LUKAS 12 - Alkitab Singog In Mongondow Masa In Tanaa

Tompoingat kon intau mita inta mongomunapik

¹ Kon dodai intua ribuan intau in nosipun, dapot in moyopuntukdon kon sioḷ. Koyogotpa moyosipun in intau mita tatua, ki Yesus in noguman kon murí-Nea mita, “Mokopopia in moiko kon ragi intau in Parisi, makusudnea in oaid intau in Parisi inta mongomunapik.

² Diábí tobatúmai in noibuni in diá koontongan bo diá doman in tobatúmai inta binuni in diá popotaau.

³ Manangka intua onu inta siningog monimu doḷom yo kodongoganbí kon wakutu in mobayagdon; bo onu inta pinogombong monimu sinbá diá dongogon in bayongan intau, tua in pobaḷúbí kon bayongan intau.”

Kotoguondokbí kon i Tuhan

⁴ “Pokotorop uḻe yobayat-Ku mita! Dika moondok kon i monia inta tongá motaau moḻimod kon awak, táe onda intua diádon motaau mogaid moiḻiu kon tua.

⁵ Naa in poguman-Kudon kon i monimu mongo ki ine in musti koondok monimu. Kotoguondokbí kon i Allah! Sin aka Sia yo mopaḷut mako moḻimod, yo oyúon doman in kawasa-Nea mopogarab kon bonu in naraka! Popirisayadon, Siabí tua in musti koondok monimu.

⁶ Ḻima in ḷagapan dui-duit pinotaḷui noonag totok in boḻinea. Táe umpakabí natua yo diábí in kon sigad monia tua in kinoḻiongan i Allah.

⁷ Nodapot in buok kon uḷumu, yo kinotaauan-Neabí in kobayongnea. Manangka intua yo dikabí moondok in moiko; sin moikobí in momaha-mahaḷ in ḷagapan mita tatua!”

Mongaku kon murí i Kristus kon tayowon intau moantó

⁸ “Torop kopira in naa: Intau inta moibog mongaku kon tayowon intau moantó kon sia in dumodudui-Ku, Sia in akúon doman in Adí Intau kon tayowon in malaekat mita i Allah.

⁹ Táe ki ine in momayow kon tayowon intau moantó kon sia in dumodudui-Ku, yo sia in bayowan doman in Adí Intau kon tayowon in malaekat mita i Allah.

¹⁰ Aka oyúon intau mopoyaput in tosingogon poḷawang kon i Adí Intau, yo sia tua in ampunganbí; táe aka ki ine in moningkuḻe kon Roho i Allah, yo sia in diábí ampungan.

¹¹ Aka moiko bo diaan kon baḷoi mita pososambayangan sin sidangon kon tayowon pomarenta andeka kon tayowon in mongongawasa, yo dikabí in moiko mohawatir in momikir kon onu in potubagmu.

¹² Sin onu inta musti singogonmu tua in pogumanbí in Roho i Allah kon inimu aka wakutuneadon.”

Poumpamaan intau nooyúon inta bodok

¹³ Oyúon tobatú intau kon sigad in intau mobarong kon tua noguman kon i Yesus, “Pak Guru, pogumanpa kon i utatku sinbá silaianneadon in akuoi in kapunyaan inta ain sinaḷaan in guyanga nami kon inami.”

¹⁴ Táe ki Yesus noguman kon inia, “Utat, ki ine in nopobaḻí kon i-Nakó hakim andeka mononigad kon i monimu mosilai kon kapunyaan inta sinaḷaan in guyanga monimu kon i monimu?”

¹⁵ Noiduduimai kon tua ki Yesus in noguman kon intau moantó kon tua, “Mokopopia in moiko bo umuran kiḷuka-ḷukadmai sinbá diá modunia, sin umpakabí moantó totok in kapunyaan, táe kobiagan mononoi tua in diábí sinantú in kapunyaan tatua.”

¹⁶ Nosingog mako kon natua, ki Yesus in nongonguman kon tobatú poumpamaan kon i monia, “Oyúon in tobatú intau inta nooyúon. Butá inta tonggobaanneamai umuran mobogoi in hasil mobarong.

¹⁷ Intau tatua umuran morai kon bonu in gina, kainia, ‘Tampat potagúanku kon hasil in gobáku, diádon tugat. Naondapa degá in dayaku bá tugatan?’

¹⁸ Noonggotmai kon pinoraianneamai sia noguman nanaa, ‘Nokouḻídon kon daya in akuoi; rumbunonkudon in gudang tanaa bo buikudon aidan koḷobenon. Sinbá bayongan in gandum bo kapunyaanku ibanea modait moibonu kon tua.

¹⁹ Onda intua pogumanku kon awakku tontaní; Nomujur totok in iko! Bayongan inta mopira komintan oyúon kon inimu bo kon taongannea intua mita diápabí modai-dait. Tuamai in pogogaidon in tanaa! Pongaan bo ponginumdon pakédon in kobiaganmu nion!’

²⁰ Táe ki Allah in noguman kon inia, ‘Ei iko intau inta bodok! Doḷom doman naa iko in matoi, yo ki ine in pobogoianmu kon kapunyaan inta ain sinipunmu tanion?’

²¹ Natua in mobaḻí kon intau inta moibog mooyúon bo rinut. Mosia in diábí moramuji bá mooyúon kon tayowon i Allah.”

Popirisayadon kon i Allah

²² Ki Yesus in noguman doman kon murí-Nea mita, “Tuamai Akuoi in moguman kon i monimu, ‘Dika mohawatir kon soaḷ kobobiagmu, onu in kaanon andeka onu in pakéon monimu.’

²³ Sin mobiagbí in moponti-ponting in kaanon andeka awakbí in moponti-ponting in ḷambung.

²⁴ Tarukiraka in ḷagapan kawag! Mosia diábí nogambor bo diá doman nokoyut bo diá doman in ontag inta pototagúan monia kon kaanon. Táe umuranbí doman iḷukadan i Allah! Bambíkabí bo moiko. Moiko in noiḻiubí totok kon ḷagapan mita tatua!

²⁵ Ki ine in kon sigad monimu inta popisí in moḻia-ḻiaw in gina bo motaau modugang kon umurnea, topiḻikmai?

²⁶ Dá aka moiko bo diá mokosanggup in mogaid kon soaḷ inta mointok totok natua, yo nongonu sin moḻia-ḻiawbí in gina monimu kon soaḷ inta ibanea mako?

²⁷ Tarukiraka naonda in kobobiag in bungang mita kon taman; mosia in diábí nogaid kon siningkoi bo dodagum. Táe umpakabí ki Salomo, Datu inta totok in nooyúon diábí nomaké in tobatúmai ḷambung inta ná kopira in bungang mita tatua!

²⁸ Ná doman tua in bonok kon gobá inta singgai naa nobiag, ikoḷom in tubáan. Táe umuranbí sinompia i Allah. Bambíkabí bo moiko! Táe moiko bidon in diá mongopirisaya!

²⁹ Tuamai kotantúon in raian bo dika umuran moḻia-ḻiaw in gina monimu kon soaḷ kaanon andeka inumon monimu.

³⁰ Sin tua in oaidbí in intau mita inta diá mopirisaya kon i Allah. Bokaka kinotaauan bidon i Allah kon komintan tua in paraḷubí doman totok monimu.

³¹ Tuamai aidaipa muna in onu inta kinoibog i Allah, bain tua bo mogaid kon kinoibogmu, dá onu inta igumonmu modaitbí ogoi-Nea kon inimu.”

Kapunyaan kon Soroga

³² “Moiko inta tongá topiḻik, dikabí moondok! Sin mosanangbí in gina i Amámu in mobogoi in barakat kon i monimu kon bonu in kawasa-Nea.

³³ Potaḷuidon in bayongan kapunyaanmu bo ogoi kon intau mita bogá. Bo pogaid kon pototaguan kon kapunyaanmu inta diá mogogu-goguyaat, tuata in tobatú kapunyaan inta mononoi, diá koyaputan in mononakow bo inta diá kopoguyaatan in sisik.

³⁴ Sin kon onda in kapunyaanmu, kon tua doman in ginamu!”

Bobantung inta umuran mobasadia

³⁵ “Umuran koḷuka-ḷukad in tumayow kon yagi-yagi. Musti umuran koabi-abit bo togámu in tatap poyongkiton,

³⁶ notongkai in bobantung mita inta umuran mogoḷat mako kon i tuangnea mobui mangoi nongkon pinonikaan. Aka ki tuangnea tatua mobuidon bo monangkokó kon ḷoḻingkop, yo baḷúbí bukatan monia in ḷoḻingkop.

³⁷ Momujur totok in bobantung mita inta kinotambakanmai i tuangnea umuran mogoḷat mako kon koangoian i tuangnea tatua. Pirisayabí: ki tuang tatua in baḷúbí mobasadia bo moguman kon bobantungnea mita tatua ḻimitú, bo siapa tontaní in mobantung kon i monia.

³⁸ Bo momujur domandon in bobantung mita inta kinotambakanmai i tuangnea umuranpa mogoḷat mako umpaka sia mamangoi moonggotdon kon doḷom andeka modiugdon mobayag!

³⁹ Torop in singog-Ku tanaa! Aka kuma bo kotaauandon muna i togi baḷoi in jam koangoian in mononakow, yo diábí pomayá mako i togi baḷoi in mononakow tatua tumuot kon baḷoinea.

⁴⁰ Tuamai in moiko in umuran doman kisadi-sadiamai, sin ki Adí Intau in mamangoi doman kon wakutu inta diá kotaauan monimu.”

Bobantung inta mosatia bo inta diá mosatia

⁴¹ Bo ki Petrus in noḻibó, “Tuhan, tongábí kami naa degá in pinopomakusudan in poumpamaan tatua mongo komintanbí intau?”

⁴² Ki Tuhan in notubag, “Ki ine in bobantung inta mosatia bo mopandoi, sahingga pomiaan i tuangnea itoi kon sigad in bobantungnea mita ibanea, sinbá sia mobogoi in kaanon kon i monia aka wakutuneadon?

⁴³ Mosanang totok in bobantung inta kino angoianmai i tuangnea umuranpa mogaid kon oaidan inta pinoki aid i tuangnea!

⁴⁴ Popirisaya; kon sia tua in baḻíonbí i tuangnea moḷoḷukad kon bayongan kapunyaannea.

⁴⁵ Tongá aka bobantung tatua bo moraat bo mosingog doman kon bonu in gina nanaa, ‘Ki tuangku in diápabí moiangoi,’ bo nomangkoi in sia momongkug kon bobantung mita ibanea ḷoḷaki-bobay bodongka mayá mongaan bo monginum dapot moḷoḷangu,

⁴⁶ bo ki tuang monia in mamangoi kon singgai andeka wakutu inta diá sinangka-sangka. Bo kinotambakanneamai aidnea natua, yo totokbí in bongkugonnea ná intau mita inta diá mosatia kon i Allah.

⁴⁷ Bobantung mita inta ain nonotaau kon onu in kinoibog i tuangnea táe diá mobasadia bo diá doman mogaid kon inta kinoibog i tuangnea tua, yo sia in totokbí in ḷuntaan.

⁴⁸ Táe aka intau inta diá nonotaau kon kinoibog i tuangnea bo sia in nogaid kon inta noitaḷá, dá musti sambokon, yo sia tua in sambokonbí táe koyangkóon.”

Ki Yesus mamangoi mopoyoguat

⁴⁹ Ki Yesus in noguman nanaa, “Akuoi in mamangoi modia kon tuḷu kon dunia naa. Mopia totok aka tuḷu tatua bo modokotdon!

⁵⁰ Oyúonpa in roriga moḷoben in musti kobayáan-Ku. Moajarbí totok in gina-Ku aka tua komintan bo diápa kobayáan-Ku.

⁵¹ Kai monimu kamai yo Akuoi naa in mamangoibí modia kon dodamean kon dunia naa? Diáa! Deemanbí dodamean táe bobayowanbí.

⁵² Sin nongkon tanaa mako momukábí in bobayowan kon sigad in motoḷuadí kon bonu in baḷoi. Aka kon tobaḷoian tua bo ḻima in intau, dá inta toḷu mobobayowan in doyowa andeka doyowa mobobayowan in toḷu.

⁵³ Guyanga ḷoḷaki mobobayowan i adínea ḷoḷaki andeka ki adínea ḷoḷaki mobobayowan i amánea. Ná doman tua, guyanga bobay mobobayowan i adínea bobay andeka ki adínea bobay mobobayowan i inánea. Guyá mobobayowan in mototaka bobay andeka mototaka bobay mobobayowan i guyánea.”

Moindoi kon wakutu

⁵⁴ Ki Yesus in noguman kon intau moantó kon tua, “Aka moiko bo mokoontong kon goḷom mosipun kon dotá in toyopan, yo baḷú in moiko moguman, ‘O monguyan!’ Bo totuu kon monguyanbí doman.

⁵⁵ Natua doman, aka moiko bo mokorasa kon tompot mogirup nongkon toḷatan, baḷú in moiko moguman, ‘O moninggai in naa!’ Bo totuu kon moninggaibí doman.

⁵⁶ Uḻe, moiko intau inta mongomunapik! Kaadaan in butá bo ḷangit motaau monimu takuseron táe nongonu sin tanda mita in zaman masa in tanaa in diábí motaau monimu takuseron?”

Poyodamebí in saturu

⁵⁷ “Bo nongonu sin diábí kotaauan monimu in momiḻí tontaní kon inta mopia?

⁵⁸ Aka iko bo bayáan pongaduon in intau kon pongadilan, yo ramujibí sinbá pelekara tatua in baḷú mopaḷut kon wakutu in diápa mayá in pongadilan. Sinbá diá potayownea kon hakim in iko bo posarakan kon puḻisi sin ponjaraan.

⁵⁹ Pirisayabí! Iko in diábí moiḷuai kon ponjara tatua aka inta sinuntutnea tua bo diápa kouboḻianmu.”