KOLOSE 3 - Alkitab Singog In Mongondow Masa In Tanaa

¹ Moiko ain bidon biniag bui noyotakin i Kristus. Tuamai poramujidon in moiko mokouḻí kon soaḷ mita inta kon soroga, kon tampat kon onda in ki Kristus nomarenta noyotakin i Allah.

² Raidon in soaḷ mita inta kon soroga, donaai morai kon soaḷ mita inta kon dunia.

³ Sin moiko ain minatoi bo kobiaganmu noibuni noyotakin i Kristus inta notobatú i Allah.

⁴ Aka ki Kristus inta nobaḻí pangkoi in kobiagan naton, koontongandon bui yo moiko doman in koontongan moyotakin-Nea kon bonu in kamuliaan-Nea!

Intau Mobagu

⁵ Tuamai Inggamáaidon in ibog mita in dunia inta umuran monuyayow kon i monimu, ná oaid inta mokotor, oaid mita inta diá patus aidan, ibog in awak, ibog mita inta moraat, bo ibog mita inta moiḻiu (sin ibog inta moiḻiu tua in notongkaibí in mosumba kon berhala).

⁶ Soaḷ mita natua inta mokopomuká kon yaat in gina i Allah kon intau mita inta diá motoindudui kon i-Nia.

⁷ Koḻipod moiko in dinumudui doman kon ibog natua mita, wakutu in kinawasaannea in moiko.

⁸ Táe tanaa, ḷumbúdon monimu in soaḷ mita inta moraat nongkon inimu: dika tumorú ande momarontak, ande moyaat in gina kon intau ibanea, ande monibá, bo mosingog kon tosingogon inta moromú.

⁹ Dikadon mosiuboḷan sin ain sinaḷáan monimu in kobobiag koḻipod bo tabiatnea.

¹⁰ Bo tanaa moiko inogoiandon in kobiagan inta mobagu. Moiko nion in nobaḻí bidon intau nobagu, inta koyogot toimbaguon i Allah inta nopomia kon i monimu podudui in batangan-Nea tontaní. Makusudnea bá totu-totuudon kotaauan monimu in ki Allah.

¹¹ Sahingga in diádon yoposi in intau Yahudi bo deeman Yahudi, intau sinunat bo inta diá sinunat. Bo diá domandon yoposi in intau mokokiangoi bo intau moromú, intau inta nobaḻí ata bo intau inta deeman ata, sin ki Kristus tua in Tuhanbí in bayongan yagi-yagi, bo Sia ain notobatú intua komintan!

¹² Utat mita, moiko nion in umatbí i Allah inta ain sinotabi bo piniḻí-Nea mobaḻí kapunyaan-Nea tontaní. Tuamai in musti popoontong doman monimu in totabian, pia in gina, diá motosiḷantud, pososingog moaḷus bo mobahasa kon tumpaḷa intau bo mosabar aka koantugan in roriga.

¹³ Mokoposabar kon tumpaḷa intau, mosiampungan aka oyúon intau in motagú kon yaat in ginanea kon intau ibanea. Nosanangbí in gina i Tuhan nongampung kon i monimu, tuamai in musti doman mosiampungan in moiko.

¹⁴ Naa in soaḷ mita inta totok in moponting: Moiko in musti mototabian sin totabianbí tua in mopotobatú kon i utat komintan sahingga in mobaḻí mosompurna.

¹⁵ Pakédon in dodamean inta inogoi i Kristus, sinbá kawasaan-Neadon in ginamu, sin tuabí in mangaḻe pinogoinían kon i monimu motobatú kon awak, bo umuranbí posukur kon i Allah.

¹⁶ Umuran kon gina-gina mako in totundú mita i Kristus inta mobarakat tua, sahingga moiko in mobijaksana bo mopandoi in motundú bo mononggina kon utat mita. Dika mokoḻiong in mopodondong in Mazmur bo dondong mita rohani; podondongdon kon i Allah takin porasaan mosukur kon bonu in ginamu.

¹⁷ Bayongan inta aidan andeka singogon monimu, yo aidai ande singog komintan podoyon kon tangoi i Tuhan Yesus. Poyaputdon in sukurmu kon i Allah ki Amá naton sin bayongan inta pinomia i Yesus kon inimu.

Tondoḷ in motoḷuadí

¹⁸ Utat mita, buḷoi bobay! Horomatbí in ki buḷoimu, sin mustibí natua in aidanmu saḷaku intau in Keresten.

¹⁹ Bo moiko utat mita buḷoi ḷoḷaki, kotabibí in ki buḷoimu, dikabí rumomú kon inia.

²⁰ Adí mita! Nobaḻíbí kowajiban monimu saḷaku intau Keresten in tantú mokopotoindudui kon guyangamu, sin tuabí in kinoibog i Allah.

²¹ Utat mita, guyanga ḷoḷaki! Dika ponapusuon in gina i adímu mita, sinbá diá moinggamá in harapan monia.

²² Utat mita inta nobaḻí ata! Kon bayongan in rupa-rupa duduiaibí onu in pokiaid i tuangmu kon dunia naa. Deemanbí dumudui aka koontonganpa mako monia sinbá dayowon in moiko. Táe duduiaibí in mosia takin gina motuḻid lantaran horomatmu kon i Tuhan.

²³ Onukabí in pokiaid kon i monimu, aidaibí totu-totuu takin sanang gina, naonda bo mobantung kon i Tuhan, deemanbí tongá kon intau.

²⁴ Sinbá kotaauan monimu, tarimaanbí monimu in tontuḻínea nongkon i Tuhan. Onu in sinadia i Tuhan kon umat-Nea, tuabí in ogoi kon inimu. Sin tuang sabanarnea inta yogot bantungan monimu tua in ki Kristusbí tontaní.

²⁵ Bo ki inekabí in mogaid kon noitaḷá yo siabí in motanggung kon taḷánea mita tatua; sin diábí piḻían i Tuhan in intau.