KINOBAḺIAN 5 - Alkitab Singog In Mongondow Masa In Tanaa

Buí i Adam

¹ Naadon in buí mita i Adam. [Kon tungkuḷ in ki Allah nomia kon intau, pinomia-Nea in mosia notombatangan-Nea tontaní.

² Pinomia-Nea in mosia ḷoḷaki bo bobay. Binarakatan-Nea in mosia bo sinangoian “Intau”.]

³ Naonda in ki Adam umurdon mogatut bo toḷu nopuḷú notaong, nokouḻídon in sia kon adí ḷoḷaki inta notombatangannea, bo sinangoiannea ki Set.

⁴ Nopaḷut mako kon tua ki Adam in nobiagpa waḷu nogatut notaong bo buipa doman nokouḻí kon adí mita ibanea.

⁵ Sia in minatoi kon umur siow nogatut bo toḷu nopuḷú notaong.

⁶ Kon tungkuḷ in ki Set umur mogatut bo ḻima notaong, nokouḻí in sia kon adí ḷoḷaki, tangoinea in ki Enos.

⁷ Naonda in ki Set nobiagpa kon bonu in waḷu nogatut bo pitu notaong, nokouḻípa in sia kon adí mita ibanea mako.

⁸ Sia in minatoi tungkuḷ in umurdon siow nogatut bo mopuḷú bodoyowá notaong.

⁹ Kon tungkuḷ in ki Enos umurdon siow nopuḷú notaong, nokouḻí in sia kon adí ḷoḷaki, tangoinea in ki Kenan.

¹⁰ Nopaḷut mako kon tua ki Enos in nobiagpa waḷu nogatut bo mopuḷú bo ḻima notaong bo nokouḻípa bui kon adí mita ibanea.

¹¹ Sia in minatoi tungkuḷ in umurdon siow nogatut bo ḻima notaong.

¹² Kon tungkuḷ in ki Kenan umurdon pitu nopuḷú notaong, sia in nokouḻí kon adí ḷoḷaki, tangoinea in ki Mahalaleel.

¹³ Ki Kenan in nobiagpa waḷu nogatut bo opat nopuḷú notaong bo nokouḻípa bui kon adí mita ibanea.

¹⁴ Sia in minatoi tungkuḷ in umurdon siow nogatut bo mopuḷú notaong.

¹⁵ Kon tungkuḷ in ki Mahalaleel umur onom nopuḷú boḻima notaong, sia in nokouḻí kon adí ḷoḷaki, tangoinea in ki Yared.

¹⁶ Nopaḷut mako kon tua ki Mahalaleel nobiagpa waḷu nogatut bo toḷu nopuḷú notaong bo nokouḻípa kon adí mita ibanea.

¹⁷ Sia in minatoi tungkuḷ in umurdon waḷu nogatut bo siow nopuḷú boḻima notaong.

¹⁸ Kon tungkuḷ in ki Yared umurdon mogatut bo onom nopuḷú bodoyowá notaong, sia in nokouḻí kon adí ḷoḷaki, tangoinea ki in Henokh.

¹⁹ Nopaḷut mako kon tua ki Yared nobiagpa waḷu nogatut notaong bo nokouḻípa bui kon adí mita ibanea.

²⁰ Sia in minatoi kon tungkuḷ in umurdon siow nogatut bo onom nopuḷú bodoyowá notaong.

²¹ Kon tungkuḷ in ki Henokh umurdon onom nopuḷú boḻima notaong, sia in nokouḻí kon adí ḷoḷaki tangoinea in ki Metusalah.

²² Onda intua ki Henokh in nobiag notobatú takin i Allah kon bonu in toḷu nogatut notaong. Sia in nokouḻí kon adí ḷoḷaki mita ibanea

²³ bo umurnea nodapot in toḷu nogatut bo onom nopuḷú boḻima notaong.

²⁴ Pinopisí in ki Henokh umuran nobiag modagin kon i Allah, dá diádon in sia kon dunia naa sin diniadon i Allah.

²⁵ Kon tungkuḷ in ki Metusalah umurdon mogatut bo waḷu nopuḷú bo pitu notaong, sia in nokouḻí kon adí ḷoḷaki, tangoinea ki Lamekh.

²⁶ Onda intua ki Metusalah nobiagpa pitu nogatut bo waḷu nopuḷú bodoyowá notaong, sia in buipa nokouḻí kon adí mita ibanea.

²⁷ Sia in minatoi tungkuḷ in umurdon siow nogatut bo onom nopuḷú bo siow notaong.

²⁸ Kon tungkuḷ in ki Lamekh umur mogatut bo waḷu nopuḷú bodoyowá notaong, nokouḻí in sia kon adí ḷoḷaki.

²⁹ Ki Lamekh in noguman, “Adí tanaa mokogaat kon saged naton kon dodai in kita rumoriga in mogaid mononggobá kon butá inta kinutuk i Tuhan.” Tuamai sinangoian i Lamekh in adí tatua ki Nuh.

³⁰ Onda intua ki Lamekh nobiagpa ḻima nogatut bo siow nopuḷú boḻima notaong. Sia in buipa nokouḻí kon adí mita ibanea,

³¹ bo minatoi dodai in umurdon pitu nogatut bo pitu nopuḷú bopitu notaong.

³² Naonda in ki Nuh umurdon ḻima nogatut notaong, sia in nokouḻí kon adí ḷoḷaki toḷu, tangoi monia ki Sem, ki Yapet bo ki Ham.