KOLOSE 2 - Alkitab Singog In Mongondow Masa In Tanaa

¹ Ibogonku in bá kotaauan doman monimu in rorigaku wakutu in noramuji nogaid sin kopontingan monimu bo kopontingan monia inta kon Laodikia bo kon i monia komintan inta diápa nonotaau kon inakó.

² Naa komintan inaidanku sinbá moropotdon in gina monia bo mositabian poḷat mobiag motobatú, sahingga in mosia totu-totuudon momangarti bo moyakin poḷat monotaau kon onu inta binuni i Allah, tuata in ki Kristus tontaní.

³ Ki Kristusbí tua in mobuká kon bayongan pandoi bo pongotahuan i Allah inta koḻipod noibunipa.

⁴ Naa in pogumanku kon i monimu, sinbá diá in moiko uboḷan in intau mita inta tongá mopia kon bibig.

⁵ Sin umpakabí kita nogiyayúan, táe anggapdon in akuoi nionbí kon yua-yuak monimu. Bo mopiabí totok in ginaku in mokoontong kon i monimu motobatú kon gina bo umuran moropot in pirisaya monimu kon i Kristus.

Mobiag totu-totuu motobatú i Kristus

⁶ Tai utat mita ain notarima kon i Kristus Yesus saḷaku Tuhan. Manangka intua kobiagdon in moiko motobatú takin-Nea,

⁷ bo monguakat kon bonu i Kristus Yesus. Moiko in musti moposindogdon in kobiaganmu bo ki Kristus in dodoyonanmu. Mustidon modugang in pirisaya monimu kon i Kristus, podudui in onu inta ain sinundú kon i monimu. Bo ginamu in umurandon moibo-ibog mopoyaput in sukur moantó.

⁸ Mustibí mokopoingat in moiko, dikabí modapot in oyúon in mokodondouḷug kon i monimu takin raian mita inta tongá pinodoyon kon pandoi in intau inta diá in baragunanea, táe tongá mokopoyaying kon pirisaya. Raian mita tatua in deemanbí nongkon i Kristus, táe tongábí nongkon raian in intau bo nongkon roho mita inta nongawasa kon dunia.

⁹ Sin bayongan in onu inta oyúon kon i Allah in tuadon komintan kon i Kristus, inta kon bonu in kaadaan-Nea saḷaku intau.

¹⁰ Bo lantaran nobiag notobatú i Kristus, dá moiko in inogoiandon in kobiagan. Sin ki Kristus in tongguḷu in bayongan roho inta nongawasa bo inta nomarenta.

¹¹ Lantaran notobatú takin i Kristus, dá moiko ain sinunat, táe deemanbí sunat inta inaidan in intau, táe sunatbí inta inaidan i Kristus, inta nopobebas kon i monimu nongkon kawasa in tabiat inta binaradosa.

¹² Sin kon wakutu in moiko binaptis, moiko in iḷobongdon noyotakin i Kristus; bo takin doman baptisan tatua, moiko in noitakin doman biagon bui moyotakin i Kristus popisí in moiko mopirisaya kon kawasa i Allah inta ain nomiag kon i Kristus nongkon kinopatoian.

¹³ Koḻipod, moiko ain minatoi secara rohani popisí in moiko binaradosa, bo popisí in moiko diá sinunat inta inaidan in intau. Táe tanaa ki Allah ain nomiag kon i monimu noyotakin i Kristus. Ki Allah ain nongampung kon bayongan dosa naton,

¹⁴ bo pinopatan-Neadon in surat boboḻian kon i naton, inta mongancam kon i naton takin sarat mita inta mongobogat. Takin nopopakúdon in surat boboḻian tatua kon kayu pinoyotaḻempang, ki Allah in nomopat kon bayongan inta pinonapud kon i naton.

¹⁵ Kon kayu pinoyotaḻempang tatuata pinomia i Kristus in bayongan roho inta nomarenta bo inta nongawasa diádon nokopongonu bui. Mosia in pinomiadon tontonan in bayongan intau kon wakutu in diaan i Kristus in mosia saḷaku intau inta sinokodakop kon pinoramean in kinountungan-Nea.

¹⁶ Manangka intua donaaidon pomayá mako in intau mopotaḷá kon i monimu kon soaḷ kaanon ande inumon, ande soaḷ mita singgai moḷoben in agama, andeka porayaan mita in buḷan mobagu, ande soaḷ singgai in Sabat.

¹⁷ Tua komintan in tongábí oḻinow nongkon soaḷ mita inta moiduduimai, táe inta moniata nongkon soaḷ mita tatua in ki Kristusbí!

¹⁸ Donaaibí pomayá mako monimu in porugionmai in intau mita inta ki ubo-uboḷmai inumompá kon dodia bo inta mosumba kon malaekat mita. Intau tatua in moḷoḷatú takin raiannea mita inta modunia bo dumodia kon inta oontongon mita monia,

¹⁹ sahingga in diádon kumadai kon i Kristus inta nobaḻí tongguḷu. Kon bonu in pimpinan i Kristus, bayongan in awak iḷukadan bo sinobatú in sendinea mita, poḷat nobiag podudui in ibog i Allah.

Matoi bo mobiag moyotakin i Kristus

²⁰ Moiko ain minatoi noyotakin i Kristus, bo ain pinobebas nongkon roho mita inta nongawasa kon dunia naa. Dá nongonu sin moiko in nobiagbí ná intau inta kinawasaanpa in dunia naa? Nongonu sin moiko in dumuduipabí kon atorang mita ná tanaa:

²¹ “Donaai mokadai kon naa”. “Donaai mokaan kon tua”. “Donaai moḻiai kon naa?”

²² Bayongan atorang tatua in soaḷbí mita inta naonda in pakéon yo diádon in baragunanea. Tua in tongábí atorang bo totundú mita inta pinomia in intau.

²³ Memang koontongan soaḷ tatua naonda bo mobijaksana, takin tongganutnea sinbá intau mosumba kon malaekat, mokopoompá kon dodia bo moposikisa in awak; táe bayongan intua diábí in baragunanea monompiamai kon ibog in intau.