KINOBAḺIAN 42 - Alkitab Singog In Mongondow Masa In Tanaa

Ki Utat mita i Yusup minayá in Mesir notaḷui kon gandum

¹ Naonda in kinodongogan i Yakub kon oyúon in gandum kon butá in Mesir, dá sia noguman kon i adínea mita, “Nongonu sin moiko in tongábí kibio-biómai?

² Kinodongogankudon kon tua kon Mesir oyúon in gandum; bayádon bo potaḷuidon kon gandum kon tua sinbá kita diá matoi in gogoy.”

³ Bo minayádon ki guya-guyang i Yusup inta mopuḷú tua notaḷui kon gandum kon Mesir.

⁴ Táe ki Benyamin diá inogoi i Yakub minayá noyotakin monia sin sia moondok dika-dikabo mobodito in ki adínea tatua. Ki Benyamin naa in toamá bo toináan i Yusup.

⁵ Pinopisí in malarat kon butá in Kanaan, dá ki adí i Yakub takin intau moantó ibanea namangoi notaḷui kon gandum kon Mesir.

⁶ Intau inta nopotaḷui in gandum kon intau mita inta nongkon ḻipú-ḻipúannea tua in ki Yusupbí, gubernur in Mesir. Tuamai ki guya-guyangnea mita namangoi bo sinumungkud kon tayowonnea.

⁷ Naonda in ki Yusup nokoontong kon i guya-guyangnea mita, kinotaauanneadon in mosia tua, táe sia in ki ubo-uboḷmai diá nonotaau. Takin buḷaḷu sia in noḻibó kon i monia, “Moiko nion intau nongkon onda?” “Kami naa intau in Kanaan. Kami namangoi sin motaḷui kon kaanon,” tubag monia.

⁸ Umpaka kinotaauan i Yusup kon mosia tua in ki guya-guyangnea, táe mosia in diá bidon nonotaau kon inia.

⁹ Bo kinotoropanneadon in togoindopnea inta soaḷ mosia. Bo sia in noguman bui, “Moiko nion in mata-matabí; moiko mamangoi sin moindoi bo motayak mongo kon onda in kalemahan nami.”

¹⁰ “Diábí natua, Tuangku,” tubag monia. “Kami, bobantung mita i Tuang naa in namangoi tongábí motaḷui kon kaanon.

¹¹ Kami naa in mogutat motoḷuadí, Tuangku. Kami naa intaubí mopia, deemanbí mata-mata.”

¹² Táe ki Yusup in bui noguman kon i monia, “Uboḷ! Moiko nion in namangoi sin motayak mongo kon onda in kelemahan nami.”

¹³ Tubag monia, “Kami naa in mopuḷú bodoyowá mogutat, Tuangku, kami naa in adí toamáan kon butá in Kanaan. Tobatú kon sigad nami ain minatoi bo inta muit tanaa mako in kotaki-takin i amá nami.”

¹⁴ “Totuubí in singogku koina, moiko nion in mata-matabí”. guman i Yusup “kon i monia.

¹⁵ Tungkuḷankupa in moiko: Ibotanku podoyon kon tangoi i datu kon moiko in diábí moiḷuai nongkon butá tanaa aka ki ai-ai monimu inta muit tua diá mamangoi in naa.

¹⁶ Tobatú kon sigad monimu musti mobui mogamá kon inia. Ibanea in tahangonkupa modapot in tosingogon monimu tua moniata. Aka diá, yo podoyon kon tangoi i datu, moiko nion in mata-mata in musung!”

¹⁷ Onda intua mosia pinobonu kon ponjara toḷu nosinggai in koonggotnea.

¹⁸ Kon singgai intoḷunea ki Yusup in noguman kon i monia, “Akuoi naa in intau inta moondok bo motoindudui kon i Allah. Moiko in poḷuaionku takin tobatú sarat.

¹⁹ Sinbá moniata kon moiko nion in intaubí motuḻid, dá kon sigad monimu nion tobatú tahangonpa bui kon bonu in ponjara; ibanea motaaudon mobui bo modia kon gandum inta sinaḷui monimu sin kaanon in motoḷuadímu inta kinoantugan in malarat.

²⁰ Mopaḷut mako kon tua moiko in musti modia mangoi kon i ai-ai monimu inta muit tua poangoi kon inakó. Tua in ponandaan kon tosingogon monimu tua in totuubí, bo moiko in diábí hukumon matoi.” Mosia in noyopakat kon tosingogon i gubernur tatua.

²¹ Bo noyosingogdon in mosia, “Totu-totuu kon tanaadon mako kita ihukum popisí in taḷá naton kon i ai-ai naton koḻipod; sia in nokituḷung táe diá pinandungmai naton, umpaka indoian mako naton kon totokdon in mororiga in sia. Tuamai tanaa mako kita in motarimadon kon roriga tanaa.”

²² Ki Ruben in notubag, “Kinotaauan bidon monimu kon koḻipod ain pinogumanku kon i monimu sinbá adí tatua donaai yagi-yagionmai. Táe moiko in doí mokidongog. Dá tanaa kinopatoiannea in potuḻídon kon inaton.”

²³ Kinomangaḻeanpabí i Yusup in bahasa monia, táe diábí kinotaauan i guya-guyangnea intua, sin mosia noyosingog i Yusup takin tonsigad in intau inta mopopotaau in mangaḻenea.

²⁴ Ki Yusup nonaḷámai kon i monia, bodongka nongombaḷ. Naonda in sia motaaudon bui mosingog, sia in namangoidon bui kon i monia, bo nogamá kon i Simeon, bo pinoki togot in sia kon tayowon i utatnea mita.

Ki guya-guyang mita i Yusup nobui kon Kanaan

²⁵ Ki Yusup nomarentadon sinbá karong mita inta dinia i guya-guyangnea mita tatua bonuandon in gandum, bo doit monia tua in popobonudon bui kon karong monia kon batúannea. Bo mosia in ogoian doman in kaanon mobaḻí toibaḷun monia kon daḷan. Parenta i Yusup mita tatua inaidandon monia.

²⁶ Nopaḷut mako kon tua pinodatogdon i guya-guyang mita i Yusup kon nonoyan in keledai in gandum mita inta sinaḷui monia tatua bodongka nobuatdon in mosia nongkon tua.

²⁷ Kon tampat pinogogaian monia wakutu in doḷom, tobatú kon sigad monia tua nobuká kon karong in gandumnea sin mopokaan in keledainea. Bo nouḻíneadon in doitnea kon tudu in gandum tatua.

²⁸ “Doitku pinobuibí,” gumannea kon i utatnea mita. “Indoiai, nouḻíku kon bonu in karongku!” Gina monia nobaḻí nokawai, bo takin ondok mosia in nosiḻibóan, “Onu in pinomia i Allah kon inaton?”

²⁹ Wakutu in nodapotdon kon Kanaan, inouman monia kon i amá monia in bayongan inta nobaḻí kon i monia. Guman monia,

³⁰ “Ki Gubernur in Mesir mobuḷaḷubí totok in pososingognea kon inami bo sia noponapud kon kami naa in mata-mata inta mayá motayak kon kalemahan monia.

³¹ Táe kami in notubag, ‘Kami naa in intaubí mopia, deemanbí mata-mata, kami naa in intaubí motuḻid.

³² Kami komintan mopuḷú bodoyowá mogutat, nogaḷum kon amá, bo tobatú ain minatoi, bo inta muit koyotaki-takin i amá kon Kanaan.’

³³ Ki Gubernur tatua in noguman, ‘Tungkuḷankupa in moiko sinbá kotaauanku mongo totuu kon moiko nion in intau mita motuḻid: Kon sigad monimu nion in tobatú musti mogutunpa kon naa; ibanea in motaaudon mobui modia kon gandum kon motoḷuadímu inta kinoantugan in malarat.

³⁴ Naonda in moiko modia mangoi kon i ai-ai monimu inta muit, bain tua bo kotaauanku kon moiko nion in deemanbí mata-mata, táe intaubí motuḻid. Dá ki utat monimu inta sinahangkupa tua in pobuionkudon bui kon i monimu bo moiko in motaaudon mogutun kon butá tanaa bo motaaubí modagang.’ ”

³⁵ Noiduduimai kon tua, kon dodai in mosia mopoḷuaidon bonu in karong monia, nouḻídon bui monia in dompet monia tontaní takin doit; bo mosia inangoiandon in ondok, ná doman tua in ki amá monia.

³⁶ Bo ki amá monia in nosingogdon, “Moiko ain nokopopisí kon akuoi in kinobuḻiandon i adíku mita. Ki Yusup in diádon; ki Simeon diádon; bo tanaa moiko in mogamá domandon kon i Benyamin. Moiḻiudon totok in rorigaku!”

³⁷ Bo ki Ruben in noguman kon i amánea, “Posarakaidon kon inakó in ki Benyamin, Papa; bain diaanku bui in sia mangoi, aka diá, ki Papa motaaubí moḻimod kon i adíku ḷoḷaki doyowa tua.”

³⁸ Táe ki Yakub in noguman, “Diá! Ki Benyamin diábí motaau diaan monimu; ki guya-guyangnea ain minatoi bo tanaa dongkadon sia in oyúon. Dika-dika sia in mobodito doman kon binayáan tatua. Akuoi naa ain nogoguyang, bo robonoḷ in gina inta popoangoi monimu tua in mokopopisídon kon kopatoianku.”