KINOBAḺIAN 49 - Alkitab Singog In Mongondow Masa In Tanaa

Tosingogon i Yakub pangabisan

¹ Noiduduimai kon tua ki Yakub nogoiní kon i adínea mita bo noguman, “Poyosipundon kon naa, kon diugku. Potaaukudon kon i monimu onu in kobayáan monimu kon singgai moiduduimai:

² Poyosipundon uḻe in moiko, ei adí mita i Yakub Indongogaidon in ki Israel, ki amá monimu.

³ Ruben, ki adíku inta guya-guyang, ikobí in ropotku, bungai uḷuan in ḷoḷakiku. Iko in moroton totok bo moropot kon sigad in bayongan adíku mita.

⁴ Iko in mogampang moḻimbok naonda bo tubig, sahingga in deemandon iko inta totok in moponting; sin iko ain nosiug takin i buḷoiku inta bobantung tua, kinotoranmudon tosiugan i amámu.

⁵ Ki Simeon bo ki Lewi mogutat; abit monia in aid motogat.

⁶ Akuoi in diábí dumudui kon pinoyopakatan monia, diá doman tumuot kon pinoyosipunan monia. Sin mosia in noḻimod popisí in dinia in yaat in gina, mopotungkud in bantong sin tua in mokosanang kon i monia.

⁷ Katuḷaandon in torú monia tatua, sin moiḻiudon totok natua. Katuḷaandon in rogi moḷoben monia tua, sin moraatdon totok. Poyayitonkudon in mosia kon sigad i adí mita i Yakub. Bo moponabud kon i monia kon sigad in adí mita i Israel.

⁸ Yohuda, iko in modomok kon sindun in musungmu; ki utatmu mita in moduí kon inimu bo tumungkud kon tayowonmu.

⁹ Ki Yohuda naonda bo singa batánea; sia in moḻimod kon kokaanonnea bodongka bui mayá kon dumunnea; sia momuḻikai bodongka umuḻid, bo diá tobatúmai intau mokobaḻí monuyayow kon inia.

¹⁰ Ki Yohuda in mokadai kon tungkud in dodatuan, Buínea in momarenta dapot in mononoi. Bangusa mita in modia mangoi kon pajak, bo tumungkud takin moondok kon tayowonnea.

¹¹ Ki adí in keledainea sinogotnea kon pangkoi, pangkoi in anggur inta totok in mopia. Sia in nomatá kon pakeangnea takin momaké in anggur, anggur ná kopura in dugú.

¹² Mopura in matanea sin nonginum kon anggur, nobudó ingiponnea sin nonginum kon susu.

¹³ Ki Zebulon in mogutun kon diug in dagat; kapaḷ mita in sinumubu kon pintadnea; modapot kon Sidon in sigad toḻibutánea.

¹⁴ Ki Isakhar tua in naonda bo keledai moropot inta inumuḻid kon sigad in karansi mita pobobonuan kon datognea.

¹⁵ Inindoiannea totuu mopia in tampat tatua bo totuu mogaga in butá tatua, dá kumuyungdon in sia bo moibogdon popotakoian in datog, bo pakisaan mogaid saḷaku bobantung.

¹⁶ Iko Dan, mononantú kon taḷá in bangusamu, iko in mobaḻí suku ná suku ibanea kon Israel.

¹⁷ Iko naonda bo uḷag kon bingkí in daḷan, uḷag mobisa kon bingkí in lorong, inta monobak kon singkod in kabaḷo modapot in moigarab in intau inta sinumakoi.

¹⁸ O Tuhan, kasaḷamatan inta inogoi-Mu, tuata inta inoḷatku mako.

¹⁹ Gad, iko in tubuon in mogogagow, tongá ikobí in bui mogagow kon i monia.

²⁰ Asyer, kaanonmu mobarong totok, iko in moposadia kon kaanon in datu mita.

²¹ Naptali, naonda bo rusa nokobuḻi, tumongo ḷunat in ki adínea mita.

²² Ki Yusup naonda bo keledai inta batánea, keledai kaḻig kon diug in bokaká, noribatuk kon aḻet in buḷud.

²³ Umpaka totokdon tubuon in musung, aḷowan monia bo pioton.

²⁴ Táe kokaḷ i Yusup umuran motorindog, umuran moropot in piotnea, sin kawasa I Gombala Inta totok in moropot, ki Allah i Yakub, in Mogogoḻiung in Israel.

²⁵ Ki Allah i amámu motuḷung kon inimu; Inta Totok in Mokawasa momarakat kon inimu takin mobogoi in uyan nongkon ḷangit bo tubig nongkon ḻimonag in butá. Takin adí bo sapi,

²⁶ gandum bo bungang. Barakat i Allah i amámu moiḻiu kon kaoyúonan in buḷud mita inta totokdon in noonggot. Poigumon mako moponagdon in bayongan barakat tatua kon uḷu i Yusup, kon ḻimonik in pogotnea. Siata in noiḷontú kon i utatnea mita.

²⁷ Ki Benyamin in serigala inta morogi. Kon wakutu in doḷo-doḷom sia modomok kon kokaanonnea. Onda in doḷom silaionnea intua magí-mako.”

²⁸ Tuata in suku Israel inta mopuḷú bodoyowá, bo tosingogon inta siningog i amá monia bo poḷat nobogoi in barakat pangabisan kon i monia kon batúannea.

Ki Yakub minatoi bo iḷobong

^29-30 Onda intua ki Yakub nongoyow kon i adínea mita, “Diádon moonggot in akuoi bo matoidon ná mogoguyangku. Ḷobongdon in akuoi kon símai monia kon bonu in angob kon Makhpela, kon dotá in pomukaan kon Mamre kon butá in Kanaan. Ki Abraham ain notaḷui kon angob bo gobá kon diugneamai nongkon i Epron intau in Het sin baḻíon tampat poḷoḷobongan.

³¹ Kon tua in pinoḷobongan kon i Abraham bo kon i Sara, kon i Ishak bo kon i Ribka; bo kon tua doman pinoḷobonganku kon i Lea.

³² Gobá bo angob inta kon tua ain sinaḷui nongkon intau in Het. Ḷobongdon in akuoi kon tua.”

³³ Naonda in ki Yakub nopaḷut nobogoi in koyow kon i adínea mita, inumuḻidon in sia bodongka minatoi.