KINOBAḺIAN 8 - Alkitab Singog In Mongondow Masa In Tanaa

Pinomiotan in ḷunud

¹ Ki Allah in diábí nokoḻiong kon i Nuh bo bayongan in mahaḷuk inta noyotakinnea kon bonu in uangga moḷoben tatua. Binaḻí i Allah in tompot nogirup, dá tubig tatua in momangkoidon momiot.

² Komintan bokaká kon ḻimonag in tubig bo bayongan ḷoḻingkop in tubig kon ḷangit iḻingkopan-Nea. Uyan in notontádon,

³ bo tubig kogiot-kogiot domandon. Naonda in mogatut boḻima nopuḷú nosinggai tubig in diádon totok noḷantud.

⁴ Kon tanggal mopuḷú bopitu buḷan nogimpitu, uangga moḷoben tatua in noikondad kon tudu in buḷud tobatú inta tangoinea buḷud in Ararat.

⁵ Tubig in umurandon kogiot-kogiot bo kon tanggal imitanea buḷan nogimpuḷú, tudu mita in buḷud momangkoidon koontongan.

⁶ Naonda in opatdon nopuḷú nosinggai, ki Nuh in nomukat kon tobatú jandela in uangga moḷoben tatua,

⁷ bo nomuḻi kon ḷagapan kawag. Ḷagapan tatua diá bidon nobui mangoi kon uangga tatua, sia in tantú bidon iḷumayug magí mako nodapot in tubig tatua nogiotdon totu-totuu.

⁸ Kon dodai intua, ki Nuh bui nomuḻi kon ḷagapan paḷoma tobatú sin monotaau mongo tubig tatua in totu-totuudon nogiot.

⁹ Táe pinopisí in tubig umuranpa doman nonagom mako kon tudu in butá, dá ḷagapan tatua in diá nokouḻí kon pinonguyomanea. Dá nobuidon in sia kon uangga; Ki Nuh nopoḷuai in ḻimanea sinbá dompáan in ḷagapan tatua bo ḷagapan tatua in buineadon dinia pinotuot kon bonu in uangga.

¹⁰ Ki Nuh in nogoḷatpa bui pitu nosinggai nongkon tua, bodongka bui nomuḻi kon ḷagapan paḷoma tatua.

¹¹ Kon dodai in ḷoḷabungnea ḷagapan tatua nobui mangoi kon i Nuh takin kodia-dia in daun zaitun topatá inta koḷuno-ḷunowpa, daun tatua pinangkoknea bo dinia. Tanaa kinotaauandon i Nuh kon tubig aindon nogiot totok.

¹² Naonda in nogoḷatpa pitu nosinggai bui nongkon tua, bui in sia nomuḻi kon ḷagapan paḷoma tatua; bo kon tua ḷagapan tatua diádon nobui mangoi kon inia.

¹³ Kon dodai in ki Nuh umurdon onom nogatut bo tobatú notaong, kon tanggal tobatú buḷan tobatú doman, tubig totu-totuudon nogiot. Ki Nuh in nomukat kon atop in uangga tatua, bo nobobui magí-mako kon ḻibunea. Inontongnea tudu in butá noingkagdon.

¹⁴ Kon tanggal doyowa nopuḷú bopitu buḷan nogindua, butá in totu-totuudon noingkag.

¹⁵ Bo ki Allah in nogumandon kon i Nuh,

¹⁶ “Ḷuaidon nongkon uangga tanaa moyotakin i buḷoimu, i adímu mita takin ki buḷoi monia mita.

¹⁷ Diadon ḷumuai in bayongan ḷagapan bo mahaḷuk mita ibanea, moḷoben ande mointok, sinbá mosia in modugangdon mobarong kon dunia naa.”

¹⁸ Bo iḷumuaidon ki Nuh nongkon uangga tatua noyotakin i buḷoinea, i adínea mita takin i buḷoi monia.

¹⁹ Bayongan in ḷagapan bo mahaḷuk in toba iḻumuai nongkon uangga tatua, mosia iḻumuai podudui in rupanea tontaní.

Ki Nuh noposumba in kuruban

²⁰ Ki Nuh noposindog in mezbah tobatú kon i Tuhan. Sia in nogamá kon tumongo batu nongkon sigad in ḷagapan bo mahaḷuk mita ibanea inta halal, bodongka pinosumbanea saḷaku kuruban inta sinubá kon tudu in mezbah tatua.

²¹ Bó mobondu in kuruban sosumba tatua nokosanang kon gina i Tuhan, bo Sia in nosingog kon bonu in gina, “Akuoi in diá bidon bui mongutuk kon dunia naa popisí in oaid intau; kinotaauan-Ku, kon nongkon sia noguodpamai, raian intau tua in moraatbí. Diá bidon mokoimontanmai in Akuoi moyopú kon bayongan mahaḷuk inta nobiag ná inta bagu-Ku inaidan tanaa.

²² Kon tungkuḷ in dunia naa oyúon, umuranbí oyúon in sempo monompinomuḷa bo monoḻisí kon bungai in pinomuḷa, oyúon in sempo in tumping bo sempo in patú, sempo in poninggai bo sempo in uagat, singgai bo doḷom.”