KINOBAḺIAN 6 - Alkitab Singog In Mongondow Masa In Tanaa

Oaid moraat in intau

¹ Naonda intau nodugangdon nobarong kon dunia naa, bo adí mita bobay noilahir domandon,

² mahaḷuk mita i allah in nokoontong kon adí mita bobay tatua mongoḷunat. Bo mulai tonibuḷoion monia in mongodeaga mita inta koibog monia.

³ Dá ki Tuhan in noguman, “Diábí ogoi-Ku in intau mobiag mononoi; mosia tua in mahaḷukbí ilo-ilow, inta musti matoi. Nongkon tanaa mako umur monia in diá bidon moiḻiu kon mogatut bodoyowá nopuḷú notaong.”

⁴ Kon zaman intua, bo kon noiduduimai kon tua, oyúon in intau mita inta mongo itoi bo mongoḷoben kon dunia naa. Mosia tua in buí in bobay mita inta notonibuḷoi takin i adí mita i allah. Intau mita inta moitoi bo moḷoben tua in mongoroton bo ponango-nangoian kon tungkuḷ intua.

⁵ Inontong i Tuhan kon totokdon moraat in intau mita kon dunia naa; bayongan in raian monia umurandon moraat.

⁶ Nomanasaḷdon in Sia nomia kon i monia bo nonampat kon i monia kon dunia naa. Totok nomanasaḷ in Sia,

⁷ dapot in Sia noguman, “Yopúon-Kudon in intau inta ain pinomia-Ku tua, bo takin doman bayongan in ḷagapan bo mahaḷuk mita ibanea, sin Akuoi in nomanasaḷdon ain nopomia kon i monia.”

⁸ Táe kobobiag i Nuh in nokosanang kon gina i Tuhan.

Ki Nuh

^9-10 Naadon in ouman soaḷ ki Nuh. Sia in kogadí kon ḷoḷaki taya toḷu, tangoi monia ki Sem, ki Yapet bo ki Ham. Ki Nuh in diá nogaid kon onu inta noitaḷá, bo tongádon sia in intau mopia kon tungkuḷ intua. Sia in nobiag modagin kon i Allah.

¹¹ Táe bayongan intau ibanea komintandon moraat inontong i Allah, bo kobobiag inta moromú nobaḻídon kon bayongan in tampat.

¹² Ki Allah in noindoi kon dunia naa bo tongádon nokoontong kon onu inta moraat, sin bayongan intau moraatdon in kobobiag monia.

¹³ Bo ki Allah in noguman kon i Nuh, “Sinimpod-Kudon in singog kon daiton-Kudon paḷuton kobiagan in bayongan mahaḷuk. Yopúon-Kudon in mosia takin butá naa, sin butá naa nopuḻingdon in oaid monia inta moromú.

¹⁴ Pogaidon iko kon uangga moḷoben tobatú kon inimu, aidai nongkon kayu inta morigon bo mopira; bo bonu in uangga tatua aidai ḷonga-ḷongaton, bo aipai in aspal dotá in bonunea bo dotá in ḷuainea.

¹⁵ Uangga tatua kobanatnea musti mogatut bo toḷu nopuḷú bo toḷu nometer, bo oḷadnea in doyowa nopuḷú bodoyowá nometer bo ḷantudnea in mopuḷú botoḷú nometer.

¹⁶ Atopai in uangga tatua, bo tonsigadnea togogopat nopuḷú bo opat nosenti pomuḷoi in atop bo dindingnea mita. Uangga tatua pomia toḷu noḷandak, bo aidai doman in tobatú ḷoḻingkop kon sínea.

¹⁷ Poangoi-Ku in ḷunud moḷoben sin poyopú kon bayongan in mahaḷuk inta nobiag kon dunia naa. Bayongan yagi-yagi kon dunia naa modaitbí matoi,

¹⁸ táe Akuoi in mogaid kon dodandian takinmu. Tuotdon kon bonu in kapaḷ tatua takin ki buḷoimu, ki adímu mita takin ki buḷoi monia mita.

^19-20 Dia doman kon bonu in uangga tatua in ḷagapan bo bayongan mahaḷuk ibanea tumongo par koḷakian bo kobaayan, sinbá mosia diá doman moitakin moyopú.

²¹ Podia doman kon bayongan kokaanon monimu bo kaanon in bayongan mahaḷuk tatua.”

²² Ki Nuh in dinumudui poḷat nogaid kon bayongan inta pinoki aid i Allah kon inia.