KINOBAḺIAN 46 - Alkitab Singog In Mongondow Masa In Tanaa

Ki Yakub bo motoḷuadínea minayá in Mesir

¹ Ki Yakub nonoinutdon kon bayongan in kapunyaannea bodongka nobuat. Nodapotmai kon Bersyeba sia noposumbadon in kuruban kon i Allah inta sinumba i Ishak ki amánea.

² Kon tobatú oontongon wakutu in doḷom, ki Allah noguman kon inia, “Yakub, Yakub!” “Ya, Tuhan,” tubagnea.

³ “Akuoi ki Allah, inta sinumba i amámu,” guman-Nea. “Dika moondok in mayá kon Mesir. Baḻíon-Ku in buímu bangusa inta moḷoben kon tua.

⁴ Takinan-Ku iko mayá in Mesir, bo bui modia mangoi kon buímu mobui mangoi kon butá tanaa. Bo ki Yusup in mogompigbí kon inimu aka wakutumudon.”

⁵ Bo nobuatdon in ki Yakub nongkon Bersyeba. Ki adí mita i Yakub nopoponikdon kon i amá bo kon i adí bo buḷoi monia kon bonu in kereta inta pinoki dia mangoi i datu in Mesir.

⁶ Mosia in nodia domandon mangoi kon bobiagon bo bayongan kapunyaan inta nouḻí monia kon Kanaan, bodongka nobuat minayá in Mesir. Ki Yakub in nodia kon buínea mita,

⁷ bayangan adí bo ompunea ḷoḷaki bo bobay.

⁸ Tangoi mita in motoḷuadí i Yakub inta sinumakin minayá in Mesir in:

⁹ ki Ruben, adí guya-guyang; ki adínea mita: in ki Henokh, ki Palu, ki Hezron bo ki Karmi.

¹⁰ Ki Simeon; ki adínea mita: ki Yemuel, ki Yamin, ki Ohad, ki Yakhin, ki Zohar bo ki Saul, ki adí i buḷoinea intau in Kanaan.

¹¹ Ki Lewi; ki adínea mita: ki Gerson, ki Kehat bo ki Merari.

¹² Ki Yohuda; ki adínea mita: ki Syela ki Peres bo ki Zerah, yo ki adí mita i Yohuda ibanea, ki Er bo ki Onan in minatoi kon Kanaan. Ki adí mita i Peres in ki Hezron bo ki Hamul.

¹³ Ki Isakhar; ki adínea mita: Ki Tola, ki Pua, ki Ayub bo ki Simron.

¹⁴ Ki Zebulon; ki adínea mita: ki Sered ki Elon bo ki Yahleel.

¹⁵ Mosia tua in ki adí mita i Lea kon i Yakub inta pinononggadí kon Mesopotamia, koḻikud intua ki adínea doman bobay inta tangoinea ki Dina. Dá bayongan buí i Yakub nongkon i buḷoinea ki Lea kobayongnea in toḷu nopuḷú botoḷú.

¹⁶ Ki Gad; ki adínea mita: ki Zipyon, ki Hagi, ki Syuni, ki Ezbon, ki Eri, ki Arodi bo ki Areli.

¹⁷ Ki Asyer; ki adínea mita: ki Yimna, ki Yiswa, ki Yiswi bo ki Beria, ki Serah in ki utat monia bobay. Ki adí mita i Beria in ki Heber bo ki Malkiel.

¹⁸ Taya mopuḷú bo onom tua in buí i Yakub kon i Zilpa, bobantung bobay inta inogoi Laban kon i Lea, ki adínea bobay tatua.

¹⁹ Ki Rahel ki buḷoi Yakub kogadí kon doyowa, ki Yusup bo ki Benyamin.

²⁰ Kon Mesir ki Yusup nokouḻí kon doyowa in adí, ki Manasye bo ki Epraim inta pinononggadí i buḷoinea inta ki Asnat in tangoinea, ki adí i Potisaḷaka, inta nobaḻí imang kon Heliopolis.

²¹ Ki adí mita i Benyamin; in ki Bela, ki Bekher, ki Asybel, ki Gera, ki Naaman, ki Ehi, ki Ros, ki Mupim, ki Hupim bo ki Ared.

²² Taya mopuḷú bo opat tatua in buí i Yakub nongkon i buḷoinea inta ki Rahel.

²³ Noiduduimai kon tua ki Dan; ki adínea in ki Husim.

²⁴ Ki Naptali; ki adínea mita: ki Yahzeel, ki Guni, ki Yezer bo ki Syilem.

²⁵ Taya pitu tua in buí i Yakub kon i Bilha, bobantung bobay inta inogoi i Laban kon i Rahel ki adínea.

²⁶ Buí i Yakub inta minayá in Mesir kobayongnea in onom nopuḷú bo onom in intau, diápabí pinoyoiyap in ki mototakanea mita.

²⁷ Ki adí mita i Yusup inta pinononggadí kon Mesir in taya dua, sahingga motoḷuadí i Yakub inta noyaput kon Mesir kobayongnea komintan in pitu nopuḷú.

Ki Yakub bo motoḷuadínea kon Mesir

²⁸ Ki Yakub nopotabá kon i Yohuda minayá inumuna kon inia sin mogoiní kon i Yusup sinbá tomuoneadon in ki amánea kon Gosyen. Naonda in mosia nodapot kon Gosyen,

²⁹ ki Yusup in sinumakoi kon keretanea sin mayá mokipodungkuḷ kon i amánea kon tua. Onda in mosia noyodungkuḷ, ki Yusup ginumakap kon i amánea bo noonggot in pinongombaḷnea.

³⁰ Guman i Yakub kon i Yusup, “Tanaa akuoi diá bidon moondok in matoi, sin inontongkudon iko bo kinotaauankudon kon nobiagpabí in iko.”

³¹ Bo ki Yusup in noguman kon i utatnea mita bo kon ginaḷumnea ibanea, “Akuoi in mustidon mayá bo mopotaau kon i datu kon bayongan i utatku mita takin motoḷuadí naton inta nogutun kon Kanaan aindon noiangoi.

³² Pogumankudon kon moiko in gombala mita in domba bo sapi, bo ain nodia kon bobiagon bo bayongan in kapunyaan monimu.

³³ Aka ki datu mogoiní kon i monimu bo moḻibó kon oaidanmu,

³⁴ potaaudon kon inia kon moiko in mononombobiagon nongkon mointokanmai, notongkai ná mogoguyang monimu. Aka natua dá potabáneadon in moiko mayá mogutun kon butá in Gosyen.” Ki Yusup noguman natua sin intau in Mesir ná pokopoonagonmai aka moyobayat takin gombala mita.