KORINTUS 2 1 - Alkitab Singog In Mongondow Masa In Tanaa

¹ Utatku mita jamaat i Allah inta kon Korintus bo bayongan intau inta ain piniḻí i Allah kon Akhaya. Akuoi, ki Paulus, rasul i Kristus Yesus, inta ain binaḻí i Allah rasul-Nea takin ki utat naton ki Timotius,

² mopoigum mako doa sinbá ki Allah ki Amá naton bo ki Tuhan Yesus Kristus in umuran mobogoi in barakat bo kobiagan motompia kon i monimu komintan.

Sukur i Paulus kon i Allah

³ Dinayo-dayowdon in ki Allah, inta ki Amá i Yesus Kristus, Tuhan naton. Sia tua in Amá inta totok in mopia in gina, bo inta tantú moginyopot kon gina in bayongan intau.

⁴ Sia in tantú moginyopot kon gina nami kon dodai in kami kinoantugan in yoyiga, sahingga in nokosanggup doman in kami noginyopot kon gina in bayongan intau inta kinoantugan in yoyiga.

⁵ Yoyiga inta kinorasaan i Kristus nobayong domandon in kinorasaan nami. Lantaran ki Kristus tua, dá gina nami nobaḻídon noropot.

⁶ Tuamai aka kami bo mokorasa kon yoyiga, yo tua in mangaḻenea moginyopotbí kon gina monimu, sinbá mosaḷamat in moiko. Aka gina nami bo moropot, yo moiko in moropotbí doman, dá mokotahang domandon in moiko wakutu in koantugan in bayongan yoyiga ná inta kinorasaan nami.

⁷ Kami in tantúbí moyakin bo diábí moḻia-ḻiaw in gina nami kon i monimu, sin kinotaauan bidon nami kon moiko nion in moibogbí moyoyiga takin nami. Manangka intua moiko in iyigonan doman takin nami.

⁸ Utat mita! Ibogon nami in bá kotaauan doman monimu naonda in yoyiga inta kinorasaan nami wakutu in kon Asia. Mobogat totok in yoyiga noiantug kon inami kon tua, sahingga in diá bidon pinononggina mako nami kon mobiagpa in kami;

⁹ Sin nádon onda bo pinopoḷabúan in hukuman matoi. Tongá tua in nobaḻí mita sinbá kami in diá mopongata in ropot nami tontaní, táe umandoḷbí kon i Allah inta nobogoi in kobiagan kon intau.

^10-11 Ki Allahbí tua in noposaḷamat kon inami nongkon yoyiga inta mokopatoi tua. Bo inta moposaḷamat kon inami kon singgai moiduduimai naa, sin tongábí Sia in binaḻí nami oandoḷan. Kami in moyakin bidon kon sambayang mita monimu kon inami indongoganbí i Allah, sahingga in posaḷamaton-Neabí in kami nongkon bayongan inta mokobodito kon i nami. Ki Allah in umuranbí nobogoi in barakat kon inami sin umuran monimu sinambayangan. Tuamai nobayongdon totok in intau mosukur kon i Allah.

Tomayá i Paulus Nobaḷui

¹² Noḷunganga totok in gina nami, sin noyakin bidon in kami kon kobobiag nami kon dunia naa – apapa doman hubungan nami bo i monimu – tantúbí nami sinompia takin gina motuḻid bo nobayag. Tua komintan in inaidan nami, deemanbí pinodoyon kon kapandoian raian in intau, táe pinodoyonbí kon ropot inta pinonotabi i Allah.

^13-14 Kami in tongábí nomais kon onu in motaau bacaan bo inta komangaḻean monimu. Tanaa mako in diápabí totok komangaḻean monimu, táe haraponku mako koonggotannea komangaḻeandon monimu totu-totuu in kami. Dá aka kon wakutu moiangoidon in ki Tuhan Yesus, yo ḷunganga in gina monimu kon inami diá bidon in poḻiuan, natua doman in kami.

¹⁵ Popisí in koyakinanku tatua, dá oyúon tomayáku mamangoi mokipodungkuḷ kon i monimu tungkuḷ intua, sinbá modugang moantó in barakat in mouḻí monimu.

¹⁶ Tomayáku tua in kon dodai akuoi mayá in Makedonia yo mongandupa muna in akuoi kon i monimu, ná doman tua in aka mobuidon. Sinbá motaaupa in akuoi mokituḷung kon i monimu, aka akuoi mayá in Yudea.

¹⁷ Táe tomayáku tatua in nobaḷui; degá soaḷ tanaa nobaḻí tanda kon diá motantú in raianku? Taau degá, kon dodai in akuoi nonomayá, tongábí pinodudui kon ibogku tontaní, sahingga in topí-topí, “Oo”. topí-topí doman “Diá”.

¹⁸ Totuu uḻe! Podoyon kon i Allah inta motaau pirisayaan, dandiku kon i monimu in deemanbí soaḷ “Oo” andeka “Diá”.

¹⁹ Sin ki Yesus Kristus, ki Adí i Allah inta ain pinohabarku bo pinohabar i Silas, bo i Timotius, kon i monimu, deemanbí intau inta topí-topí moguman “Oo” bo topí-topí doman moguman “Diá”. Sia tua in aka modandi yo totu-totuubí mobaḻí.

²⁰ Sin ki Allah nopototuu in dandi-Nea pinongin i Yesus. Tuabí in nobaḻí dodoyonan sahingga intau moguman “Amin” kon i Allah sin ki Yesus Kristus. Tua in inaidan nami sinbá dayowon in ki Allah.

²¹ Sin ki Allahbí in tantú nobogoi in ropot kon inami bo kon i monimu, sahingga in tantú notobatú i Kristus; bo Siabí doman tua inta nomiḻí kon i naton mobaḻí umat inta kinotabi-Nea.

²² Tuamai totu-totuu bidon binaḻí-Nea umat-Nea in kita poḷat inogoian-Nea in Roho, pinogonú kon gina naton saḷaku jaminan kon totu-totuubí ogoi-Nea onu inta ain pinodandi-Nea.

²³ Ki Allahbí tontaní in nobaḻí sakusiku – bo inta nonotaau kon ginaku – kon akuoi in diá nobaḻí namangoi in Korintus sin akuoi in doíbí mopoyoyigamai kon gina monimu.

²⁴ Akuoi in diábí momakisa kon i monimu kon soaḷ onu inta musti pirisayaan monimu, sin moiko in totokdon nopirisaya kon i Kristus. Akuoi in tongábí mogaid moyotakin monimu sinbá modugang pia in gina monimu.