon kotá in Yerusalem

³¹ Kon wakutu intua tongonumai degá intau in Parisi namangoi bo noguman kon i Yesus, “Bayádon! Taḷaaidon in tampat tanaa! Bayádon in tampat ibanea mako, sin ki Herodes in monomayá mako moḻimod kon ini-Mu.”

³² Táe ki Yesus in noguman kon i monia, “Bayádon bo poguman kon intau tatua inta moibog momoguyaat kon tomayá i Allah, ‘Singgai naa bo ikoḷom akuoi in moguntun kon dimukud moraat bo mongundam kon intau mita notakit, táe kon singgai intoḷunea, Akuoi in mongingguputdon kon oaidan-Ku.’

³³ Táe umpaka natua yo Akuoi in mustipabí mongingguput kon bobayáan-Ku in singgai naa, ikoḷom bo toumá, sin diábí mopia in tobatú nabi ḻimodon kon ḷuai in Yerusalem.

³⁴ Yerusalem, Yerusalem! Nabi mita sinokoḻimodmu! Totabá mita i Allah sinokoarab monimu in batu nodapot in minatoi! Aindon kotongonu degá Akuoi in moibog mosipun kon intau mita inta kon kotámu, naonda bo ki iná in manuk mogoob kon i adínea mita, táe moiko in doíbí!

³⁵ Tuamai taḷaan i Allah in moiko. Sinbá kotaauan monimu, nongkon tanaa mako moiko in diá bidon mokoontong kon i-Nakó bui, modapot in moiko mosingog nanaa, ‘Binarakatan in Sia inta namangoi kon bonu in tangoi i Tuhan.’ ”