KORINTUS 1 9 - Alkitab Singog In Mongondow Masa In Tanaa

Hak bo kowajiban mita in rasul

¹ Akuoi naa intaubí nobebas? Rasul i Tuhan? Inta ain nokoontong kon i Yesus, Tuhan naton? Bo inta nopoyaput in Habar Mopia kon i monimu dá nopirisayadon kon i Tuhan in moiko?

² Umpaka intau ibanea in diá mopirisaya kon akuoi in rasul, táe moiko in nopirisayabí. Sin buktinea moiko in nobaḻídon intau Keresten.

³ Aka diá pirisayaan monia kon rasul in akuoi, yo nanaa in potubagku:

⁴ Degá diá motaau in kami in mokaan ande monginum kon onu inta nouḻíku nongkon pinogaidan tanaa?

⁵ Eta degá diá motaau in akuoi in modia kon i buḷoiku inta mopirisaya kon i Kristus saḷaku takinku kon baya-bayáan mako, ná inta inaidan i utat mita i Tuhan Yesus bo in rasul mita ibanea ná tai Petrus?

⁶ Andeka degá tongá ki Barnabas bo akuoi in musti motayak kon kaanon tontaní?

⁷ Diábí in tontara in mayá moparang bo umongkos tontaní! Bo diábí doman in monononggobá inta nomuḷa kon anggur táe diá mosipú kon bungainea! Bo diábí doman in intau inta nomiag kon domba bo diá monginum kon susu nongkon domba inta piniaranea tatua!

⁸ Bo onu in pogumanku tanaa, deemanbí tongá ibo-ibog, sin singogku naa in ain bidon pinais kon buk i Musa.

⁹ Kon buk i Musa pinais nanaa, “Donaaibí pomponan monimu bibig in sapi inta koyogot in moritak kon gandum sin moripú kon batoḷnea.” Eta degá sapibí tatua in umuran tarukiraan mako i Allah?

¹⁰ Andeka tua pinopomakusudbí kon i naton? Oo totuubí intua kon pinais bá kobacaan naton. Sin intau inta nogaid kon gobá bo inta nondarit kon gandumnea in tumpaḷabí moibog motarima kon boḻi inaidannea tatua.

¹¹ Kami ain nopotaau kon i monimu in Habar Mopia nongkon i Tuhan. Tuamai kami in nokouḻí kon barakat moantó nongkon i monimu. Yo degá noiḻiudon antó in inigum nami kon i monimu?

¹² Ka intaupa ibanea in motaau moigum kon onukadon kon i monimu, yo apa doman in kami naa, táe doíbí in akuoi? Maníka bo tanggungonkudon tontaní in yagi-yagi dika in oyúon in mobaḻí ḷabot kon popoyaputanku in Habar Mopia soaḷ ki Kristus.

¹³ Kinotaauanbí monimu kon intau inta mogaid kon bonu in Baḷoi i Allah, motarimabí in mosia kon kaanon kon bonu in Baḷoi i Allah doman tatua. Bo intau inta monompiamai kon tampat pororataan kon kuruban sosumba, mokouḻíbí doman in sia kon silainea nongkon kuruban inta pinosumba tatua.

¹⁴ Ná doman tua ain bidon sinantú i Tuhan kon intau inta mopoyaput in Habar Mopia nongkon i Tuhan, in musti mokouḻí kon barakat nongkon oaidannea tatua.

¹⁵ Táe akuoi in doíbí. Bo akuoi in nomais kon surat tanaa deemanbí makusud sinbá pomiaan monimu natua in akuoi. Sin aka kon i nakó, yo maníkabí matoi in akuoi dika in kobuḻian in onu inta totok in kino sanang in ginaku.

¹⁶ Sin akuoi in mopoyaput in Habar Mopia, deemanbí tongá mokikoontong kon intau. Táe ki Allahbí in nopotabá kon i nakó. Tuamai baradosaanbí in akuoi aka diá popoyaputku in Habar Mopia tatua!

¹⁷ Aka kuma bo tongábí ibogku tontaní in mogaid kon oaidan tatua, yo tantú mogoḷatbí mako in akuoi kon boḻi in oaidanku tatua. Táe naa bo parentabí i Allah, dá mustibí aidanku.

¹⁸ Dá aka natua yo onu in mouḻíku? Naa in mouḻíku: akuoi in motaau mopoyaput in Habar Mopia bo diábí mokoyoyiga kon intau in mogongkos sin diábí in akuoi moigum kon rupa-rupa.

¹⁹ Akuoi naa in deemanbí totabá in tumpaḷa intau, táe noibogbí in akuoi nobaḻí ata kon i monimu komintan, sinbá moantó in intau in mopirisaya kon i Kristus.

²⁰ Aka kon tayowon intau mita in Yahudi, yo akuoi in ná bí doman onda bo intau in Yahudi, sinbá moidudui kon i nakó in mosia. Bo aka kon tayowon in intau mita inta nokadai kon hukum i Musa, akuoi in ná bí doman onda bo mosia, umpaka sabanarnea deemanbí natua. Tua komintan in inaidanku sinbá moidudui kon inakó in mosia bo mobaḻídon komintan dumodudui i Kristus.

²¹ Aka kon tayowon intau mita inta deeman Yahudi, akuoi in ná bí doman onda bo mosia, inta diá motoindudui kon hukum i Musa. Tua komintan inaidanku sinbá moidudui kon inakó in mosia bo mobaḻí komintan dumodudui i Kristus. Táe deemanbí makusudku moḷawang kon i Allah; sin parentabí mita i Kristus in nongawasa kon inakó.

²² Aka kon yuak in intau mita inta diápa noguyang in pirisaya, yo akuoi in ná bí doman onda bo mosia, sinbá moidudui kon inakó in mosia bo mobaḻí komintan dumodudui i Kristus. Simpodon mako kon singog, norupa-rupamaidon in akaḷ inaidanku kon yuak in bayongan intau sinbá oyúon in mopirisaya kon i Kristus bo posaḷamaton.

²³ Tongábí bá moiyaput in Habar Mopia nongkon i Allah kon bayongan intau, dá inaidanku intua komintan, sinbá moitakin doman mokouḻí kon barakat in akuoi.

²⁴ Kinotaauanbí monimu kon aka kon poyotandingan, yo bayongan mototanding in komintanbí moribatuk, táe tongábí tobatú in mokouḻí kon tombuinag. Tuamai in koḻikat totok in moribatuk sinbá moiko in mokouḻí kon tombuinag tatua.

²⁵ Pomuḷoi intau inta mobasadia tumakin kon poyotandingan, musti monahang kon yagi-yagi, sinbá mokouḻí kon tombuinag inta diá mononoi kon dunia naa, táe kita in monahang kon yagi-yagi sinbá mokouḻí kon tombuinag inta mononoi.

²⁶ Tuamai moribatuk in akuoi, táe oyúonbí in tujuanku motantú. Naonda bo kon poyotandingan in tinju, diábí in akuoi tongá kinokoyu-koyungkumnea.

²⁷ Táe ain bidon muna ilatihku in awakku bo nodaitku bidon kinawasa. Sinbá aka akuoi in modia kon intau tumakin kon poyotandingan tatua, yo akuoi in tantúbí doman tarimaan.