KORINTUS 2 5 - Alkitab Singog In Mongondow Masa In Tanaa

¹ Sin kinotaauanbí nami kon aka baḷoi – makusudnea awak naton – inta pinogutunan naton kon dunia naa bo rumbunon, yo posadiaanbí i Allah in kita kon baḷoi inta kon soroga. Tampat inta pinomia i Allah tontaní bo inta diá mogogu-goguyaat.

² Kon wakutu in kon baḷoipa tatua, kita in umuranbí mogamui sin moibogdon totok mogutun kon baḷoi naton inta kon soroga.

³ Baḷoi tatua in awak naton inta nobagu.

⁴ Sin wakutu in kon baḷoipa ilo-ilow naa, kita tantú mogamui sin mobogat totok in roriga inta moiantug. Deemanbí igu-igumon mako kon bá matoidon in awak naton ilo-ilow naa, táe lantaranbí moibogdon mokorasa kon kobiagan inta kon soroga tua, sinbá kobiagandon in mongawasa kon awak naton inta ilo-ilow naa.

⁵ Ki Allahbí in noposadia kon tua komintan, bo Siabí doman tua inta nobogoi in Roho-Nea kon i naton saḷaku jaminan.

⁶ Tuamai tantúbí moropot in gina nami. Kinotaauan bidon nami kon wakutu in nobiag kon dunia naa, kami noyayúbí kon baḷoi inta pinogutunan nami takin i Tuhan.

⁷ Sin kami in nobiag noidoyonbí kon pirisaya kon i Kristus, deemanbí noidoyon kon onu inta koontongan,

⁸ manangka intua kami in umuran mosabar. Bo moibo-ibogdon monaḷámai kon awak ilo-ilow naa, sinbá mogutundon moyotakin i Tuhan.

⁹ Tuamai kami in totok moramuji moposanang kon gina i Allah, kon wakutu in mobiagpa kon dunia naa ande kon baḷoi inta ain sinantú i Tuhan.

¹⁰ Sin notantúbí kon kita in diaanbí kon tayowon pongadilan i Kristus, bo pomuḷoi intau in motarimabí kon inta patus tarimaannea podudui in oaidannea kon wakutu in kon duniapa naa – oaid mopia andeka moraat.

Ki Kristus nobaḻí tonsigad in dodamean takin i Allah

¹¹ Kotaauanbí in nami mangaḻe in moondok kon i Tuhan. Manangka intua kami moramuji sinbá pirisayaan in bayongan intau. Totokbí in kinotaauan i Allah in kami naa. Tuamai in haraponku in kotaauan doman monimu in kami.

¹² Diábí bá dayowon monimu in kami. Kami in tongábí mobogoi in alasan mopia sinbá mopia in gina monimu kon i nami, bo bá motaau doman in moiko motubag kon singog in intau mita inta tongá momiḻí kon pogot, deemanbí oaidannea in indoian.

¹³ Sin aka kami bo ná diádon moratak, yo tua in lantaranbí kopontingan i Allah, táe aka kami bo moratak in koontongan, yo tua in lantaranbí moiko.

¹⁴ Tabibí i Kristus in nongawasa kon i nami, bo kinomangaḻean bidon nami kon aka tobatú intau inta ain minatoi sin motobut kon taḷá in bayongan intau, yo tua in mangaḻenea komintan intau ain bidon minatoi.

¹⁵ Bo ki Kristus in minatoi sin popisí in motobut kon taḷá in bayongan intau, sinbá intau mita inta nobiag diádon tongá asaḷ bo nobiag bo motayak kon kopontingannea tontaní, táe pounabí in kopontingan i Kristus inta ain minatoi bo biniagdon bui sin kopontingan monia.

¹⁶ Manangka intua, kami in diábí monilai kon intau podudui in raian intau. Aka koḻipod bo nokoimontandon in kami nonilai kon i Kristus podudui in raian intau, yo masa inta naa in diá bidon natua.

¹⁷ Intau inta notobatúdon i Kristus in totu-totuu bidon sinoimbagu. Inta ain nokoyongan in diá bidon, komintan bidon sinoimbagu.

¹⁸ Tua komintan in inaidanbí i Allah. Ki Kristus tua inta pinaké i Allah nobaḻí tonsigad nopoyodame takin-Nea. Onda intua Sia in nopotabá kon inami sinbá intau mita ibanea motaau doman in mamangoi moyodame takin i Allah.

¹⁹ Kami nopotaau kon ki Kristus in binaḻí bidon i Allah tonsigad sinbá intau in motaaudon mamangoi moyodame takin-Nea. Tua komintan inaidan i Allah sin diá bidon pinononggina-Nea mako in bayongan taḷá inta ain inaidan in intau kon i-Nia. Bo Siabí doman tua in nobogoi in oaidan kon inami mopoyaput in habar mita tatua.

²⁰ Dá kami naa in totabábí mita i Kristus inta pinaké doman i Allah mopoyaput in koyow-Nea kon i monimu. Tuamai podoyon nami kon tangoi Kristus, kami in mopoigum sinbá moiko in moibogdon motarima kon totabi i Allah inta mobogoi in kasampatan kon i monimu mopopiaan takin-Nea.

²¹ Sin Sia inta nodarit kon bayongan in oaid inta diá mopia, pinaké domandon i Allah mobaba kon bayongan in dosa naton, sinbá kita in buidon mobiag motompia takin i Allah sin notobatúdon i Kristus.