KORINTUS 2 11 - Alkitab Singog In Mongondow Masa In Tanaa

Ki Paulus bo intau inta deeman totuu rasul

¹ Pomayápa mako akuoi in tumombodok topiḻik. Motaaubí degá?

² Akuoi in mokotanob kon i monimu, naonda bo kototanob i Allah kon i monimu. Moiko nion in naonda bo mongodeaga inta ain pinodandiku kon nikaan in tobatú ḷoḷaki, ḷoḷaki tatua in ki Kristus.

³ Táe moḻia-ḻiawpa in ginaku sin dika-dika bo moitabat in raian monimu bo diádon motoindudui kon i Kristus, naonda bo ki Hawa koḻipod inta kinoakaḷan in uḷag.

⁴ Sin tarukiraankumai moiko in tongábí kibio-biómai aka oyúon in intau mamangoi bo mopotaau in habar soaḷ ki Yesus, táe ki Yesusbí tolaeng, deemanbí ki Yesus inta ain pinotaau muna nami kon i monimu. Bo tarimaan doman monimu in roho bo “habar mopia” inta totu-totuubí kon diá notongkai in Roho i Allah bo Habar Mopia inta ain muna sinarima monimu nongkon i nami.

⁵ Táe podudui in raianku, akuoi naa in diábí tongá ná “rasul mita” inta mongotoyang tatua!

⁶ Degá diá basí motaau mosingog in akuoi, táe aka tongá pororai, yo akuoi in motaaubí doman. Bo tua in ain bidon nodait inontong monimu.

⁷ Degá diá noitaḷá in aidku tanaa, aka akuoi in mokopoompá sinbá poḷantudon in moiko. Sin kon tungkuḷ in nopoyaput in Habar Mopia inta nongkon i Allah kon i monimu, yo akuoi in diábí nokiuboḻi topiḻikpamai kon i monimu.

⁸ Sin kon dodai in akuoi nogaid kon sigad monimu, akuoi in inongkosbí in jamaat mita ibanea. Dá motaaubí singogonku kon totokbí in nokoporugimai kon jamaat mita sinbá akuoi in motaau motuḷung kon i monimu.

⁹ Bo aka kodaitan in akuoi, yo diábí mokoposusamai kon intau tobatúmai kon sigad monimu. Sin onu in mogaat kon inakó komintanbí ki utat mita inta namangoi nongkon Makedonia in mobogoi.

¹⁰ Ḷunganga in ginaku diábí modai-dait kon bayongan ḻipu in Akhaya, sin totundú mita inta mobanar in umuran moyotakinku mako.

¹¹ Eta nongonubí sin mosingogbí in akuoi kon natua? Degá diá motabi in akuoi kon i monimu? Kinotaauanbí i Allah in tabiku kon i monimu!

¹² Onu in pinomiaku tanaa, tantúkubí doman aidan, sinbá diá in dodoyonan in “rasul mita” tatua in dumodia bo moguman kon mosia in mogaid naonda bo kami.

¹³ Sin intau mita tatua in deemanbí totu-totuu rasul. Mosia tua in tongábí mogogaid inta moibo-ibog mongakaḷ kon intau bo mongaku saḷaku rasul mita i Kristus.

¹⁴ Diábí mokoherang in oaid monia tua, sin ibilispa in nongaku doman saḷaku malaekat in bayag!

¹⁵ Dá diádon motaau herangon aka dumodudui mita in Ibilis mongaku saḷaku mogogaid mita kon oaidan i Tuhan. Tongá mosia tua in motarimabí kon hukuman podudui in oaid monia tua.

Roriga i Paulus saḷaku rasul

¹⁶ Buikupa doman ponorop: Donaai in modapot oyúon in intau monganggap kon inakó bodok. Táe aka moiko bo monganggap kon i nakó natua, dá diábí doman nongonu sinbá motaaupa in akuoi dumodia topiḻik.

¹⁷ Moiduduimai naa, modaitku tangoion onu inta mokoḷunganga kon ginaku, táe deemanbí ki Tuhan in nomarenta nokipoguman in naa kon i nakó. Mangaḻenea totu-totuupabí akuoi in nosingog naonda bo intau bodok.

¹⁸ Totuubí kon mobayongbí in intau inta moduí kon onu inta kon dunia naa, tuamai in dumuí doman tontaní in akuoi.

¹⁹ Tantú mosanangbí in gina monimu in nosabar in sinumayow kon intau mita bodok. Sin inanggap monimu mopandoi in moiko!

²⁰ Tongá pomayá mako monimu aka oyúon in intau mononggata kon i monimu, andeka momakisa moigum bo mogamá kon kauntungan kon i monimu, ande inta monganggap kon mosia in moḷantu-ḷantud nongkon i monimu sahingga in mobarani monokap kon i monimu.

²¹ Takin porasaan mooyá musti akuonku, kon kami in diábí mokobaḻí in momia natua. Táe aka intau ibanea bo mokobaḻí in dumodia, yo akuoi in mobaranibí doman! (Akuoi in mosingog naonda bo intau bodok.)

²² Degá mopongata kon mosia tua intau in Ibrani? Kaka akuoi intaubí doman in Ibrani. Mopongata kon intau in Israel? Ka akuoi in intaubí doman in Israel. Mopongata kon buí i Abraham? Ka akuoi doman buí i Abraham!

²³ Degá mogogaid mita i Kristus in mosia? Kodongogan naonda bo diá moratak in akuoi táe totuubí kon akuoibí naa in mogogaid i Allah inta mopia-pia nongkon i monia tua. Akuoi in umuran morajing in mogaid, mokakit in akuoi bonuon monia kon ponjara, bo mokakit doman akuoi in rorigaan monia gogió bo matoi.

²⁴ Ain koḻima in akuoi iroriga in intau mita in Yahudi nodapot in sinambok kotoḷu nopuḷú bo siow.

²⁵ Kotoḷu in akuoi sinambok intau mita in Rum; nokoimontan domandon in akuoi inarab monia in batu. Kotoḷu doman akuoi in sinumaḷom kon kapaḷ kon dagat, bo komintandon doman akuoi dongkadon noitoḷoḷantak mako kon yuak in dagat tosinggai bo tonggobii.

²⁶ Kon bonu in bobayáanku mobayong totok kodungkuḷanku in soaḷ mita inta mokoondok: oyúon inta mokouma kon ḷunud, moyodungkuḷ in intau moraat, moyogintayow in romú intau in Yahudi bo intau deeman Yahudi, moyotayow in bahaya mita inta mobaḻí kon kotá bo kon ḷuai in kotá, inta bahaya mita kon dagat bo moyotayow in intau mita inta mongaku notobatú kon pirisaya kon i Yesus, bokaka bo diábí.

²⁷ Rumopot totok in akuoi in mogaid, dá mokakit in diádon mokoposiug, diádon mokopongaan, diádon mokoponginum, bo mokakit domandon in monahang tonow sin diádon koḷambu-ḷambung pakéon bo diá domandon in baḷoi pogutunan.

²⁸ Bo pomuḷoi in singgai moḻia-ḻiaw doman in ginaku kon kaadaan in bayongan jamaat.

²⁹ Aka oyúon in mokorasa kon moḻemé, yo akuoi in moitakinbí doman moḻemé. Aka oyúon in moiḷautdon mogaid kon inta diá mopia, yo moitakinbí doman in ginaku moyoyiga.

³⁰ Dá aka akuoi bo moduí kon onukadon, yo duíonku tua in kakurangankubí.

³¹ Táe ki Allah ki Amá i Yesus, Tuhan naton in nonotaaubí kon akuoi in diábí monguboḷ. Dinayo-dayowdon in tangoi-Nea nodapot in kopaḷutannea.

³² Wakutu in akuoi kon Damsyik ki gubernur inta nongawasa kon tua, inta kon bonu in pomarentaan i Datu Aretas, nokiḷukad kon tontara kon ngara in kotá tatua sin modomok kon inakó.

³³ Táe akuoi in pinoḷagui in intau pinongin bubú in dinding kotá tatua. Akuoi in pinopobonu monia kon karansi bo pinoḷuai. Tuamai diá kinodomokan i gubernur tatua in akuoi.