KINOBAḺIAN 50 - Alkitab Singog In Mongondow Masa In Tanaa

¹ Ki Yusup inumuḻid bo nonggakap kon i amánea poḷat nongombaḷ bo nongayok kon pogot i amánea.

² Ki Yusup in nomarenta kon intau mita inta mononompia kon mayat sinbá pakéandon in bahan mita inta ponahang kon mayat bá diá mobondot in mayat i Yakub.

³ Oaidan tatua modait motoḻisí kon bonu opat nopuḷú nosinggai, tuata in wakutu inta biasamai pakéon monompia kon mayat. Intau in Mesir nongombaḷ kon i Yakub, pitu nopuḷú nosinggai in koonggotnea.

⁴ Naonda in nopaḷut in wakutu pinonogumatoian, nogumandon in ki Yusup kon pogawai mita i datu, “Poyaputdon in koyow tanaa kon i datu,

⁵ ‘Tungkuḷ in ki amáku motoyongdon matoi, pinoigumneadon kon inakó sinbá akuoi in modandi kon inia, kon akuoi in mustibí moḷobong kon inia kon bonu in poḷoḷobongan inta ain sinadianea kon butá in Kanaan. Tuamai, ogoiaipa akuoi in wakutu mayá moḷobong kon i amáku. Mopaḷut mako kon tua akuoi in buibí mamangoi.’ ”

⁶ Bo ki datu in nogumandon, “Bayádon poḷobong kon i amámu ná inta ain pinodandimu kon inia.”

⁷ Bo minayádon in ki Yusup sin moḷobong kon i amánea. Komintan pogawai i datu, guhanga mita kon komaḻig bo bayongan intau moḷoben kon Mesir, minayá noyotakin i Yusup.

⁸ Buḷoi, adí, utat mita i Yusup bo ginaḷum motoḷuadí inta ibanea minayá doman. Tongádon adí mita mointok bo bobiagon monia in sinaḷáan kon butá in Gosyen.

⁹ Rombongan inta sinumakoi kon kereta bo inta sinumakoi kon kabaḷo sinumakin doman, dapot in pipidan intau mita inta sinumakin totok in moḷanggó.

¹⁰ Naonda in mosia nodapot kon tampat pobobantingan in intau kon gandum kon Goren-Haatad, kon dotá in pomukaan kon Ongkag in Yordan, mosia in nongombaḷ takin kuyang in gina bo takin doman ombaḷ moropot. Ki Yusup nomia kon pinonusaan, pitu nosinggai in koongotnea.

¹¹ Naonda intau mita in Kanaan nokoontong kon kinopatoian kon Goren-Haatad tatua, mosia in noguman, “Totokdon in mokokuyang kon gina in kinopatoian intau in Mesir tatua!” Tuamai tampat tatua sinangoian Abel-Mizraim.

¹² Natuadon ki adí mita i Yakub nomia kon onu in tongkoyow i Yakub kon i monia.

¹³ Mosia in nodia kon mayatnea pinobayá in Kanaan bo iḷobong kon bonu in angob in Makhpela, kon dotá in pomukaan kon Mamre, kon gobá inta ain sinaḷui i Abraham kon i Epron intau in Het tatua, sin baḻíon poḷoḷobongan.

¹⁴ Nopaḷut mako in ki Yusup noḷobong kon i amánea, sia in nobuidon minayá in Mesir noyotakin i utatnea mita bo bayongan intau inta noyotakinnea minayá kon pinoḷobongan kon i amánea tua.

Ki Yusup nopoonowdon in gina i guya-guyangnea mita

¹⁵ Naonda in ki amá monia minatoi, ki guya-guyang mita i Yusup in noguman, “Naonda-ondadon mako aka kuma ki Yusup umuran motagú mako kon gina bo moibog monuḻí kon aid moraat naton koḻipod?”

¹⁶ Tuamai in mosia nokidia in koyow tanaa kon i Yusup, “Kon dodai in ki amá naton diápa minatoi,

¹⁷ sia in nopotabá kon inami mopotaau kon inimu in koyow tanaa, ‘Ampungaidon in taḷá koḻipod inta ain inaidan i guya-guyangmu kon inimu.’ Dá saḷaku bobantung mita i Allah inta sinumba i amá naton, kami in mopoigum, ampungaidon in taḷá inta ain inaidan nami.” Ki Yusup in nongombaḷ kon dodai in notarima kon koyow tatua.

¹⁸ Bo ki utatneadon in namangoi tontaní bo sinumungkud kon tayowonnea takin noguman, “Kami naa in bobantungmu.”

¹⁹ Táe ki Yusup in noguman kon i monia, “Dikabí moondok; sin akuoi in diábí motaau gumamá hak ná ki Allah.

²⁰ Moiko ain noyopakat sin mogaid kon inta moraat kon inakó, táe ki Allah ain nomaḷui kon inta moraat tua nobaḻí kopiaan, sinbá pinongin onu inta ain nobaḻí koḻipod tua mobayong intau inta nobiag masai naa in motaau posaḷamaton.

²¹ Donaai mosingkúang mako in gina. Posadiaankubí in moiko kon onu inta paraḷu pakéon monimu motoḷuadí.” Natuata in pinoḷoḻipoi i Yusup kon ondok i utatnea mita. Sia nopoyaput in tosingogon tatua takin dodia moaḷus bo ḷukó in pososingog.

Ki Yusup minatoi

²² Ki Yusup umuran nogutun kon Mesir takin i utatnea mita; sia in nobiag dapot in umur mogatut bo mopuḷú notaong.

²³ Sia in nokooḷat bo nokoontongpa kon i adí bo ompu i Epraim. Ná doman tua ki adí mita i Makhir, inta ki ompu i Manasye sinompianeapamai ná ki adínea tontaní.

²⁴ Gumannea kon i utatnea mita, “Wakutuku matoi nodiugdon, táe ki Allah pastibí kon umuranbí moḷukad kon i monimu bo modia kon i monimu ḷumuai nongkon butá tanaa, bo mayá in butá inta ain pinodandi-Nea takin nongibot kon i Abraham, kon i Ishak bo kon i Yakub.”

²⁵ Bo ki Yusup nopoigum kon bayongan adí bo utatnea nongibot, kainia, “Podandidon kon inakó, kon aka ki Allah modiadon kon i monimu mayá in butá tatua, yo poyodiaan domandon monimu in tuḷanku mita.”

²⁶ Onda intua minatoidon in ki Yusup kon Mesir kon dodai in umurdon mogatut bo mopuḷú notaong. Mosia in nonompia kon mayat tatua takin nomaké in bahan mita inta biasamai pakéon kon intau minatoi. Bahan mita tatua binonu monia kon poti intau minatoi.