KORINTUS 2 13 - Alkitab Singog In Mongondow Masa In Tanaa

Tonggina pangabisan bo salam

¹ Naa in kointoḷuneadon in akuoi namangoi nokipodungkuḷ kon i monimu. Kon Buk Motusi ain pinais nanaa, “Pomuḷoi in pelekara musti sakusian in doyowa ande toḷu in intau, bain tua pelekara tatua motaau akúon kon totuu.”

² Intau mita inta tungkuḷ intua ain nogaid kon inta diá mopia bo bayongan intau ibanea, koḻipod in munadon inogoianku in tompoingat wakutu in namangoi nokipodungkuḷ induanea in akuoi kon i monimu. Bo tanaa mako, kon wakutu in noyogiyayúanpa in kita, akuoi in bui mobogoi in tompoingat, kon akuoi in mamangoidon bui kon i monimu, yo diábí in tobatúmai in kon sigad monia tua in diá hukumon.

³ Dá moiko in mokouḻíbí kon bukti inta totok in kinoibog monimu kon memang totuubí kon ki Kristusbí in mosingog pinongin inakó. Tongá aka Sia bo mopoaidon diábí tongá dumondouḷug, táe popoontong-Neabí in kawasa-Nea kon yua-yuak monimu.

⁴ Totuubí, kon wakutu in Sia pinopopakú kon kayu pinoyotaḻempang, noḻemé in Sia, táe tanaa in biniagdon bui i Allah in Sia takin kawasa-Nea. Kami in diábí doman moropot kon bonu in kobiagan nami inta notobatúdon i Kristus, táe aka kami moyogintayowdon monimu, yo kami in mobaḻí bidon moropot moyotakin i Kristus lantaran kawasa i Allah.

⁵ Tungkuḷaika uji in pirisaya monimu mongo totu-totuudon noidoyon kon pirisaya kon i Kristus! Taridiai kopia! Degá moiko in diápabí mopirisaya totok kon ki Kristus Yesus in oyúondon kon bonu in gina monimu! – sin aka diá natua yo moiko in diápabí monahang kon totungkuḷ.

⁶ Haraponku mako in bá kotaauandon monimu kon kami naa in deemanbí intau mita inta diá mokokotahang kon totungkuḷ.

⁷ Kami in umuran mopoigum mako doa sinbá moiko in diá mogaid kon inta moraat. Deemanbí mopoontong kon kami in monahangdon totok kon totungkuḷ, táe ibogon nami in bá moiko in umuran motaau in mogaid kon inta mopia – umpaka ontongon monimu in kami diá mokotahang kon totungkuḷ!

⁸ Kami in diábí mokopongonu kon soaḷ mita inta diá noyokaan in inta mobanar. Soaḷ inta motaau aidan nami in tongábí dumudui kon onu inta mobanar tua.

⁹ Mopiabí in gina nami aka moikodon in moropo-ropot nongkon inami. Tuamai kami umuran mopoigum in doa kon i Allah, sinbá moiko in mobaḻí mosompurna.

¹⁰ Tuabí doman in makusudku nomais kon surat tanaa kon wakutu in noyogiyayúanpa in kita. Sinbá aka akuoi bo mamangoidon kon yua-yuak monimu, yo diádon in akuoi mokoporogi in tumayow kon i monimu, podudui in kawasa inta inogoi i Tuhan kon inakó sin ponompia kon i monimu, deemanbí pomoguyaat.

¹¹ Naa in tongginaku pangabisan kon i monimu utatku mita, mokoposanangdon kon gina bo poramujidon sinbá umuran mobiag mosompurna. Umuran kon gina-gina mako in tongginaku mita naa. Umuran motobatú kon gina bo kon raian bo umuran mototabian. Sin ki Allah inta nobaḻí dodoyonan totabi bo kobiagan inta mopia, umuran kotaki-takin monimu.

¹² Posisalamandon in moiko, podoyon kon tabi saḷaku tumpaḷa umat i Allah. Bayongan umat i Allah nokipoyaput doman in salam monia kon i monimu.

¹³ Totabi bo barakat i Tuhan Yesus Kristus bo i Allah takin kawasa in Roho Mokudus umuran kotaki-takin monimu komintan! Horomat nami, Ki Paulus