KINOBAḺIAN 47 - Alkitab Singog In Mongondow Masa In Tanaa

Ki Yakub minayá kon tayowon i datu in Mesir

^1-2 Noiduduimai kon tua ki Yusup nodia kon i utatnea taya ḻima bo minayá kon tayowon i datu. Gumannea, “Ki Amá bo ki utatku mita aindon namangoi nongkon Kanaan takin paanan in bembé domba, sapi bo bayongan kapunyaan monia. Tanaa mako mosia in tuadon kon daerah in Gosyen.” Bo pinoyogintaauneadon in ki utatnea mita tatua kon i datu.

³ Ki datu in noḻibó kon i monia, “Onu in oaidanmu?” Mosia in notubag, “Kami naa in gombala ná mogoguyang nami.

⁴ Kami namangoi sin mogutun kon butá tanaa, sin kon butá in Kanaan totokdon motoyang in malarat, dapot in diádon bonok kaanon in bobiagon bembé domba nami. Ogoidon in kami mogutun kon butá in Gosyen.”

⁵ Bo ki datu nogumandon kon i Yusup, “Tanaa ki amá bo ki utatmu mita oyúondon kon naa.

⁶ Anggapdon butá in Mesir naa ná doman onda bo butámu tontaní. Pomayádon mako in mosia mogutun kon butá in Gosyen, butá inta totok in mopia kon sigad in butá mita kon naa. Bo aka oyúon in kotaauanmu kon sigad monia in mopandoi monombobiagon yo pokiḷukadaidon in bobiagonku.”

⁷ Ki Yusup nodia doman kon i amánea kon tayowon i datu sinbá kotaauan domandon i datu. Ki Yakub nomarakat kon i datu,

⁸ bo ki datu in noḻibó kon inia, “Umurdon tongonu in ki amá?”

⁹ Tubag i Yakub, “Akuoi ain nobiag kon binayáanku koonggotnea in mogatutdon bo toḷu nopuḷú notaong. Kobiaganku naa in nopuḻing in roriga. Kinobiaganku naa in nopoḷokbí aka poyobandingonmai umur in mogoguyangku inta nobiag doman nobaḻí intau inta diá notantú kon pogutunan.”

¹⁰ Onda intua ki Yakub nopoigumdon mayá bo nobogoi in barakat kon poyogapían.

¹¹ Ki Yusup notuḷung kon i amá bo kon i utatnea mita nogutundon notantú kon Mesir. Sinilainea in mosia in butá inta totok mopia kon sigad in butá kon tua inta kon diug in kotá in Rameses, podudui in parenta i datu.

¹² Bo ki Yusup noposadia in onu in paraḷu kaanon i amá, i utat bo bayongan ginaḷum motoḷuadínea, nodapot kon inta adípa mita.

Sempo in malarat

¹³ Malarat tatua totokdon motoyang, nodapot in kon bayongan tampat kinodaitandon in kaanon. Rayat kon Mesir bo rayat in Kanaan moyangkódon bo kinodaitandon in daya sin gogoyon.

¹⁴ Pomuḷoi in mosia motaḷui kon gandum, sipunon i Yusup in doit inta pinotaḷui monia kon gandum tatua, bodongka tagúonnea kon komaḻig i datu.

¹⁵ Naonda in nodait in doit kon Mesir bo kon Kanaan, intau mita in Mesir namangoi kon i Yusup bo noguman, “Ogoiaipa in kaanon kami! Donaaidon pomayá mako matoi in kami. Doit nami ain nodait.”

¹⁶ Ki Yusup notubag, “Aka doitmu ain nodait, yo ogoidon in biagmu; bá ogoianku in kaanon monimu.”

¹⁷ Bo inogoidon monia in biag monia kon i Yusup, bo ki Yusup nobogoi in kaanon kon i monia nobaḻí toḻiu in kabaḷo, domba, bembé, sapi bo keledai monia. Kon taong tatua ki Yusup nobogoi in kaanon kon i monia bo rayat nobogoi in bobiagon monia nobaḻí toḻiu in kaanon monia.

¹⁸ Kon taong noiduduimai bui namangoi in mosia kon i Yusup bo noguman, “Kami in mogumandon taran-tarangan kon i Tuang kon doit nami ain nodait bo bobiagon nami ain nobaḻí doman kapunyaan i Tuang. Kami in diádon koonu bo onu inta motaau ogoi nami kon i Tuang, koḻikudon in awak nami tontaní bo butá nami.

¹⁹ Donaai pomayá mako matoi in kami! Donaai pomayá mako in gobá nami diá in mangaḻenea. Uboḻiaidon in gandum in kami bo butá mita nami. Kami bo butá nami in mobaḻídon kapunyaan i datu. Ogoiaipa kami in gandum sinbá mobiagpa in kami bo ogoiaipa doman in bibit sin pomuḷaan kon gobá tatua!”

²⁰ Bo ki Yusup in notaḷui kon bayongan butá kon Mesir bo inogoi kon i datu. Komintan intau in Mesir pakisadon nopotaḷui in butánea, sin popisí in sempo in malarat inta totok in motoyang tatua; bo bayongan butá kon Mesir nobaḻídon kapunyaan i datu.

²¹ Bayongan rayat in Mesir binaḻídon i Yusup bobantung.

²² Tongádon butá in imang mita in diá sinaḷui i Yusup. Mosia in diá bidon paraḷu mopotaḷui in butá monia sin mosia in tantúbí pinosadiaan i datu kon onu in paraḷu kon kobiagan monia.

²³ Ki Yusup in noguman kon rayat mita tatua, “Indoiaika, moiko bo butámu ain sinaḷuiku bo inogoi kon i datu. Naadon in bibit inta motaau pomuḷaan monimu kon gobá tatua.

²⁴ Kon dodai in mosipundon kon boyó, moiko musti in mobogoi kon i datu in seperlima nongkon bungai in boyó tatua. Noiḻiu kon tua kon tua motaaubí pakéon monimu pomuḷaan bui ande kaanon monimu takin buḷoi bo adímu.”

²⁵ Tubag monia, “Ki Tuang ain noposaḷamat kon inami dá kami mopoyaput in sukur moantó. Kami in morelabí mobaḻí bobantung i datu.”

²⁶ Noiduduimai kon tua binaḻídon i Yusup atorang kon butá in Mesir in soaḷ seperlima nongkon bungai in boyó musti mobaḻí kapunyaan i datu. Dapot masai in naa atorang tatua umuranpa pinaké. Tongábí butá mita in imang mita in diá nobaḻí kapunyaan i datu.

Oigum i Yakub pangabisan

²⁷ Natuata intau mita in Israel nogutun notantú kon Mesir, kon butá in Gosyen. Mosia in nobaḻí nooyúon bo nononggadí nononggompu nobayong kon tua.

²⁸ Ki Yakub nobiagpa mopuḷú bopitu notaong kon Mesir nodapot in umurnea mogatutdon bo opat nopuḷú bopitu notaong.

²⁹ Naonda in nodiugdon wakutunea matoi, inoinínea in ki Yusup, ki adínea tua, bodongka noguman kon inia, “Poukatdon in ḻimamu kon sigad in páaku doyowa naa bo pongibotdon kon iko in diábí moḷobong kon inakó kon butá in Mesir tanaa.

³⁰ Ibogonku in ḷobongonbí in akuoi kon tampat inta pinoḷobongan kon mogoguyangku; diádon in mayatku nongkon butá tanaa bo ḷobongdon kon tampat poḷoḷobongan kon i monia.” Bo ki Yusup notubag, “Aidankubí onu inta pinoguman i amá tatua.”

³¹ Ki Yakub in noguman, “Pongibotdon kon aidanmubí in tua.” Ki Yusup in nongibot, bo ki Yakub nopoyaputdon i sukur nongkon tosiugannea.