KOLOSE 4 - Alkitab Singog In Mongondow Masa In Tanaa

¹ Utat mita inta nobaḻí tuang! Kopiabí in mopoaid kon i atamu mita, dikabí tombogaan. Pokotoropdon, oyúonbí in Tuangmu kon soroga.

Tonggina mita

² Umuran mokoporajing in mosambayang bo umuran pobasadia, dika mokoḻiong in mosukur kon i Allah.

³ Sambayangai doman in kami sinbá ogoian i Allah in kasampatan mopia kon mopotaa-taau mako in habar soaḷ inta noibuni kon i Kristus. Inta lantaran soaḷ tatuata dá tanaa mako akuoi binonu kon ponjara.

⁴ Sambayangai in akuoi sinbá motaau in akuoi moginsilang kosila-silangon kon onu inta noibuni tua.

⁵ Mokopobijaksanadon in mobiag moyotakin intau mita inta diá mopirisaya, bo pakédon kopira pomuḷoi oyúon in kasampatan.

⁶ Ramujidon sinbá onu in singogonmu tantú mokosanang bo koibog in intau. Bo musti kotaauan monimu naonda in pototubag kon onu in ḻibo-ḻibóon mita in intau.

Simpod in surat bo salam

⁷ Ki Tikhikus, ki utat naton inta kinotabiku, mopotaau kon i monimu in bayongan yagi-yagi soaḷ akuoi. Sia in mosatia totok in mogaid kon oaidan i Tuhan moyotakin nami.

⁸ Sia in pinotabáku mamangoi kon i monimu sinbá kotaauandon monimu in kaadaan nami bo moonowdon in gina monimu.

⁹ Ki Onesimus in moyotakin mangoi i Tikhikus; sia tua in intau inta tumpaḷa mopirisaya ná kita, intau inta nongkon sigad monimu. Sia tua intau doman inta mosatia bo kinotabi doman nami. Taya dua i Tikhikus in mopotaau kon i monimu kon bayongan yagi-yagi inta ain nobaḻí kon tampatku naa.

¹⁰ Ki Aristarkhus inta noyotakinku kon bonu in ponjara nokipoyaput in salam kon i monimu. Ná doman tua in ki Markus inta pokuadíon i Barnabas. Soaḷ ki Markus naa, aindon pinongoyow kon i monimu kon tarimadon in sia aka mamangoi kon i monimu.

¹¹ Salam doman i Yesus inta dinonoi ki Yustus. Kon sigad in intau mita in Yahudi inta ain nopirisaya kon i Tuhan Yesus, yo taya toḷu naa in nobaḻídon yobayat topogaidanku inta mopoyaput in oaidan nongkon i Allah. Mokotuḷung totok in mosia kon inakó.

¹² Salam doman nongkon i Epapras. Sia naa intau doman nongkon sigad monimu. Mosia naa in mogogaid doman kon oaidan i Kristus inta umuran mosatia in mosambayang sin kopontingan monimu. Sia totok in mopoigum kon i Allah sinbá mobaḻídon moropot in koyakinan monimu, bo totu-totuudon moguyang in moiko sinbá totu-totuu domandon dumudui kon ibog i Allah.

¹³ Inontongkudon tontaní kon totokdon noramuji nogaid in sia sin kopontingan monimu bo kopontingan in intau mita inta kon Laodikia bo kon Hierapolis.

¹⁴ Ki dokter Lukas inta kinotabi naton, bo ki Demas nokipoyaput doman in salam kon i monimu.

¹⁵ Poyaputpa in salam nami kon i utat mita naton Keresten inta kon Laodikia; bo kon i Nimpa doman, bo kon jamaat inta mosambayangmai kon baḷoinea.

¹⁶ Naonda in surat tanaa bacaan kon i monimu, yo ramuji doman bá surat tanaa bacaan doman kon jamaat inta kon Laodikia, ná doman tua, moiko tontaní musti doman mobaca kon surat inta kinirim kon jamaat in Laodikia.

¹⁷ Bo potaaudon kon i Arkhipus in naa, “Iḷapataidon kopiraan in oaidan inta pinoki aid i Tuhan kon inimu sin mobantung kon i Tuhan.”

¹⁸ Salam nongkon inakó, ki Paulus. Akuoibí tontaní in nomais kon salam tanaa. Dika koḻiongan kon akuoi in kon bonupa in ponjara! Igumon mako umuran barakatan i Tuhan in moiko. Horomat nami, Ki Paulus