KORINTUS 1 13 - Alkitab Singog In Mongondow Masa In Tanaa

Tabi

¹ Umpakabí akuoi in nonotaau kon bayongan bahasa, nodapot kon bahasa in malaekat, táe aka diá in tabiku kon tumpaḷa intau, yo singogku mita tatua in tongábí naonda bo dorom inta diá kobonu andeka lonceng inta moḷangon in singognea, táe diá in mangaḻenea.

² Bo umpakabí in akuoi in mopandoi mopoyaput in Habar Mopia nongkon i Allah bo motaau doman totok in soaḷ mita inta nongoibuni, ande nonotaau kon bayongan yagi-yagi bo mopirisaya doman totok kon i Allah, sahingga in motaau mopopamping in buḷud, táe aka diá in tabiku kon tumpaḷa intau, yo diábí in mangaḻe in kobiaganku!

³ Bo umpaka daitonku ogoi kon intau nobogá in kapunyaanku, modapot posarakanku doman in awakku sin tubáan, táe aka diá in tabiku kon tumpaḷa intau, yo tua komintan beresibí diá in baragunanea.

⁴ Intau inta motabi kon tumpaḷa intau, monahangbí kon yagi-yagi bo mopia in gina. Diá in porasaan mointoi, diá kumaḷakuang bo diá doman mododia.

⁵ Sia in diábí mogaid kon inta diá mopia bo diábí doman motayak kon kauntungan tontaní. Sia in diábí morogi bo diábí doman moibog motagú kon gina kon intau.

⁶ Diábí mopia in ginanea aka intau mogaid kon inta moraat, sin koibognea in tongábí inta mopia.

⁷ Monahangbí in sia in tumayow kon bayongan rupa-rupa bo mopirisaya kon bayongan inta mopia; sia in tantú oyúon in harapan bo monahang doman in mogoḷat bo motanggung kon bayongan rupa-rupa inta mobaḻí.

⁸ Diábí in wakutu kon diá mositabian. Sin masa in tanaa oyúon in intau mopandoi mopoyaput in habar nongkon i Allah, táe koonggotannea mogogai in sia. Masa in tanaa oyúon doman intau mopandoi in mosingog kon bonu in bahasa inta mokoherang, táe koonggotannea mogogai domandon in sia. Masa in tanaa nobarong doman intau in nonotaau kon bayongan yagi-yagi, táe koonggotannea yo koḻionganneabí intua komintan.

⁹ Sin pongotahuan bo komampuan naton mopoyaput in habar nongkon i Allah in diápabí totok nosompurna.

¹⁰ Oyúonbí in wakutu i Allah moposompurna kon tua komintan, bo inta diá nosompurna tua in modait bidon moinggamá.

¹¹ Kon tungkuḷ in mongoadípa in akuoi, pososingogku in ná doman onda bo mongoadí. Natua doman in porasaan bo raianku, ná bí doman onda bo mongoadí. Táe tanaa in nogurangdon in akuoi, dá oaidku inta mongoadípa, nodait bidon sinaḷáanku.

¹² Sin onu in inontong naton tanaa, ná bí onda bo oḻinow kon posilag inta diá totok motarang. Táe kon singgai moiduduimai ontongonbí naton motarang. Tanaa akuoi in diápa nonotaau kon rupa-rupa, táe kon singgai moiduduimai kotaauankubí, ná ki Allah nonotaau kon bayongan in yagi-yagi kon inakó.

¹³ Dá toḷu tanaa in musti tantú aidan monimu: mopirisaya, umuran moharap bo tantú mositabian. Bo nongkon toḷu nopasaḷ tanaa totabianbí kon tumpaḷa intau in totok moponting.