LUKAS 1 - Alkitab Singog In Mongondow Masa In Tanaa

Tompouna

¹ Tuang Teopilus inta mopia. Nobayongdon intau ain noramuji nomais kino tompia kon soaḷ mita inta ain nobaḻí kon sigad naton.

² Onu inta pinais monia tatua in notongkaibí in ná inta inouman kon i naton in intau mita inta ain nokoontong tontaní kon kinobaḻian in tua komintan nongkon pinomangkoianmai. Intau doman mita tatua inta minaya-mayá mako nopohabar kon onu inta ain nobaḻí tatua.

³ Tuamai in naonda in binalajarku muna intua komintan nongkon pinomangkoianmai, iraiku, mopiabí totok aka habar tatua paison kotompiaan kon bonu in buk bo ogoi kon i Tuang,

⁴ Tua in aidanku, sinbá kotaauan i Tuang kon onu inta ain sinundú mita kon i Tuang in totuubí kon ain nobaḻí.

Kinolahiran i Yohanes Mobobaptis pinotaau muna

⁵ Wakutu in ki Herodes nobaḻí datu kon butá in Yudea, oyúon inang, tangoinea ki Zakharia. Ki Zakharia naa in inang nongkon kolompó inta sinangoian “kolompó Abia” (imang mita buí i Eleazer). Ki buḷoinea buí doman in inang, tangoinea in ki Elisabet.

⁶ Kobobiag inayadua motonibuḷoi tua mokosanang kon gina i Allah, sin taya dua in umuranbí dinumudui kon parenta bo atorang i Tuhan, diábí in sinaḻiban monia.

⁷ Tongá mosia naa in diá kogadí, sin ki Elisabet in bantó bo taya dua naa aindon mogoguyang doman.

⁸ Kon singgai tobatú, wakutu in kolompó i Abia naa nokouḻí kon tonsilai tumuot kon Baḷoi Tuhan, dá ki Zakharia in minayá bo nogaid kon oaidan in imang kon tayowon i Allah.

⁹ Sin wakutu in inundi inta kabiasaan monia monantú kon ki ine in imang tumuot kon Baḷoi Tuhan mogaid kon oaidan imang, dá sia in kinopiḻían tumuot bo motubá kon kamania kon bonunea.

¹⁰ Kon dodai in pinotubaan kon kamania, bayongan in intau nosipun kon ḷuai bo nosambayang.

¹¹ Bo kon wakutu in sia notubá kon kamania, malaekat i Tuhan nokipogontong kon inia. Malaekat tatua in sinimindog kon dotá in koḷanan meja pototubaan kon kamania.

¹² Naonda in nokoontongmai kon malaekat tatua, noitaḻikokog in sia bo inangoian in ondok.

¹³ Táe kain singog in malaekat tatua kon inia, “Dika moondok Zakharia, sin mintahangmu inindongogandon i Tuhan, dá ki Elisabet ki buḷoimu tua in mopolahirbí in adí ḷoḷaki, bo mustibí tangoianmu ki Yohanes in adí tatua.

¹⁴ Mosanang bo moḷunganga totok in ginamu, ná doman tua, mobayong doman intau in mosanang in gina aka adí tatua moilahirdon.

¹⁵ Sia in mobaḻí intau moḷoben kon tayowon mata i Tuhan, bo sia tua in diábí monginum kon anggur andeka oinumon ibanea mako inta mokoḷoḷangu, bo sia in kinawasadon in Roho i Allah nongkon bonupamai in sian i inánea.

¹⁶ Mobarong in intau Israel diaannea bui mayá kon i Tuhan, Allah monia.

¹⁷ Sia in mobaḻí totabá i Tuhan inta moropot bo mokawasa ná ki Elia. Sia mopoyodame kon gina in guyanga bo adí, bo intau mita inta raian monia diá moitutui in potutuionnea bui. Tua in mangaḻenea kon sia in moposadia kon umat inta moibog dumudui kon parenta i Tuhan.”

¹⁸ Dá ki Zakharia in noḻibó kon malaekat tatua, “Nábí onda in kobobaḻí intua komintan? Kaminda motonibuḷoi naa in tumpaḷadon mogoguyang!”

¹⁹ Dá guman in malaekat tatua, “Akuoi naa in ki Gabriel inta nogundoi kon i Allah, bo ki Allah tontaní in nopotabá kon inakó mopoyaput in habar mopia tanaa kon inimu.

²⁰ Habar inta totu-totuu kon mobaḻí kon wakutu inta ain sinantú i Tuhan, tongá iko bo diá mopirisaya kon singogku naa, dá iko in diádon mokosingog dapot intua komintan mobaḻí ná kain singogku.”

²¹ Intau mobayong kon tua umuranpa doman mogoḷat mako kon i Zakharia. Mosia in noherang totok sin moonggotbí in sia kon bonu in Baḷoi Tuhan tua.

²² Naonda in sia iḷumuai, diádon in sia notaau noyosingog in intau mita kon tua, sia in dongkadon umuran monuḷadá takin ḻimanea sin umuranpa doman diá mokosingog. Bain kino onggotanea bo kinomangaḻean monia kon naanta oyúon inontongnea kon bonu in Baḷoi Tuhan tua.

²³ Naonda in nopaḷutdon i wakutunea nopobayá in oaidannea kon Baḷoi Tuhan, ki Zakharia nobuidon kon baḷoinea.

²⁴ Diá noonggot kon tua, ki Elisabet ki buḷoinea in sidiadon, bo ḻima nobuḷan sia diá iḷumua-ḷuai kon baḷoi.

²⁵ Ki Elisabet nosingog nanaa, “Pangabisannea sinuḷungan i Tuhan in akuoi, ininggamáan-Nea in onu inta mokooyá kon inakó.”

Kolahiran i Yesus pinotaaudon muna

²⁶ Naonda in onomdon nobuḷan sian i Elisabet, ki Allah bui nopotabá kon i malaekat Gabriel minayá in Nazaret, tobatú kotá kon Galilea.

²⁷ Pinotabá-Nea in malaekat tatua minayá kon tobatú mongodeaga inta ain kinantangan i Yusup, buí i Daud, ki Maria tangoi in bobay tatua.

²⁸ Malaekat tatua sinumuot kon baḷoi i Maria bo poḷat noguman nanaa, “Salam kon inimu inta binarakatan, ki Tuhan in koyota-yotakinmu.”

²⁹ Nokodongogmai kon singog tatua in ki Maria, noitaḻikokog in sia bo norai kon bonu in ginanea, onu degá in mangaḻe in salam tatua.

³⁰ Dá malaekat tatua in noguman kon inia nanaa, “Dika moondok Maria, sin iko in kinosanang gina i Allah.

³¹ Iko in mobaḻí sidia bo nopolahir in adí ḷoḷaki, bo musti tangoianmu ki Yesus in Sia.

³² Sia in mobaḻí intau moḷoben bo tangoion ki Adí i Allah Inta Totok in moḷantud. Baḻíon i Allah in Sia Datu naonda bo ki Daud ki ḷaki-Nea.

³³ Bo sia in mobaḻí doman Datu kon yua-yuak in intau mita inta buí i Yakub modapot in kopaḷutan in dunia. Dodatuan-Nea in mononoi.”

³⁴ Dá kai Maria, “Akuoi naa in mongodeagapa, yo naonda in kobobaḻí intua komintan?”

³⁵ Dá tubag in malaekat tatua kon inia nanaa, “Roho i Allah takin kawasa-Nea inta totok in moḷantud mamangoi bo mongawasa kon inimu. Tuamain Adí inta polahirmu tua in tangoion Mokudus, ki Adí i Allah.

³⁶ Bo pokotaaudon kon ki Elisabet inta ginaḷummu tua ain doman sidia onom nobuḷan. Adí inta kon bonu in siannea tua in adí ḷoḷaki, umpaka nogoguyangdon bo kain intau in bantó.

³⁷ Sin aka kon i Allah, diábí in diá motaau aidan-Nea.”

³⁸ Kain singog i Maria doman, “Akuoi naa kaasí in tongábí bobantung i Tuhan, dá onu in kinoibog i Tuhan mobaḻí kon inakó dá kobaḻídon podudui in singogmu tanion.” Onda intua malaekat tatua nonaḷámai kon i Maria.

Ki Maria minayá nokipodungkuḷ kon i Elisabet

³⁹ Diá noonggot kon tua, ki Maria minayá in tobatú kotá kon buḷud in Yudea.

⁴⁰ Sia minayá in baḷoi Zakharia. Naonda in sia sinumuot in baḷoi tatua, sia nobogoi in salam kon i Elisabet,

⁴¹ naonda in dinongog i Elisabet in salam i Maria tatua, adí inta kon bonupa in siannea tua iḻimiai noropot bo dodai doman intua ki Elisabet kinawasa in Roho i Allah,

⁴² bo poḷat nosingog noropot, nanaa, “Binarakatandon in iko kon sigad in bayongan bobay! Binarakatan doman in adí inta polahirmu!

⁴³ Ki inebí in akuoi naa nodapot in ki iná i Tuhan namangoi noindoi kon inakó?

⁴⁴ Sin totuubí kon wakutu in dinongogku in singogmu, yo adí kon bonu in sianku naa noḻiai sin mopia in ginanea.

⁴⁵ Kosanangdon iko inta mopirisaya, sin onu inta ain pinoguman i Tuhan kon inimu, totu-totuubí mobaḻí intua!”

Dodayow i Maria kon i Tuhan

⁴⁶ Ki Maria nosingog nanaa, “Akuoi in modayow kon i Tuhan,

⁴⁷ bo mopia totok in ginaku sin ki Allah in mopoposaḷamatku.

⁴⁸ Sia nokotorop kon inakó, bobantung inta nobogá! Pinangkoi kon tanaa mako bayongan in intau moguman kon akuoi in totok mosanang.

⁴⁹ Sin ki Allah inta totok in mokawasa ain nogaid kon oaidan inta totok in moḷoben kon inakó. Mokudus totok in tangoi-Nea

⁵⁰ Sia umuran mobogoi in totabi-Nea kon bayongan intau inta moondok kon i-Nia.

⁵¹ Takin kawasa-Nea inta totok in moropot, Sia in mopoyayit in bayongan intau inta mododia, bo momoguyaat kon tomayá mita monia.

⁵² Datu mita in dunia naa poponagon-Nea mita nongkon tampat pomomarentaan monia, táe intau mita inta moompá in dodia in poḷantudon-Nea.

⁵³ Sia mobogoi in bayongan inta mopia kon intau mita inta ginogoy, táe intau mita inta nooyúon poguntunon-Nea bo diá ogoian in onu bo onu.

⁵⁴ Sia in motuḷung kon Israel inta simpaḷ-Nea, podudui in dandi inta pinodandi-Nea kon i mogoguyang naton.

⁵⁵ Ki Tuhan diá mokoḻiong kon dandi-Nea, bo umuran mosanang in gina-Nea kon i Abraham bo buínea mita dapot in kopaḷutan in dunia naa.”

⁵⁶ Bo ki Maria nogutun toḷumai nobuḷan degá takin i Elisabet, onda intua sia nobui kon baḷoinea.

Kolahiran i Yohanes Mobobaptis

⁵⁷ Noiduduimai kon tua nodapotdon singgai pononggadían i Elisabet, sia nopolahir in adí ḷoḷaki.

⁵⁸ Bo naonda in topodiugnea mita bo ginaḷumnea mita nokodongog kon ki Tuhan ain nopoontong in totabi-Nea inta totok in moḷoben, dá nopia totok in gina monia, natua doman gina i Elisabet.

⁵⁹ Wakutu in waḷudon nosinggai in adí mointok tatua, mosia namangoi sin mokisunat in adí tatua, bo ibogon monia in adí tatua tangoian ki Zakharia podudui kon tangoi i amánea,

⁶⁰ táe kai inánea in, “Donaai! Sia in mustibí tangoian ki Yohanes.”

⁶¹ Dá kain tubag doman monia kon i Elisabet, “Diábí in tangoi natua kon sigad i utatmu mita.”

⁶² Bo mosia in nonuḷadá noḻibó kon i amánea mongo ki ine in ponangoinea kon i adínea tatua.

⁶³ Ki Zakharia noigum kon batu pomomais bodongka nomais nanaa, “Tangoinea in ki Yohanes.” Bo noherang in mosia komintan.

⁶⁴ Kon dodaipa doman intua sia nokosingogdon bui bodongka nodayow kon i Allah.

⁶⁵ Dá intau mita topodiugmai kon tua, komintan inangoian in ondok. Onu inta ain nobaḻí tatua, nobaḻí ouman kon bayongan ḻipú in Yudea.

⁶⁶ Bo komintan intau inta nokodongog kon ouman tatua noḻibo-ḻibóan kon bonu in gina, “Mobaḻí onu degá in adí tatua in kon singgai moiduduimai?” Sin sia kokapi-kapit i Tuhan.

Ki Zakharia nopoyaput in Habar nongkon i Tuhan

⁶⁷ Ki Zakharia, ki amá in adí tatua kinawasa in Roho i Tuhan bo sia in nopoyaput in habar nongkon i Tuhan. Nanaa in kainia,

⁶⁸ “Dinayo-dayowdon in ki Tuhan, ki Allah Israel! Sia ain notuḷung kon umat-Nea bo nonginggamá doman kon roriga monia.

⁶⁹ Sia in nobogoi in mopoposaḷamat kon i naton nongkon buí i Daud, simpaḷ-Nea.

⁷⁰ Ná inta ain pinodandi-Nea pinongin nabi-Nea mita inta ain piniḻí-Nea.

⁷¹ Sin in mopoposaḷamat kon i naton nongkon saturu mita naton bo nongkon kawasa in intau mita inta moyaat in gina kon i naton.

⁷² Sin mopoontong in totabi-Nea kon i mogoguyang naton podudui in dandi-Nea. Sin dandi-Nea tua in umuranbí kinotoropan-Nea.

^73-74 Sin tuata in ibot-Nea kon i Abraham ki amá naton, Sia in nodandi kon moposaḷamat kon i naton nongkon saturu naton, sinbá kita in diá koaputan in ondok in mogundoi kon i-Nia.

⁷⁵ Kita in umuran mogaid kon onu in kinoibog bo inta kinosanang in gina-Nea kon wakutu in mobiagpa.

⁷⁶ Bo iko, adí-Ku in tangoion nabi i Allah Inta Totok in moḷantud. Iko in pinotabá umuna kon i Tuhan sin moposadia in daḷan bayáan-Nea.

⁷⁷ Bo iko in mopotaau kon umat-Nea, kon mosia in posaḷamaton i Allah aka taḷá mita monia bo ampungan-Neadon.

⁷⁸ Ki Tuhan naton mopia in gina bo motabi doman totok. Sia in mamangoi sinbá mosaḷamat in kita. Sia naonda bo mata in singgai inta momuká doḷo-doḷom,

⁷⁹ natua in Sia monimbayag kon bayongan intau inta nobiag kon sindip bo inta umuran moondok. Sia in nodia kon i naton mayá mongin daḷan inta mopobayá in tampat inta mopia.”

⁸⁰ Ki adí i Zakharia tatua kodugang-kodugangdon in koḷobennea bo rohonea in koropot-koropot domandon. Bo sia in umuran nogutun kon padang gurun nodapot in singgai inta aindon sinantú kon pokipogontongannea kon intau in Israel.