KORINTUS 2 6 - Alkitab Singog In Mongondow Masa In Tanaa

¹ Saḷaku yobayat topogaidan i Allah, kami in mononggina kon i monimu; donaai tongá pomayá mako in totabi i Allah inta ain inogoi-Nea kon i monimu.

² Sin ki Allah ain noguman nanaa, “Kon wakutu inta kinoibog-Ku, Akuoi in nongindongogdon kon i monimu, bo kon singgai in akuoi moposaḷamat, Akuoi in motuḷung kon inimu.” Pokotorop kopia, masa in tanaa ain bidon wakutu inta kinoibog-Ku tua, bo tanaa bidon mako in singgai poposaḷamatan tatua!

³ Doíbí in kami aka oaidan nami bo potaḷáan. Manangka intua kami in tantúbí moramuji kon diá mobogoi in alasan kon tobatúmai intau in mogaid kon soaḷ tatua.

⁴ Táe naabí in popoontong nami kon bayongan in intau, onukabí in aidan nami, yo pinoniatabí nami kon kami in totu-totuubí mogogaid mita kon oaidan i Allah. Sin bayongan in yoyiga ain bidon nodait nami sinarima takin gina moonow:

⁵ kami in sinikisa, pinobonu kon ponjara, iḷoḻibutan binongkug, kami totok in mogaid, mokakit in diá mosiug bo mokakit doman in kodaitan kaanon.

⁶ Takin gina motuḻid, mobijaksana, mosabar bo mopia in gina, pinoniatadon nami kon kami in mogogundoibí i Allah. Bo takin kinumadai kon totuḷung in Roho i Allah, bo takin tabi inta noiḷuai nongkon gina inta motuḻid,

⁷ bo poḷat doman mopotaau in habar nongkon i Allah takin kawasa i Allah, pinoontongdon nami kon kami naa in mogogaid mita kon oaidan i Allah. Kami in kinumadai kon onu in kinoibog i Allah saḷaku ḷoḷutam nami kon moḷawang andeka pobela kon onu in inaidan nami.

⁸ Oyúon in mohoromat kon i nami, táe oyúon doman in moningkuḻe; oyúon in moduí, táe oyúon doman moponapud in diá totuu. Umpakabí kami in mojujur, táe kai monia kami in mouboḷ.

⁹ Kai monia in noyakag intau in nokotaau kon i nami, táe komintan intau in nonotaaubí kon inami. Sinangka monia kami in minatoi bidon, táe noniata kon kami in nobiagpabí. Umpakabí kami in pinogutú táe kami in diábí minatoi.

¹⁰ Umpakabí pinokuyang monia in gina nami, táe umuranbí moḷunganga in gina nami. Kami in koontongan nobiag nobogá, táe nobayongdon intau in binaḻí nami nooyúon. Koontongan kami diá kon onu bo onu, táe sabanarnea bayongan rupa-rupa oyúonbí kon i nami.

¹¹ Utat mita kon Korintus inta kinotabiku! Kami in taran-tarangan bidon in nosingog kon i monimu, onu in kon gina nami aindon nodait pinotaau nami.

¹² Diábí in kami mobuni kon gina kon i monimu, táe tongá bidon moiko in diá totu-totuu motarima kon i nami.

¹³ Yo tanaa in pomayápa mako in akuoi in mosingog kon i monimu naonda bo guyanga mosingog kon i adíku mita tontaní. Tarimadon in kami kon bonu in gina monimu.

Tonggina sinbá diá kopongaruan intau inta diá mopirisaya

¹⁴ Donaai moibog mobaḻí yobayat topogaidan in intau mita inta diá mopirisaya kon i Yesus; sin diábí moyokaan in natua. Sin diábí kumaan kon akaḷ aka inta mopia poyokaanon in inta moraat! Diábí doman inta bayag motobatú in sindip.

¹⁵ Diábí doman in ki Kristus moyopakat takin Ibilis. Onubí in yotongkainea intau in Keresten takin intau inta diá mopirisaya kon i Kristus?

¹⁶ Onubí in hubungan Baḷoi Tuhan bo baḷoi in berhala? Kita naa in Baḷoi Tuhan inta nobiag. Sin ki Allah tontaní ain noguman nanaa, “Akuoi in mogutunbí kon yua-yuak monia, bo mobiag moyotakin monia. Bo Akuoi in mobaḻí bidon ki Allah monia, bo mosia in mobaḻídon umat-Ku.

¹⁷ Manangka intua, taḷaaidon in intau mita inta diá nonotaau kon i Allah, bo pokopoyayúdon in moiko kon i monia. Donaaidon moibog moḻiai kon onu inta diá mopia, aka natua in moiko, yo tarimaan-Kubí.

¹⁸ Akuoi in mobaḻíbí ki Amá monimu, bo moiko in mobaḻíbí ki adí-Ku mita, natua in singog i Tuhan Inta totok in Mokawasa.”